ធនាគារជាតិនៃកម្ពុជា (NBC) កាលពីសប្តាហ៍មុន បានចេញសេចក្តីប្រកាសមួយដោយហាមមិនឱ្យចរាចររូបិយវត្ថុ Crypto Currencies នៅលើទីផ្សារក្នុងប្រទេសកម្ពុជាឡើយ ដើម្បីចៀសវាងកុំឱ្យមានហានិភ័យទៅដល់សាធារណជន។
ខ្លឹមសារនៃសេចក្តីជូនដំណឹងដែលបានជម្រាបទៅដល់គ្រប់គ្រឹះស្ថានធនាគារ និងហិរញ្ញវត្ថុ បានលើកឡើងថា ធនាគារជាតិនៃកម្ពុជាបានពិនិត្យឃើញថាបច្ចុប្បន្នមានការចរាចរទិញ លក់ ទូទាត់ផ្សព្វផ្សាយ រូបិយវត្ថុ Crypto (Crypto Currencies)ដូចជា BitCoin និងឧបករណ៍អេឡិចត្រូនិកប្រហាក់ប្រហែលគ្នា ដោយមិនមានច្បាប់អនុញ្ញាត និងមិនមានការទទួលស្គាល់ពីធនាគារជាតិនៃកម្ពុជា។
ការផ្សព្វផ្សាយ និងការធ្វើប្រតិបត្តិការទាំងនេះអាចបង្កហានិភ័យដល់សាធារណជន និងជាមធ្យោបាយសម្រាប់ការសម្អាតប្រាក់ ហិរញ្ញប្បទានភេរវកម្ម និងទីផ្សារងងឹត ដោយសារអ្នកប្រើប្រាស់ និងវិនិយោគិនមួយចំនួនមិនមានការយល់ដឹងពីរូបិយវត្ថុ Crypto Currencies ដែលងាយរកនូវការឆបោក។
លោកជំទាវ ជា សិរី អគ្គនាយិកាបច្ចេកទេសធនាគារជាតិនៃកម្ពុជា បានមានប្រសាសន៍នៅក្នុងសន្និសីទម៉ាក្រូសេដ្ឋកិច្ចលើកទី4 កាលពីសប្តាហ៍កន្លងមកថា ថ្មីៗនេះធនាគារជាតិនៃកម្ពុជាបានទទួលព័ត៌មានមួយចំនួនដែលថា មានការចរាចររូបិយវត្ថុ Crypto Currencies ហើយបានផ្តល់ឈ្មោះប្លែកៗគ្នា ដូចជា BitCoin បន្ទាប់មកទៀតក៏មានក្រុមហ៊ុនមួយចំនួនកំពុងតែបំផុសបំផុលឱ្យប្រជាជនទិញ។
លោកជំទាវបញ្ជាក់ថា ធនាគារជាតិនៃកម្ពុជាមិនគាំទ្ររូបិយវត្ថុ Crypto Currencies ដែលមិនមានការទទួលស្គាល់ដោយរាជរដ្ឋាភិបាលទេ ហើយបើសិនជាមានការបំផុសបំផុលឱ្យប្រើប្រាស់ណាមួយ សូមកុំជឿតាមការបំផុសបំផុលរបស់គេ ព្រោះរូបិយវត្ថុប្រភេទនេះមិនអាចប្តូរយកប្រាក់សុទ្ធនៅធនាគារជាតិនៃកម្ពុជាបានឡើយ៕
