អ៊ុន អាលីហ្សា បិទបាំងមុខស្នេហានៅថ្ងៃខួបកំណើតខ្លួន

នៅថ្ងៃទី13 ខែធ្នូ ឆ្នាំ2017 នេះ តារាសម្តែង និងជាមន្ត្រីនគរបាល កញ្ញា អ៊ុន អាលីហ្សា បានបង្ហោះរូបភាពជាច្រើនសន្លឹក ដែលបង្ហាញពីក្ដីរំភើបសប្បាយរីករាយនៅក្នុងថ្ងៃខួបកំណើតរបស់នាង ព្រមទាំងបញ្ចេញសារផ្អែមល្ហែមនៅលើបណ្ដាញសង្គមហ្វេសប៊ុកឱ្យមហាជនបានភ្ញាក់ផ្អើលទៀតផង។

នៅថ្ងៃម្សិលមិញទី12 ខែធ្នូ ឆ្នាំ2017 គឺជាថ្ងៃខួបកំណើតរបស់កញ្ញា អ៊ុន អាលីហ្សា និងអ្វីដែលធ្វើឱ្យនាងរំភើបចិត្តបំផុតនោះគឺ បុរសជាគូស្នេហារបស់នាងបានរៀបចំកម្មវិធីភ្ញាក់ផ្អើលមួយសម្រាប់នាង ហើយតារាស្រីរូបនេះបានបញ្ជាក់ថា «Thanks you honey សម្រាប់យប់នេះ អូនពិតជារំភើបណាស់ ទោះជាយើងនៅឆ្ងាយពីគ្នាក៏ដោយ ក៏បេះដូងយើងនៅជិតគ្នារហូត អូនស្រឡាញ់បង»។ មានមតិមហាជនជាច្រើនបានលាន់មាត់ថា ហេតុអ្វីបានជាអ៊ុន អាលីហ្សា ចាំបាច់បិទបាំងមិនបង្ហាញមុខគូស្នេហ៍ធ្វើអ្វី បើមើលទៅផ្អែមល្ហែម និងរស់នៅជាមួយគ្នាទៅហើយនោះ?។

គួរបញ្ជាក់ផងដែរថា ប្រភពដែលសារព័ត៌មានឡារ៉ែនទទួលបានក៏បញ្ជាក់ឱ្យដឹងដែរថា «អ៊ុន អាលីហ្សា មានទំនាក់ទំនងស្នេហាជាមួយបុរសអ្នកជំនួញម្នាក់នោះជាយូរណាស់មកហើយ ហើយចាស់ទុំក៏បានដឹងឮដែរ»។ ប្រភពដដែលបានបន្តថា «នាងនៅលាក់បាំងមុខគូស្នេហ៍ ព្រោះតែនាងមិនទាន់មានគម្រោងរៀបការច្បាស់លាស់ ដូច្នេះហើយនាងសុំលាក់មុខអនាគតស្វាមីនេះសិន»៕