ដើម្បីចូលរួមលើកកម្ពស់កំណើនសេដ្ឋកិច្ចកម្ពុជាក៏ដូចជាផ្តល់ការងារដល់ប្រជាពលរដ្ឋខ្មែរឱ្យបានកាន់តែច្រើន ក្រុមអ្នកវិនិយោគចិនជាច្រើន បានសហការគ្នាគ្រោងនឹងបង្កើតតំបន់ឧស្សាហកម្មបច្ចេកវិទ្យាជាន់ខ្ពស់កម្ពុជានៅពេលខាងមុខ។
តំណាងប្រតិភូមកពីបណ្ឌិតសភាវិទ្យាសាស្ត្រចិន លោកបណ្ឌិត Wang Dongsheng បានថ្លែងឱ្យដឹងក្នុងពេលធ្វើបទឧទ្ទេសនាមបង្ហាញដល់មន្ត្រីជាន់ខ្ពស់នៃក្រសួងឧស្សាហកម្ម និងសិប្បកម្ម កាលពីសប្តាហ៍កន្លងទៅថា ក្រុមហ៊ុនរបស់លោកត្រូវការផ្ទៃដីសាងសង់ប្រមាណចន្លោះពី500-600ហិកតា ដើម្បីសាងសង់តំបន់ឧស្សាហកម្មបច្ចេកវិទ្យា និងសង់រោងចក្រឱ្យបានច្រើនផ្នែកទៀត។ លោកបន្តថា ការសាងសង់តំបន់ឧស្សាហកម្មនេះធ្វើឡើងក្នុងគោលបំណងសាងសង់បណ្តុំរោងចក្រមួយចំនួនដូចជា រោងចក្រផលិតទឹកស្អាត និងឧបករណ៍បរិស្ថាន រោងចក្រផលិតអាលុយមីញ៉ូម ដែលជាធាតុផ្សំសម្រាប់ផលិតជាវត្ថុធាតុដើមបម្រើឱ្យការផលិតទឹកស្អាត សួនឧស្សាហកម្មគីមី រោងចក្រថ្នាំពេទ្យ សាលា ឬវិទ្យាស្ថានបណ្តុះបណ្តាលបច្ចេកវិទ្យាជាន់ខ្ពស់ និងសាកលវិទ្យាល័យជាដើម។
លោកប្រាប់ទៀតថា ទីតាំងដែលមានសក្តានុពលក្នុងការសាងសង់សួនឧស្សាហកម្មនេះ មិនមែនធ្វើឡើងក្នុងរាជធានីភ្នំពេញនោះទេ គឺធ្វើឡើងនៅតាមបណ្តាខេត្ត ដែលបង្កភាពងាយស្រួលដល់វិស័យដឹកជញ្ជូន ពិសេសតំបន់មាត់សមុទ្រដូចជាខេត្តកំពតជាដើម ដោយសារខេត្តនេះនៅជាប់មាត់សមុទ្រផង និងមានដីនៅសល់ទំនេរច្រើន។
ឯកឧត្តមទេសរដ្ឋមន្ត្រី ចម ប្រសិទ្ធ បានស្វាគមន៍ចំពោះគម្រោងការសាងសង់តំបន់ឧស្សាហកម្មដ៏ធំនេះ និងបាននិយាយថា ជាការប្រសើរណាស់ប្រសិនបើក្រុមហ៊ុនអាចស្វែងរកទីតាំងបាននៅខេត្តកំពត។ ជាមួយគ្នានេះឯកឧត្តមទេសរដ្ឋមន្ត្រីក៏បានផ្តល់អនុសាសន៍ដល់ប្រតិភូខាងលើថា បើសិនខ្វះទីតាំងមិនអាចរកបាននៅក្នុងខេត្តកំពត កម្ពុជាក៏នៅមានទីតាំងសក្តានុពលផ្សេងៗទៀតដែលផ្តល់ភាពងាយស្រួលដល់វិស័យដឹកជញ្ជូនដែរ ដូចជាក្នុងខេត្តកំពង់ស្ពឺ ជាពិសេសនៅខេត្តព្រះសីហនុ ដែលជាខេត្តត្រូវបានរាជរដ្ឋាភិបាលកំណត់ជាតំបន់សេដ្ឋកិច្ចពិសេសពហុបំណង ពីព្រោះទីនោះមានហេដ្ឋារចនាសម្ព័ន្ធគ្រប់គ្រាន់ មានបណ្តាញផ្លូវគោក កំពង់ផែសមុទ្រទឹកជ្រៅ ផ្លូវរថភ្លើង និងព្រលានយន្តហោះជាដើម។
គួរបញ្ជាក់ថា ដោយសារកម្ពុជាមានតម្រូវការផ្នែកវត្ថុធាតុដើមសម្រាប់ផលិតទឹកស្អាត គឺប៉ូលី-អាលុយមីញ៉ូមក្លរ៉ៃ ហៅកាត់ថា ភីអេស៊ី (PAC) ឯកឧត្តមទេសរដ្ឋមន្ត្រី ក៏បានស្នើឱ្យក្រុមហ៊ុនពិនិត្យលទ្ធភាពកសាងរោងចក្រផលិតជាតិ PAC ដែលជាសារធាតុម្យ៉ាងសម្រាប់ចាប់កករក្នុងទឹក នៅទីតាំងផ្ទៃដីរបស់រដ្ឋាករទឹកស្វយ័តរាជធានីភ្នំពេញ ស្ថិតក្នុងភូមិព្រែកតាសេកជាយរាជធានីភ្នំពេញ។
ក្រោយពីកិច្ចពិភាក្សាក្រុមហ៊ុនចិន បានបង្ហាញពីចំណាប់អារម្មណ៍ក្នុងការសាងសង់រោងចក្រនៅកម្ពុជាឱ្យបានឆាប់ ហើយថានៅដើមឆ្នាំ2018 ខាងមុខក្រុមប្រតិភូខាងលើនឹងធ្វើដំណើរមកពិនិត្យទីតាំងភូមិសាស្ត្រជាថ្មីម្តងទៀត មុននឹងសម្រេចជ្រើសរើសទីតាំងណាមួយពិតប្រាកដ ដើម្បីសាងសង់តំបន់ឧស្សាហកម្មឱ្យបានឆាប់រហ័សតាមដែលអាចធ្វើបាន៕
