អ្នកជំនាញផ្នែកកសិកម្ម តែងនិយាយថាការផ្លាស់ប្តូរប្រភេទដំណាំដាំដុះនឹងជួយឱ្យដីមានជីជាតិបានយូរ និងធ្វើឱ្យដំណាំកសិកម្មបានផលច្រើន ហើយលើសពីនេះដំណាំប្រភេទថ្មីៗក៏តែងមានការគាំទ្រខ្លាំងនៅលើទីផ្សារផងដែរ។ ដោយមើលឃើញពីអត្ថប្រយោជន៍នៃការផ្លាស់ប្តូរប្រភេទដំណាំនេះ កសិករមួយចំនួនដែលដាំស្វាយកែវ-រមៀតនៅឃុំត្រើយស្លា ស្រុកស្អាង ខេត្តកណ្តាល បាននាំគ្នាងាកមកដាំពូជស្វាយតៃវ៉ាន់ជំនួសវិញ ព្រោះដំណាំនេះទទួលបានផលច្រើន និងមានការគាំទ្រខ្លាំងនៅលើទីផ្សារទៀតផង។
អ្នកស្រី ហ៊ីម តេងងីម ជាកសិកររស់នៅភូមិលេខ3 ឃុំត្រើយស្លា បាននិយាយថា គាត់បានចាប់ផ្តើមដាំស្វាយតៃវ៉ាន់ នេះរយៈពេល4ឆ្នាំមកហើយដោយពូជស្វាយនេះគឺទិញមកពីប្រទេសវៀតណាមក្នុងមួយដើមតម្លៃ1ម៉ឺនរៀល និងបានដាំចំនួន 400ដើមនៅលើផ្ទៃដីទទឹង 70ម៉ែត្រ និងបណ្តោយ 250ម៉ែត្រ។
អ្នកស្រីបានបន្តថា ស្វាយតៃវ៉ាន់ ងាយស្រួលដាំ និងមិនពិបាកថែទាំទេ ហើយឆាប់ផ្តល់ផលដោយចំណាយពេលត្រឹមតែ2ឆ្នាំអាចបេះផ្លែលក់បាន និងលក់បានថ្លៃជាងស្វាយកែវរមៀតទៀតផង ព្រោះវាមានរសជាតិឆ្ងាញ់ និងសាច់ស្រួយថែមទៀត។ ស្វាយតៃវ៉ាន់ នេះមាន 2ប្រភេទ គឺពូជផ្លែធំ ដោយមួយផ្លែអាចមានទម្ងន់ដល់ទៅ 1.5គីឡូក្រាម និងពូជតូចប៉ុនៗស្វាយកែវរមៀតដែរ។ សព្វថ្ងៃស្វាយតែវ៉ាន់ ធំ1គីឡូក្រាមលក់បោះដុំឱ្យម៉ូយក្នុងតម្លៃចន្លោះពី 4,000-5,000រៀល ចំណែកពូជតូចបានថ្លៃ 2,500រៀល។
កសិករដដែលបានប្រាប់ទៀតថា ការថែទាំស្វាយប្រភេទថ្មីនេះ មិនខុសពីស្វាយកែវរមៀតនោះទេ បើរដូវប្រាំង10-15ថ្ងៃបូមទឹកដាក់ម្តង ហើយចាប់ពីចេញផ្ការហូតដល់បានបេះផ្លែមានរយៈពេល3ខែ។ នៅពេលបេះអស់វានឹងចេញផ្កាម្តងទៀត និងមិនសូវត្រូវការជី ទឹក និងថ្នាំ ដូចជាស្វាយកែវរមៀតនោះទេ ដោយគ្រាន់តែឧស្សាហ៍លះមែកវាចេញខ្លះដើម្បីកុំឱ្យស៊ុបទ្រុបពេក។
ចំណែកអ្នកស្រី សេង ពុយ អ្នកលក់ផ្លែឈើនៅតាមបណ្តោយផ្លូវជាតិលេខ21 ក្នុងឃុំព្រែកគយ ស្រុកស្អាង បាននិយាយថា គាត់បានប្រកបរបរលក់ផ្លែឈើដែលទទួលពីបងប្អូនប្រជាកសិករនៅទីនេះរយៈពេលជាង 10ឆ្នាំមកហើយ។ សម្រាប់ផ្លែស្វាយតៃវ៉ាន់ ដែលគាត់ដាក់លក់ គឺទទួលទិញពីឃុំត្រើយស្លា ដោយនៅក្នុងថ្ងៃបុណ្យ ថ្ងៃសៅរ៍ ឬថ្ងៃអាទិត្យ អាចលក់បានជាមធ្យម50គីឡូក្រាមក្នុង1ថ្ងៃ។
អ្នកដំណើរម្នាក់ លោក ពេជ្រ ពន្លឺ ដែលឈប់ទិញផ្លែឈើបានប្រាប់ថា ស្វាយតៃវ៉ាន់នេះពិតជាស្រួយឆ្ងាញ់មែន ហើយនៅពេលដែលធ្វើដំណើរឆ្លងកាត់ទីនេះលោកតែងឈប់ទិញហូប និងយកទៅផ្ញើបងប្អូនមិនដែលខានឡើយ។ លោក អ៊ុន សុគន្ធ ប្រធានការិយាល័យកសិកម្ម ស្រុកស្អាង មានប្រសាសន៍ថា ស្អាងជាស្រុកមានដំណាំស្វាយសរុប153ហិកតា ដោយក្នុងនោះស្វាយតៃវ៉ាន់ មានប្រមាណ10% និងទើបត្រូវបានដាំដុះប្រមាណ4ឆ្នាំចុងក្រោយនេះប៉ុណ្ណោះ។ ស្វាយតៃវ៉ាន់ពិតជាទទួលបានទិន្នផលខ្ពស់ និងបានថ្លៃជាងស្វាយកែវរមៀត។ នេះជាសញ្ញាល្អដែលបងប្អូនប្រជាកសិករចេះសម្លឹងមើលអំពីតម្រូវការទីផ្សារដែលមានការវិវត្តជាបន្តបន្ទាប់៕
