ភ្នំពេញ៖ នៅព្រឹកថ្ងៃទី 14 ខែធ្នូនេះ ប្រជាពលរដ្ឋដែលបានធ្វើដំណើរឆ្លងកាត់រង្វង់មូលកាំកូ ហាក់មានអារម្មណ៍ប្លែក ដោយសារតែរង្វង់មូលត្រូវបានរំលាយចោល និងជំនួសមកវិញនូវភ្លើងស្ដុប ដែលចំណាត់ការនេះ ត្រូវបានរដ្ឋបាលរាជធានីភ្នំពេញ បញ្ជាក់ថាធ្វើឡើងដើម្បីសម្រួលដល់ការធ្វើដំណើរ និងកាត់បន្ថយការកកស្ទះចរាចរណ៍។
កាលពីពាក់កណ្ដាលខែតុលាកន្លងទៅនេះ រដ្ឋបាលរាជធានីភ្នំពេញ បានសម្រេចលុបចោលរង្វង់មូលកាំកូ និងដាក់ជំនួសមកវិញដោយការដំឡើងភ្លើងស្ដុប។ ជាមួយគ្នានឹងការប្រកាសលុបរង្វង់មូលកាំកូនេះ រដ្ឋបាលរាជធានីភ្នំពេញក៏បានបង្ហាញនូវរបៀបធ្វើចរាចរណ៍នៅពេលដាក់អោយដំណើរការភ្លើងស្តុបថ្មីផងដែរ។
គួរបញ្ជាក់ផងដែរថា អាជ្ញាធររាជធានីភ្នំពេញ កាលពីពេលកន្លងទៅក៏បានលុបចោលរង្វង់មូលទួលគោក ដាក់ជំនួសវិញដោយភ្លើងស្តុបផងដែរ។ ចំណាត់ការនេះ បានចូលរួមចំណែកយ៉ាងខ្លាំងក្នុងការកាត់បន្ថយការកកស្ទះចរាចរណ៍នៅទីតាំងនោះ និងទទួលបានការសារទយ៉ាងខ្លាំងពីប្រជាពលរដ្ឋ៕
