ភ្នំពេញ៖ លោក Machele Clara អ្នកជំនាញមកពីអង្គការអភិវឌ្ឍន៍ឧស្សាហកម្មសហប្រជាជាតិ (UNIDO) បានជ្រើសយកប្រទេសកម្ពុជាធ្វើជាប្រទេសគំរូមួយនៅក្នុងតំបន់អាស៊ី លើការពង្រឹងការអភិវឌ្ឍវិស័យឧស្សាហកម្មកម្ពុជាប្រកបដោយចីរភាព។
ការយកប្រទេសកម្ពុជាធ្វើជាគំរូនៅក្នុងចំណោមប្រទេសនានានៅអាស៊ី គឺកម្ពុជាមានការអភិវឌ្ឍវិស័យឧស្សាហកម្មប្រកបដោយចីរភាពដែលធ្វើឡើងតាមរយៈការពង្រឹងនូវយន្តការមួយចំនួនដូចជា៖ គណនាឱ្យឃើញនូវតម្លៃខ្សែចង្វាក់ផលិតកម្ម ជំរុញប្រសិទ្ធភាពនៃតំបន់សេដ្ឋកិច្ចពិសេស ការកាត់បន្ថយបែបបទរដ្ឋបាលស្មុគស្មាញ កិច្ចសម្រួលពាណិជ្ជកម្ម ការទាក់ទាញការវិនិយោគដោយផ្ទាល់ពីបរទេស ការបណ្តុះបណ្តាលជំនាញ វិជ្ជាជីវៈនិងប្រសិទ្ធភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មជាដើម។
លោក Machele Clara បានលើកឡើងថា ការចាត់ទុកជាប្រទេសគំរូនេះ គឺកម្ពុជាទទួលបានជំនួយពីដៃគូអភិវឌ្ឍន៍ និងម្ចាស់ជំនួយមួយចំនួនជាពិសេសពីប្រទេសកូរ៉េក្នុងការអនុវត្តភាពជាដៃគូដែលមានជំនាញផ្នែកអភិវឌ្ឍន៏សួនឧស្សាហកម្ម និងសហគ្រាសធុនតូច និងមធ្យម។ លោកបានបញ្ជាក់បន្ថែមទៀតថា«អង្គការUNIDOនឹងខិតខំសហការធ្វើយ៉ាងណាជួយពង្រឹងសមត្ថភាពស្ថាប័ន ធនធានមនុស្ស ជាពិសេសសិក្សា និងកសាងគោលនយោបាយ និងយុទ្ធសាស្ត្រអភិវឌ្ឍន៍ឧស្សាហកម្មប្រកបដោយចីរភាព»។
ជាមួយគ្នានេះ ឯកឧត្តមទេសរដ្ឋមន្ត្រី ចម ប្រសិទ្ធ បានគាំទ្រ និងវាយតម្លៃខ្ពស់ចំពោះអង្គការ UNIDO ដែលសប្តាហ៍កន្លងទៅនេះបានមករៀបចំសិក្ខាសាលាមួយស្តីអំពីក្របខ័ណ្ឌកម្មវិធីភាពជាដៃគូប្រចាំប្រទេស (PCP) សម្រាប់ការស្វែងយល់នូវអ្វីជាឱកាស និងភាពប្រឈមនៃការអភិវឌ្ឍវិស័យឧស្សាហកម្មនៅកម្ពុជា ព្រមទាំងប្រសិទ្ធភាពនៃការទទួល និងប្រើប្រាស់ជំនួយអន្តរជាតិ ។
ឯកឧត្តមទេសរដ្ឋមន្ត្រី ចម ប្រសិទ្ធ ក៏បានស្នើឱ្យតំណាងអង្គការ UNIDO គិតគូរលើការកសាងផែនការមេក្នុងការអភិវឌ្ឍតំបន់សេដ្ឋកិច្ចពិសេសសំដៅលើការធ្វើពិពិធកម្មឧស្សាហកម្ម។ ជាពិសេសគឺការទាក់ទាញការវិនិយោគឱ្យចំគោលដៅ ជាប្រភេទឧស្សាហកម្មដែលមានចរិតជា យុទ្ធសាស្ត្រដូចជា៖ វិស័យអេឡិចត្រូនិក-គ្រឿងយន្តជាដើម…។ ទាក់ទងនឹងជំនួយមូលនិធិគាំទ្រពីភាគីកូរ៉េ កម្ពុជារំពឹងសង្ឃឹមថានឹងទទួលបាននូវបទពិសោធចំណេះដឹង និងការផ្ទេរបច្ចេកវិទ្យាពីភាគីកូរ៉េក្នុងការចូលរួមការអភិវឌ្ឍវិស័យឧស្សាហកម្មនៅកម្ពុជាឱ្យមានការរីកចម្រើនទៅមុខជាលំដាប់៕
