ប្រទេសកម្ពុជាមានកំណើនសេដ្ឋកិច្ចក្នុងអត្រាជាមធ្យម 7.6% ចាប់ពីឆ្នាំ 1994 ដល់ឆ្នាំ2015 ហើយបានក្លាយជាប្រទេសដែលមានប្រាក់ចំណូលមធ្យមកម្រិតទាបក្នុងឆ្នាំ2015 និងកំណើនសេដ្ឋកិច្ចបានធ្លាក់មកនៅត្រឹម 6.9%នៅឆ្នាំ2017 នេះ។ កំណើននេះត្រូវបានជំរុញដោយការនាំចេញទំនិញ និងសេវាកម្ម (ភាគច្រើនសម្លៀកបំពាក់ និងទេសចរណ៍) ដែលកើនឡើងជាមធ្យម19.6%ក្នុងមួយឆ្នាំ។ នេះបើយោងតាមរបាយការណ៍របស់ធនាគារពិភពលោក។
របាយការណ៍បង្ហាញថា វិស័យឧស្សាហកម្ម និងសេវាកម្ម ត្រូវបានបង្កើតឡើងក្នុងរយៈពេល 2 ទសវត្សរ៍កន្លងមកនេះ ដោយបានផ្តល់ការងារជូនប្រជាពលរដ្ឋប្រមាណ 3.6លានកន្លែង ដែលជាផ្នែកមួយជួយដល់សេដ្ឋកិច្ចកម្ពុជា។ កំណើនសេដ្ឋកិច្ចបានជួយឱ្យប្រជាពលរដ្ឋដែលរស់នៅក្រោមបន្ទាត់នៃភាពក្រីក្រធ្លាក់ចុះពី 47.8% ក្នុងឆ្នាំ2007 មកនៅត្រឹម 13.5% ក្នុងឆ្នាំ2014។
ក្នុងឋាន:ជាប្រទេសដែលមានប្រាក់ចំណូលមធ្យមកម្រិតទាប កម្ពុជាក៏កំពុងប្រឈមនឹងបញ្ហាថ្មីៗមួយចំនួនក្នុងការរក្សាកំណើនសេដ្ឋកិច្ចដ៏រឹងមាំរបស់ខ្លួនផងដែរ ក្នុងនោះដំណើរឆ្ពោះទៅមុខរបស់កម្ពុជា ត្រូវគេមើលឃើញថា ទំនងជាមិនអាចពឹងផ្អែកទៅលើកត្តាដដែលៗក្នុងការជំរុញឱ្យមានការរីកចម្រើនខ្លាំងក្លា និងកាត់បន្ថយភាពក្រីក្រក្នុងរយៈពេលពីរទសវត្សរ៍កន្លងមកនោះទេ។
កំណើនសេដ្ឋកិច្ចជោគជ័យរបស់ប្រទេសកម្ពុជាត្រូវបានរំពឹងថា នឹងធ្វើឱ្យថយចុះជាបណ្ដើរៗនូវភាពអនុគ្រោះផ្នែកពាណិជ្ជកម្ម និងការផ្តល់ហិរញ្ញប្បទានពីសំណាក់ម្ចាស់ជំនួយនានា។ ទំនិញកសិផលមានតម្លៃទាប រួមជាមួយនឹងការដំឡើងប្រាក់ខែ នឹងតម្រូវឱ្យមានការបង្កើនផលិតភាពដើម្បីរក្សាភាពប្រកួតប្រជែង។
ឧបសគ្គក្នុងបរិយាកាសធុរកិច្ច (ធ្វើអាជីវកម្ម) បង្កជាបញ្ហាប្រឈមមួយចំពោះភាពរឹង និងកំណើនសេដ្ឋកិច្ចជាតិ។ លទ្ធផលនៃការរៀនសូត្រមិនល្អ និងកង្វះអាហារូបត្ថម្ភ នៅតែបន្តគម្រាមកំហែងដល់អនាគតនៃប្រជាជនខ្មែរ។ អត្រាបញ្ចប់ការសិក្សានៅអនុវិទ្យាល័យ (43% ក្នុងឆ្នាំ 2013) នៅមានកម្រិតទាបជាខ្លាំងបើធៀបទៅនឹងមធ្យមភាគសម្រាប់ប្រទេសដែលមានចំណូលមធ្យមកម្រិតទាប(71%) ចំណែក39% នៃសិស្សថ្នាក់ទី 6មានសមត្ថភាពទាបជាងកម្រិតមូលដ្ឋានក្នុងការអានភាសាខ្មែរ និងមួយភាគបីនៃកុមារអាយុក្រោម5ឆ្នាំជាកុមារក្រិន។ ហានិភ័យដែលបង្កឡើងដោយការរេចរិលធនធានធម្មជាតិ អាចប៉ះពាល់ដល់និរន្តរភាពសេដ្ឋកិច្ច។
ការប៉ាន់ប្រមាណជាផ្លូវការបង្ហាញថា គម្របព្រៃឈើបានធ្លាក់ចុះពីជិត60% ក្នុងឆ្នាំ2006 មកនៅត្រឹមចំនួនតិចជាង 47% ក្នុងឆ្នាំ2014។ អ្នកជំនាញបានធ្វើការវិនិច្ឆ័យស្ថានភាពប្រទេសដែលមានលក្ខណៈជាប្រព័ន្ធបានកំណត់ “គន្លង” ឬវិធីសាស្ត្រសម្រាប់ការរក្សាបាននូវកំណើនរឹងមាំ និងមាននិរន្តរភាពជាមួយនឹងការកាត់បន្ថយភាពក្រីក្រ ការបង្កើនភាពប្រកួតប្រជែង និងពិពិធកម្មផ្នែកសេដ្ឋកិច្ចដើម្បីធានាបាននូវកំណើនខ្ពស់ និងបង្កើតការងារ។ ការកាត់បន្ថយចំណាយនៃការបង្កើតនិងដំណើរការអាជីវកម្ម និងការជំរុញវិនិយោគសាធារណៈ និងឯកជន គឺជាគន្លឹះនៃការបន្តការប្រកួតប្រជែងដែលបំពេញបន្ថែមដោយការពង្រឹងភាពរឹងមាំនៃវិស័យហិរញ្ញវត្ថុ និងការគ្រប់គ្រងម៉ាក្រូសេដ្ឋកិច្ចទាំងមូល។
ការវិនិយោគលើជំនាញ ដើម្បីសម្រួលដល់វិបុលភាពជារួមអាចធ្វើបានតាមរយ:ការលើកកម្ពស់ការទទួលស្គាល់យន្តការធានាគុណភាពនៅកម្រិតមធ្យមសិក្សា និងឧត្តមសិក្សាក៏ដូចជាការបណ្តុះបណ្តាលបច្ចេកទេស / វិជ្ជាជីវៈ៕
