ភ្នំពេញ – មិនដល់មួយខែទៀតទេ ប្រជាពលរដ្ឋ និងភ្ញៀវទេសចរជាតិ-អន្តរជាតិនឹងបានចូលទស្សនាពិធីបុណ្យសមុទ្រជុំទី2 លើកទី6 នៅខេត្តកែបជាមួយព្រឹត្តិការណ៍កម្សាន្ត និងពិព័រណ៍ផលិតផលដ៏ច្រើនសម្បូរបែបនៅទីនោះ។
កាលពីពេលថ្មីៗនេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការបានដាក់អនុសាសន៍ជំរុញឲ្យគ្រប់ភាគីពាក់ព័ន្ធពន្លឿនកិច្ចការនានាដែលពាក់ព័ន្ធនឹងពិធីបុណ្យសមុទ្រឱ្យបានចប់រួចរាល់មុនថ្ងៃទី1 ខែធ្នូ ឆ្នាំ2017។
ឯកឧត្តមរដ្ឋមន្ត្រីបានបន្តជំរុញ និងបន្តដាក់ចេញនូវផែនការមួយចំនួនសំដៅពន្លឿនការរៀបចំពិធីបុណ្យសមុទ្រឆ្នាំ2017 ដែលក្នុងនោះរួមមាន៖
1- អាជ្ញាធរខេត្តត្រូវពន្លឿនការរៀបចំកែលម្អសោភ័ណភាពទីក្រុងកែបឱ្យបានស្អាត រៀបចំបង្គន់អនាម័យសាធារណៈ បង្គន់ចល័តឱ្យបានគ្រប់គ្រាន់ និងត្រូវសម្អាតអនាម័យជាប្រចាំ។ ត្រូវជំរុញរៀបចំហេដ្ឋារចនាសម្ព័ន្ធនានានៅក្នុងខេត្តឱ្យបានហើយរួចរាល់ទាន់ពេលវេលាសម្រាប់រៀបចំពិធីបុណ្យសមុទ្រឆ្នាំ2017។
2- ចុះអប់រំបណ្តុះបណ្តាល និងពង្រឹងគុណភាពសេវាកម្មទេសចរណ៍នានា និងបញ្ហាអនាម័យដល់អាជីវករ និងប្រជាពលរដ្ឋ ដើម្បីបម្រើទេសចរជាតិ និងអន្តរជាតិក្នុងឱកាសពិធីបុណ្យសមុទ្រឆ្នាំ2017 ឱ្យបានពេញចិត្ត ពិសេសសេវាម្ហូបអាហារ និងកន្លែងស្នាក់នៅ។ ដើម្បីលុបបំបាត់ការបោះក្រដាសជូតដៃចោលក្រោមតុ គ្រប់ភោជនីយដ្ឋានទាំងអស់ត្រូវបំបាត់ និងបញ្ឈប់មិនឱ្យមានការប្រើប្រាស់ក្រដាសជូតមាត់ទៀតឡើយ គប្បីប្រើកន្សែងត្រជាក់ជំនួសវិញ។
3- ត្រូវខិតខំបំផុស និងណែនាំប្រជាពលរដ្ឋក្នុងខេត្តឱ្យរៀបចំ និងតុបតែងគេហដ្ឋានរបស់ខ្លួនឱ្យបានស្អាត សម្រាប់ជួលឱ្យភ្ញៀវជាតិ និងអន្តរជាតិដែលមកចូលរួមពិធីបុណ្យសមុទ្រឆ្នាំ2017 ស្នាក់នៅ សំដៅទាញប្រាក់ចំណូលបន្ថែមជូនប្រជាពលរដ្ឋផ្ទាល់។
4- ត្រូវរៀបចំអភិវឌ្ឍផលិតផលទេសចរណ៍ថ្មីៗឱ្យបានច្រើន ដើម្បីបម្រើ និងទាក់ទាញទេសចរជាតិ និងអន្តរជាតិមកចូលរួមក្នុងពិធីបុណ្យសមុទ្រឆ្នាំ2017 ឱ្យបានច្រើនកុះករ។
5- ត្រូវរៀបចំទស្សនីយភាពសិល្បៈ ការតាំងពិព័រណ៍ផលិតផលទេសចរណ៍ ពាណិជ្ជកម្ម សកម្មភាពកីឡា ការបោះតង់ និងកម្មវិធីសម្អាតឆ្នេរឱ្យបានល្អ និងអញ្ជើញបណ្តាខេត្តជាប់សមុទ្រទាំង4 និងខេត្តជាសម្ព័ន្ធមិត្តចូលរួមសម្តែងផងដែរ។ ចំពោះកម្មវិធីកីឡានេះទៀតសោត ត្រូវរៀបចំប្រភេទកីឡាលើទឹក និងលើឆ្នេរឱ្យបានច្រើន ដូចជា ទូកក្តោង ម៉ូតូទឹក និងបាល់ទះឆ្នរខ្សាច់ ជាដើម និងត្រូវរៀបចំព្យុហយាត្រាឱ្យបានល្អ។
