តាមរយៈសារព័ត៌មាន Koreaboo បានចេញផ្សាយនៅថ្ងៃទី4 ខែធ្នូ ឆ្នាំ2017 មុននេះបន្ដិច បានឱ្យដឹងថា នៅពេលថ្មីៗនេះ នៅលើបណ្ដាញទំនាក់ទំនងសង្គមអ៊ីស្ដាក្រាមរបស់បវរកញ្ញាកូរ៉េ កញ្ញា Cho Se Whee បានរំឭករឿងរបស់បវរកញ្ញា Ghana គឺកញ្ញា Ruth Quarshie ដែលធ្លាប់បាននិយាយគ្នាជាសម្ងាត់កាលពីនៅទីក្រុង Las Vegas ក្នុងអំឡុងពេលប្រកួតបវរកញ្ញាចក្រវាឡ Miss Universe 2017 នៅសហរដ្ឋអាមេរិក។
ការបង្ហោះសាររបស់បវរកញ្ញាកូរ៉េបានឱ្យដឹងថា «កញ្ញា Ruth Quarshie នាងបានសួរខ្ញុំប្រហែលជា 80 ដងហើយថា តើនៅពេលណាដែលនាងបានលេខទូរស័ព្ទ និងអាស័យដ្ឋានរបស់លោក Goo JoonPyo ( Lee Min Ho) ខណៈដែលតារាប្រុសរូបនេះ បានចែកផ្លូវគ្នាជាមួយនឹងគូស្នេហ៍ហើយ»។ នៅពេលនេះកញ្ញា Cho Se Whee បានតបទៅវិញថា « ខ្ញុំមិនបានដឹងទាល់តែសោះថា គាត់ ( Lee Min Ho) មានមិត្តស្រី ប្រសិនបើអ្នកណាបានដឹង សូមប្រាប់ខ្ញុំផង… (រួចក៏សើច)»។
ទន្ទឹមនឹងនោះ បវរកញ្ញាកូរ៉េរូបនេះក៏បានបញ្ជាក់ផងដែរថា នៅក្នុងអំឡុងពេលប្រកួតនោះ នាងមានភាពស្និទ្ធស្នាលជាងគេជាមួយកញ្ញា Ruth Quarshie ហើយក៏ទទួលបានបទពិសោធ និងទំនាក់ទំនងល្អពីគ្នាទៅវិញទៅមកផងដែរ៕
