បើយោងតាមការចេញផ្សាយរបស់កាសែតកីឡាប្រចាំថ្ងៃ Mundo Deportivo របស់អេស្ប៉ាញ ក្លិបយក្ស Barcelona បានឈានដល់ការព្រមព្រៀងគ្នារួចហើយក្នុងការនាំយកតារាឆ្នើម Antoine Griezmann ពីក្លិប Atletico Madrid ក្នុងពេលបើកទីផ្សារដោះដូរកីឡាករនារដូវក្តៅខាងមុខនេះ។ លោក Josep Maria Bartomeu ប្រធានក្លិប Barcelona បានជួបពិភាក្សាជាមួយនឹងក្រុមគ្រួសាររបស់ខ្សែប្រយុទ្ធ Griezmann ខណៈដែលលោកកំពុងតែត្រៀមលក្ខណៈរួចរាល់ក្នុងការចំណាយប្រាក់ទិញរំលាយកិច្ចសន្យាចំនួន100លានអឺរ៉ូ (ស្មើនឹង118លានដុល្លារអាមេរិក) របស់ Griezmann។
ការនាំយកតារាឆ្នើមអន្តរជាតិបារាំងរូបនេះទៅកាន់កីឡដ្ឋាន Camp Nou ត្រូវបានគេរំពឹងទុកថា ក្លិប Barca មានបំណងក្នុងការឲ្យរូបគេចាប់ដៃគូជាមួយនឹង Lionel Messi និង Luis Suarez ក្រោយពីការចាកចេញរបស់ Neymar ទៅកាន់ក្លិប Paris Saint-Germain កាលពីខែសីហា ក្នុងតម្លៃខ្លួនជាកំណត់ត្រាពិភពលោក222លានអឺរ៉ូ។ កាសែត Mundo Deportivo បានចេញផ្សាយថា៖ «Barca បានចាត់ទុក Griezmann ជាគោលដៅមួយសម្រាប់ឆ្នាំ2018 ហើយពួកគេបានសាកសួរពីចិត្តរបស់ Griezmann ដើម្បីឲ្យដឹងថា តើរូបគេចង់ពាក់អាវពណ៌ខៀវ លាយក្រហមឬយ៉ាងណាដែរ»។
ខណៈដែលកាសែត Mundo Deportivo បន្ថែមទៀតថា Bartomeu ទើបតែបានជួបជាមួយនឹងក្រុមគ្រួសាររបស់ Griezmann នាពេលថ្មីៗនេះ ដើម្បីពិសាអាហារជាមួយគ្នា កាសែតនោះបានបញ្ជាក់ថា៖ «លោកប្រធានក្លិបលោក Josep Maria Bartomeu បច្ចុប្បន្ន បានធ្វើដំណើរទៅបំពេញប្រតិបត្តិការនេះ »។ Griezmann វ័យ26ឆ្នាំ បានយល់ព្រមបន្តកុងត្រាថ្មីមួយជាមួយនឹងក្លិប Atletico កាលពីខែមិថុនា ក្រោយពីការប្តឹងឧទ្ធរណ៍របស់ពួកគេប្រឆាំងនឹងបម្រាមទិញចូលកីឡាករ ត្រូវបានច្រានចោល។ ប៉ុន្តែ ទោះបីជាយ៉ាងណា លោក Diego Simeone គ្រូបង្វឹករបស់ Atletico បានទទួលស្គាល់នៅសប្តាហ៍នេះថា ការចាកចេញរបស់ Griezmann មិនអាចចៀសរួចឡើយ៕
ប្រភពពី៖ Sport24