ខណៈម្រេចកំពតបានបញ្ចប់ការប្រមូលផលដោយទទួលបានទិន្នផលល្អប្រសើរនោះ បានធ្វើឱ្យប្រជាកសិករមានភាពរីករាយជាខ្លាំង ប៉ុន្តែទន្ទឹមនឹងនោះការលក់ចេញទៅកាន់ទីផ្សារហាក់មានសភាពយឺតយ៉ាវ ដែលជាហេតុធ្វើឱ្យមានការលើកសំណូមពរមួយចំនួនទៅដល់ស្ថាប័នពាក់ព័ន្ធឱ្យជួយស្វែងរកទីផ្សារបន្ថែមទៀត។
លោក ងួន ឡាយ ប្រធានសមាគមម្រេចខេត្តកំពត បានលើកឡើងថា ការប្រមូលផលម្រេចនៅក្នុងឆ្នាំនេះបានបញ្ចប់តាំងពីខែមិថុនាមកម៉េះ្ល ដោយទិន្នផលសរុបប្រមូលបានក្នុងរង្វង់80តោន។ លោកបានបន្ថែមថា ពាក់ព័ន្ធនិងបញ្ហាតម្លៃសម្រាប់ម្រេចទាំងពីរប្រភេទ (ម្រេចស និងម្រេចខ្មៅ) គឺនៅតែអាចរក្សាស្ថិរភាពបានល្អដដែល តែអ្វីដែលគួរឱ្យយកចិត្ដទុកដាក់បន្ថែមនោះគឺទីផ្សារនៃការបញ្ជាទិញ ព្រោះលោកសង្កេតឃើញថាការបញ្ជាទិញក្នុងឆ្នាំនេះហាក់មានសកម្មភាពយឺតយ៉ាវជាងឆ្នាំកន្លងមក។ មូលហេតុដែលធ្វើឱ្យចរន្ដនៃការបញ្ជាទិញយឺតយ៉ាវទំនងជាមកពីទីផ្សារម្រេចកំពតនៅមានលក្ខណៈមិនទាន់ធំទូលាយនៅឡើយ។
ប្រធានសមាគមម្រេចខេត្តកំពត បានបន្ថែមថាបើទោះបីជាទីផ្សារនៃការលក់ចេញទៅក្រៅប្រទេសមិនទាន់ធំទូលំទូលាយ តែបច្ចុប្បន្នការដាំដុះម្រេចកំពតបានបន្តកើនឡើងជាបន្ដបន្ទាប់ ក្នុងនោះមានទាំងការដាំរបស់ប្រជាកសិករក្នុងស្រុក និងមានក្រុមហ៊ុនមកពីបរទេសមួយចំនួនបានមកធ្វើការវិនិយោគលើការដាំដុះម្រេចក្នុងខេត្តកំពតផងដែរ។
ទោះយ៉ាងណា លោក ងួន ឡាយ បញ្ជាក់ថា៖“ជាបំណងរបស់ខ្ញុំ គឺចង់ឱ្យក្រុមហ៊ុនបរទេសទាំងនោះជួយស្វែងរកទីផ្សារលក់ម្រេចកំពតឱ្យបានធំទូលាយជាជាងមកពង្រីកការដាំដុះម្រេចដោយផ្ទាល់។ មានក្រុមហ៊ុនមួយចំនួនពុំបានឆ្លងកាត់សមាគមយើងទេ គឺគាត់ចេះតែដាំបន្ថែម ផ្ទុយទៅវិញបើមានក្រុមហ៊ុនណាឆ្លងកាត់សាកសួរយោបល់ពីសមាគមយើង គឺយើងនឹងណែនាំមិនឱ្យដាំទេ ហើយកិច្ចការទាំងនេះក៏យើងបានធ្វើកន្លងមកខ្លះៗហើយដែរ។
លោកបានបន្ដថា មិនថាម្រេចកំពតនោះទេ អ្វីក៏ដោយឱ្យតែលើសពីតម្រូវការទីផ្សារវានឹងមានតម្លៃទាបដូចជាដំណាំម្រេចកំពតជាដើម។ ដូច្នេះជម្រើសល្អសម្រាប់ក្រុមហ៊ុនបរទេសដែលមានបំណងចង់រកស៊ីលើកសិផលប្រភេទនេះគួតែស្វែងរកទីផ្សារសម្រាប់លក់ចេញទៅវិញជារឿងប្រសើរ។ ចំពោះការដាំដុះម្រេចអាចទុកឱ្យប្រជាកសិករជាម្ចាស់ស្រុកអ្នកធ្វើជារឿងល្អបំផុត ព្រោះពួកគាត់យល់ច្បាស់ពីស្ថានភាពភូមិសាស្ដ្រ អាកាសធាតុ របៀបធ្វើជុំវិញការដាំដុះដំណាំម្រេចនេះ។
ប្រធានសមាគមម្រេចកំពតបានបញ្ជាក់ថា៖ “មូលហេតុខ្ញុំចង់ឱ្យក្រុមហ៊ុនធំៗជួយរកទីផ្សារបន្ថែមព្រោះកិច្ចការនេះហួសពីសមត្ថភាពប្រជាកសិករដែលអាចធ្វើទៅបាន។ ម្យ៉ាងទៀតកន្លងមកខ្ញុំសង្កេតឃើញថា ក្រុមហ៊ុនដែលមកផលិតមិនសូវទទួលបានជោគជ័យទេ ដូច្នេះគាត់មានជំនាញខាងពាណិជ្ជកម្មគួរតែធ្វើការងារទីផ្សារទៅ រីឯការងារផលិត និងដាំដុះទុកឱ្យកសិករជាអ្នកធ្វើទើបប្រសើរ”៕