6- ត្រូវខិតខំយកចិត្តទុកដាក់ការពារ និងរក្សាសន្តិសុខសុវត្ថិភាព និងសណ្តាប់ធ្នាប់ឱ្យបានល្អប្រសើរក្នុងឱកាសពីធីបុណ្យសមុទ្រ ឆ្នាំ2017។ ត្រៀមរថយន្តសង្គ្រោះ ត្រៀមស្ដង់ពេទ្យប្រចាំការ និងត្រៀមអ្នកសង្គ្រោះបឋមឱ្យបានគ្រប់គ្រាន់ ដើម្បីត្រៀមជួយសង្គ្រោះជនរងគ្រោះដោយប្រការណាមួយក្នុងឱកាសពិធីបុណ្យសមុទ្រនេះ។
7- ជំរុញការផ្សព្វផ្សាយអំពីបុណ្យសមុទ្រឱ្យបានទូលំទូលាយ តាមរយៈប្រព័ន្ធផ្សព្វផ្សាយសាធារណៈ និងឯកជន មានទូរទស្សន៍ ព័ត៌មានអនឡាញ វិទ្យុ ស្លាកសញ្ញាតាមដងផ្លូវ ស្លាកស្ទិកឃ័របីតនៅតាមផ្ទះសំណាក់ និងសណ្ឋាគារជាដើម។
8- ឯកឧត្តមរដ្ឋមន្ត្រីនឹងណែនាំឱ្យមន្ទីរទេសចរណ៍ខេត្តកែប ចុះត្រួតពិនិត្យតាមផ្ទះសំណាក់ សណ្ឋាគារ រមណីយដ្ឋានទេសចរណ៍ជាដើម ប្រសិនបើកន្លែងណាគ្មានអាជ្ញាប័ណ្ណទេសចរណ៍ ត្រូវជំរុញឱ្យថៅកែ ឬប្រធានគ្រប់គ្រងមកសុំអាជ្ញាប័ណ្ណឱ្យបានត្រឹមត្រូវតាមច្បាប់។
ឯកឧត្តមរដ្ឋមន្ត្រីបានឱ្យដឹងថា មន្ទីរ-អង្គភាព និងភាគីពាក់ព័ន្ធត្រូវពន្លឿនការរៀបចំរមណីយដ្ឋានទេសចរណ៍នានា កែលម្អសោភ័ណភាពនៅតាមដងផ្លូវ និងក្នុងទីធ្លារសាធារណៈនានា ចំណែកសហគមន៍ទេសចរណ៍ក៏ត្រូវត្រៀមលក្ខណៈឱ្យបានទាន់ពេលវេលា ដើម្បីទទួលទេសចរឱ្យបានល្អផងដែរ។ តាមរយៈការរៀបចំពីធីបុណ្យសមុទ្រនេះ លោករដ្ឋមន្ត្រីចង់ជំរុញឱ្យខេត្តកែបក្លាយជាខេត្តគំរូក្នុងការធ្វើឱ្យទីក្រុងមានភាពស្អាត និងបៃតង ស្របតាមស្ដង់ដារអាស៊ាន ដើម្បីរួមចំណែកទាក់ទាញភ្ញៀវទេសចរជាតិ ទេសចរក្នុងតំបន់ ក៏ដូចជាទេសចរនៅជុំវិញពិភពលោកផងដែរ។
គួរបញ្ជាក់ថា ពិធីបុណ្យសមុទ្រត្រូវបានប្រារព្ធឡើងចំនួន5លើករួចមកហើយ ហើយការប្រារព្ធឡើងជាថ្មីនៅខេត្តកែបនេះ នឹងធ្វើឡើងរយៈពេល3ថ្ងៃ ចាប់ពីថ្ងៃទី22-23-24 ខែធ្នូ ឆ្នាំ2017 ក្រោមប្រធានបទ «ឆ្នេរសមុទ្របៃតង៖ «បច្ចុប្បន្ន គឺអនាគតនិរន្តរភាពទេសចរណ៍ ដើម្បីការអភិវឌ្ឍ»។ កាលពីឆ្នាំ2016 ដែលបានរៀបចំឡើងនៅខេត្តព្រះសីហនុ មានភ្ញៀវទេសចរជាតិ-អន្តរជាតិចូលរួមកម្សាន្ត និងទស្សនាប្រមាណជាជាង50ម៉ឺននាក់៕
