ខ្សែប្រយុទ្ធ Gareth Bale បានចូលលេងក្នុងនាមជាកីឡាករបម្រុង ដើម្បីរកគ្រាប់បាល់ឈ្នះ ខណៈដែលក្រុម Real Madrid បានសង្គ្រោះការភិតភ័យមួយដោយបានផ្តួលក្រុមម្ចាស់ផ្ទះ Al Jazira ក្នុងលទ្ធផល 2-1 និងដើម្បីឈានទៅវគ្គផ្តាច់ព្រ័ត្រនៃយុទ្ធនាការ Club World Cup ក្នុងប្រទេសអេមីរ៉ាតអារ៉ាប់រួម កាលពីថ្ងៃពុធ។
ខណៈដែលត្រូវការឈ្នះដើម្បីរក្សាក្តីសង្ឃឹមនៃការឈ្នះពានជាលើកទី5នៅឆ្នាំនេះ ក្រុម Real របស់លោក Zinedine Zidane បានធ្វើការវាយបកពីការដេញតាមពីក្រោយដើម្បីផ្តួលក្រុម Al Jazira ក្នុងទីក្រុង Abu Dhabi ដើម្បីឈានទៅជួបក្រុមជើងខ្លាំង Gremio របស់ប្រេស៊ីល ក្នុងវគ្គផ្តាច់ព្រ័ត្រ នៅថ្ងៃសៅរ៍ខាងមុខនេះ។ Al Jazira ដែលបានឈានទៅកាន់យុទ្ធនាការនេះក្នុងនាមជាក្រុមម្ចាស់ផ្ទះ ក្រោយពីបានឈ្នះពានក្របខ័ណ្ឌ UAE Pro-League របស់អេមីរ៉ាតអារ៉ាប់រួម កាលពីរដូវកាលមុននោះ បានរកគ្រាប់បាល់នាំមុខដ៏មិននឹកស្មានដល់នៅពាក់កណ្តាលតង់ទី1 បើទោះបីក្រុម Real Madrid មានភាគរយគ្រប់គ្រងបាល់ច្រើនជាង និងមានឱកាសស៊ុតបាល់សំដៅទីដល់ទៅ17លើកក៏ដោយ។ ខ្សែប្រយុទ្ធប្រេស៊ីល Romarinho បានដណ្តើមយកប្រៀបពីការប្រព្រឹត្តកំហុសរបស់ខ្សែការពារ Casemiro ដើម្បីរកគ្រាប់បាល់បញ្ចូលទីនៅជិតបញ្ចប់ការប្រកួត នាកីឡដ្ឋាន Zayed Sports City។ ប៉ុន្តែ សម្ពាធផ្សេងៗរបស់ក្រុម Real បានបញ្ចប់នៅនាទីទី10នៃតង់ទី2 នៅពេលដែលខ្សែប្រយុទ្ធ Cristiano Ronaldo បានរកគ្រាប់បាល់តាមស្មើវិញ នៅមុនពេល Bale បានទម្លុះតំបន់ការពារដ៏រឹងមាំរបស់ក្រុម Al Jazira តាមរយៈការស៊ុតបាល់បញ្ចូលទីយ៉ាងល្អនៅរយៈពេល8នាទីចុងក្រោយមុនចប់ការប្រកួត៕
ប្រភពពី៖ The Guardian
