Nokia 9 ស្មាតហ្វូនដែលស៊េរីថ្មីចុងក្រោយបន្តទៀតរបស់ Nokia ដែលមនុស្សជាច្រើនកំពុងទន្ទឹងរង់ចាំនោះ ថ្មីៗបំផុតនេះមានសកម្មភាពចេញមកឱ្យបានឃើញខ្លះៗហើយ ដោយលើកនេះគឺជារូបភាពមួយទៀតដែលបែកធ្លាយចេញមកឱ្យយើង បានឃើញយ៉ាងច្បាស់ៗតែម្ដង។
រូបភាពដែលទាំងអស់គ្នាបានឃើញនេះ តាមរយៈប្រភពព័ត៌មាននៅក្នុងប្រទេសចិនបានបង្ហើបឱ្យឃើញពីឌីហ្សាញតួគ្រឿងទាំងខាងមុខ និងខាងក្រោយរបស់ Nokia 9 យ៉ាងច្បាស់។ ផ្នែកខាងមុខ បង្ហាញឱ្យឃើញពីអេក្រង់គែមកោង គ្មានប៊ូតុង Home ចំណែកខាងក្រោយចេញមកព្រមជាមួយកាមេរ៉ាបញ្ឈរមួយគូ លេនស៍ Carl Zeissព្រមជាមួយភ្លើងហ្វ្លាស់ LED និងមានសេនស៊ើរស្គែនខ្ចៅម្រាមដៃ ឯតួគ្រឿងត្រូវបានគេសន្និដ្ឋានថា ជាលោហៈភ្ជាប់កញ្ចក់។
ចំណែកលក្ខណៈសម្បត្តិវិញ គេរំពឹងថា Nokia 9 នឹងចេញមកព្រមជាមួយអេក្រង់បង្ហាញទិន្នន័យប្រភេទ OLED។ ប្រើប្រភពថាមពល Snapdragon 835 64-bit octa-core RAM6GB និងអាចមានស៊េរីខ្ពស់បំផុត 8GB ចេញមកជាមួយទៀតផង និងនៅមានគុណសម្បត្តិការពារធូលីដីតាមស្តង់ដារ IP68។ ចំណែកឯការបង្ហាញខ្លួន និងដាក់លក់ជាផ្លូវការ គេរំពឹងថា នឹងស្ថិតក្នុងអំឡុងចុងឆ្នាំនេះ ឯតម្លៃក៏ស្ថិតក្នុងរង្វង់ 879 ដុល្លារអាមេរិក៕
