បើទោះបីបច្ចុប្បន្នយុវជនមួយចំនួនមានការពេញនិយមចំពោះសម្លៀកបំពាក់សម័យថ្មីក៏ដោយ ក៏ក្រមាខ្មែរនៅតែមានការពេញនិយមប្រើប្រាស់ពីសំណាក់ប្រជាពលរដ្ឋខ្មែរទាំងនៅក្នុងស្រុក និងក្រៅស្រុក ព្រមទាំងពីសំណាក់ជនបរទេសផងដែរ។
លោកស្រី គឹម ដាវី ប្រធានសមាគមសិប្បកម្មអង្គរ បានមានប្រសាសន៍ថា ដោយមានការជួយជ្រោមជ្រែងពីរាជរដ្ឋាភិបាលកម្ពុជាក្នុងការផ្តល់ជំនួយបច្ចេកទេស សមាគមរបស់លោកស្រីបានរៀបចំសិប្បកម្មផលិតវត្ថុអនុស្សាវរីយ៍ជាច្រើនប្រភេទសម្រាប់ដាក់លក់នៅលើទីផ្សារ ជាពិសេសក្រមាអំបោះត្បាញដោយដៃផ្ទាល់ដែលមានការគាំទ្រខ្លាំងទាំងទីផ្សារក្នុងប្រទេស និងក្រៅប្រទេស។
លោកស្រីបានប្រាប់ថា ជាមធ្យមក្នុងមួយខែសមាគមសិប្បកម្មអង្គរលក់ក្រមា កន្សែង និងភួយក្នុងស្រុក បានចន្លោះពី 7,000 ទៅ 8,000 និងបាននាំចេញទៅលក់នៅលើទីផ្សារប្រទេសមួយចំនួនដូចជា អូស្ត្រាលី កាណាដា ន័រវេស និងនូវ៉ែលសេឡង់ជាដើម ដែលមានចំនួនប្រមាណចន្លោះពី 1,500 ទៅ 1,800ក្រមាថែមទៀតផង។ នេះអាចនិយាយថា ជាសកម្មភាពមួយក្នុងការជួយផ្តល់ការងារដល់ប្រជាពលរដ្ឋមូលដ្ឋាន សម្រាប់រកចំណូលបន្ថែមពីការងារស្រែចម្ការ ក៏ដូចជាកាត់បន្ថយការធ្វើចំណាកស្រុកបានមួយចំណែកផងដែរ។ អ្វីដែលធ្វើឱ្យក្រមាខ្មែរមានការពេញនិយមប្រើប្រាស់ទាំងនៅក្នុងស្រុក និងក្រៅស្រុក គឺដោយសារក្រមាត្បាញដោយដៃសិប្បករខ្មែរមានគុណភាពល្អជាងក្រមាផលិតចេញពីរោងចក្រនាំចូលមកពីក្រៅប្រទេស។
គួរបញ្ជាក់ថា សមាគមសិប្បកម្មអង្គរ មិនមែនផលិតក្រមាតែមួយប្រភេទនោះទេ ពោលគឺមានផលិតវត្ថុអនុស្សាវរីយ៍ជាច្រើនប្រភេទថែមទៀត សម្រាប់ដាក់លក់នៅលើទីផ្សារក្នុងខេត្តសៀមរាប ហើយមានការពេញនិយមគាំទ្រយ៉ាងខ្លាំងពីជនបរទេស។ លោកស្រី ដាវី បានបញ្ជាក់ថា៖“ដោយសង្កេតឃើញវត្ថុអនុស្សាវរីយ៍មួយចំនួនត្រូវបាននាំចូលពីក្រៅប្រទេស មកលក់ទៅឱ្យជនបរទេសនៅក្នុងប្រទេសកម្ពុជា សមាគមក៏បានផ្តួចផ្តើមគំនិតផលិតវត្ថុអនុស្សាវរីយ៍នេះឡើងដើម្បីជួយផ្តល់ការងារដល់ពលរដ្ឋខ្មែរឱ្យពួកគាត់មានជីវភាពបានប្រសើរឡើងថែមមួយកម្រិតទៀត។
សិប្បកម្មចម្លាក់ទាំងនោះ ត្រូវបានចែកចេញជាផ្នែកផ្សេងៗគ្នាមានដូចជា ទី1 សិប្បកម្មចម្លាក់ប្រាក់ ថ្ម ឈើ ស្ពាន់ ស្បែក និងគំនូរធម្មជាតិផ្សេងៗទៀត ទី2 សិប្បកម្មបែបសរសៃធម្មជាតិសម្រាប់ធ្វើជាកន្ត្រក កញ្ច្រែង កញ្ជើ ល្អី ឬសម្បកវេចខ្ចប់ជំនួសថង់ផ្លាស្ទិកជាដើម ដែលធ្វើពីវត្ថុធាតុដើមដូចជា ល្ពាក់ ផ្តៅ ស្លឹកត្នោត និងគាវត្នោតជាដើម។ ចំណែកទី3 សិប្បកម្មវាយនភណ្ឌអំបោះ សរសៃក្រមា ភួយនិងសរសៃសូត្រជាដើម ទី4 សិប្បកម្មផលិតឧបករណ៍តន្ត្រីបុរាណមានដូចជាស្គ តាខេ ទ្រ ភ្លេងរនាតពិណពាទ្យ ចាប៉ីដងវែងជាដើម និងទី5 សិប្បកម្មផលិតសម្ភារប្រើប្រាស់ក្នុងផ្ទះដូចជា ប្រអប់ដាក់ក្រដាស ប្រអប់ដាក់សាប៊ូ ដែលផលិតចេញជាចម្លាក់រូបអប្សរា និងរូបភាពទាក់ទាញផ្សេងទៀត ផលិតចេញពីកម្ទេចឈើតូចៗ ឬឈើដែលគេបោះចោលប្រើប្រាស់លែងកើត។
មកទល់បច្ចុប្បន្ន សមាគមសិប្បកម្មអង្គរ បានផ្តល់ការងារដល់ប្រជាពលរដ្ឋនៅតាមមូលដ្ឋាន ប្រមាណ 4,000នាក់ ពិសេសជាស្ត្រីមេផ្ទះអាចមើលថែទាំផ្ទះ មើលថែទាំកូនចៅនៅផ្ទះផង និងឆ្លៀតពេលធ្វើការងារសិប្បកម្មខាងលើនេះ ដែលភាគច្រើនពួកគាត់រស់នៅក្នុងស្រុកពួក និងស្រុកក្រឡាញ់ខេត្តសៀមរាប។ ជាមួយគ្នានេះលោកស្រីប្រធានសមាគមសិប្បកម្មអង្គរ ក៏បានសំណូមពរដល់ពលរដ្ឋខ្មែរ ឱ្យជួយគាំទ្រផលិតផលខ្មែរឱ្យកាន់តែខ្លាំងថែមទៀត ដើម្បីផ្តល់ការងារ ក៏ដូចជាផ្តល់ចំណូលដល់ពលរដ្ឋខ្មែរនៅតាមជនបទឱ្យកាន់តែប្រសើរឡើងថែមទៀត៕