ថ្លែងនៅក្រៅសន្និសីទម៉ាក្រូសេដ្ឋកិច្ចប្រចាំឆ្នាំលើកទី4 ស្តីពីតួនាទីរបស់បច្ចេកវិទ្យាក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជា កាលពីសប្តាហ៍កន្លងទៅ លោកជំទាវ ជា សិរី អគ្គនាយិកាបច្ចេកទេសធនាគារជាតិនៃកម្ពុជា បានប្រាប់ថា គ្រឹះស្ថានហិរញ្ញវត្ថុទាំងឡាយណាដែលផ្តល់កម្ចីហើយមិនបានគិតដល់គោលដៅអាជីវកម្មរបស់អតិថិជននោះ គឺជាទង្វើនៃការជាន់ពន្លិច។
ការជាន់ពន្លិចនៅត្រង់ថា កន្លងមកមានប្រជាពលរដ្ឋមួយចំនួនបានទៅខ្ចីប្រាក់ពីគ្រឹះស្ថានធនាគារ និងមីក្រូហិរញ្ញវត្ថុ តែបន្ទាប់ពីបានប្រាក់ហើយយកទៅធ្វើស្រែចម្ការមិនទទួលបានផល ឬយកទៅប្រើខុសគោលដៅអាជីវកម្ម ដោយមិនអាចរកប្រាក់កម្រៃសម្រាប់សងទៅគ្រឹះស្ថានធនាគារ និងមីក្រូហិរញ្ញវត្ថុវិញបាន ករណីខ្លះត្រូវបានគេរឹបអូសយកផ្ទះសម្បែង ហើយខ្លះទៀតត្រូវបង្ខំចិត្តលក់ផ្ទះ ឬដីធ្លី និងធ្វើចំណាកស្រុកដើម្បីស្វែងរកប្រាក់សងត្រឡប់ទៅធនាគារវិញ ដែលករណីនេះគឺជាការជាន់ពន្លិចជីវភាពប្រជាពលរដ្ឋតែម្តង។
លោកជំទាវអគ្គនាយិកាបច្ចេកទេសធនាគារជាតិនៃកម្ពុជា មានប្រសាសន៍ថា មន្ត្រីឥណទាននៃគ្រឹះស្ថានធនាគារ និងមីក្រូហិរញ្ញវត្ថុ ជាទូទៅតែងតែចង់ផ្តល់កម្ចីទៅដល់ប្រជាពលរដ្ឋឱ្យបានច្រើនតាមដែលអាចធ្វើបាន ដើម្បីឱ្យពួកគាត់សងត្រឡប់មកវិញជាមួយនឹងអត្រាការប្រាក់ច្រើន និងបានផលចំណេញច្រើនផងដែរទៅស្ថាប័នរបស់ខ្លួន ប៉ុន្តែបើមិនគិតពីគោលដៅនៃការប្រើកម្ចីរបស់អតិថិជនទេនោះ វានឹងបង្កហានិភ័យដល់អតិថិជនជាមិនខាន។
លោកជំទាវបញ្ជាក់ថា៖“ភ្នាក់ងារឥណទានដែលចង់ឱ្យគេខ្ចី តែបើមិនគិតពីគោលដៅប្រើប្រាស់ប្រាក់កម្ចីរបស់អតិថិជននោះ វាហាក់ដូចជាន់ពន្លិចបន្ថែមទៅវិញ ព្រោះដឹងហើយថា ការទទួលបានកម្ចីនឹងត្រូវសងទៅវិញ ហើយបើអតិថិជនគ្មានគោលដៅ ឬប្រើប្រាស់ខុសគោលដៅអាជីវកម្មមិនអាចរកប្រាក់សងធនាគារវិញបាន វានឹងបង្កឱ្យជួបហានិភ័យផ្សេងៗ ដែលជាការបង្កបញ្ហាទៅដល់សង្គមនាំឱ្យប្រជាពលរដ្ឋប្រឈមនឹងការប្តឹងផ្តល់ ឬរឹបអូសទ្រព្យបញ្ចាំជាដើម។
ជាមួយគ្នានេះ លោកជំទាវក៏បានអំពាវនាវដល់ប្រជាពលរដ្ឋដែលស្វែងរកឥណទានប្រាក់កម្ចីពីគ្រឹះស្ថានធនាគារ និងមីក្រូហិរញ្ញវត្ថុថា បើខ្ចីគ្មានគោលដៅច្បាស់លាស់គួរកុំខ្ចី ប៉ុន្តែបើខ្ចីសម្រាប់បង្កើនមុខរបរ ឬអាជីពរបស់ខ្លួនដែលបានប្រាក់ត្រឡប់មកវិញទើបធ្វើឱ្យយើងមិនជួបបញ្ហានៅលើឥណទាន។ ដើម្បីជំរុញការគ្រប់គ្រងឱ្យមានប្រសិទ្ធភាព និងមានហានិភ័យទាបចំពោះអ្នកខ្ចី គឺទាមទារឱ្យមានការអប់រំដល់ប្រជាពលរដ្ឋឱ្យបានច្រើនបន្ថែមទៀត។
លោកឧកញ៉ា ហួត អៀងតុង ប្រធានសមាគមមីក្រូហិរញ្ញវត្ថុកម្ពុជា បាននិយាយថា មុននឹងខ្ចីប្រាក់ពីធនាគារ ឬគ្រឹះស្ថានមីក្រូហិរញ្ញវត្ថុ ទៅប្រកបរបររកស៊ីផ្សេងៗ គួរមានផែនការអាជីវកម្មច្បាស់លាស់ជាមុន ហើយត្រូវរកអាជីវកម្មណាដែលមានតម្រូវការទីផ្សារ ចៀសវាងការធ្វើអាជីវកម្មខាតបង់ និងរកប្រាក់សងត្រឡប់ទៅធនាគារវិញមិនបាន។
នាពេលកន្លងមកធនាគារជាតិនៃកម្ពុជា តែងបានធ្វើយុទ្ធនាការដើម្បីផ្សព្វផ្សាយទៅដល់ប្រជា-ពលរដ្ឋឱ្យបានយល់ពីគុណសម្បត្តិ និងគុណវិបត្តិនៃការខ្ចីប្រាក់ពីធនាគារ ឬគ្រឹះស្ថានមីក្រូហិរញ្ញវត្ថុ។ បើគ្មានតម្រូវការចាំបាច់ក្នុងការធ្វើអាជីវកម្ម ឬប្រកបមុខរបរផ្សេងៗដើម្បីរកប្រាក់ចំណេញត្រឡប់មកវិញទេ គួរកុំខ្ចីខ្លាចគ្មានប្រាក់សងនាំឱ្យជួបបញ្ហាសេដ្ឋកិច្ចដល់គ្រួសារ ជាមួយគ្នានេះធនាគារជាតិក៏ត្រៀមវិធានការទប់ស្កាត់ការផ្តល់កម្ចីដល់អតិថិជន ដែលគ្មានគោលដៅអាជីវកម្មច្បាស់លាស់ផងដែរ៕