ដើម្បីទទួលបានបទពិសោធ និងបច្ចេកវិទ្យាថ្មីក្នុងការគ្រប់គ្រងផ្លូវថ្នល់ ចៀសវាងពីការរិះគន់ដែលថា ធ្វើហើយធ្វើទៀត ធ្វើមិនចេះចប់ និងធ្វើខាងមុខ ខូចខាងក្រោយនោះ ក្រសួងសាធារណការ និងដឹកជញ្ជូនកម្ពុជាបានចុះហត្ថលេខាជាមួយវិទ្យាស្ថាន KICT របស់កូរ៉េក្នុងគោលបំណងសហការគ្នាគ្រប់គ្រងថែទាំផ្លូវថ្នល់ និងបង្កើតនូវការស្រាវជ្រាវ និងកម្មវិធីសហប្រតិបត្តិការរួមគ្នា។
ពិធីចុះអនុស្សរណៈយោគយល់គ្នាធ្វើឡើងនៅទីស្តីការក្រសួងក្រោមអធិបតីភាពឯកឧត្តម សួង ហេង រដ្ឋមន្ត្រីស្តីទីជាមួយលោកបណ្ឌិត Pyeong Jun Yoo តំណាងវិទ្យាស្ថានកូរ៉េក្នុងគោលបំណងបង្កើតការស្រាវជ្រាវ និងកម្មវិធីសហប្រតិបត្តិការរួមគ្នាដើម្បីដឹកនាំការស្រាវជ្រាវវិទ្យាសាស្ត្ររួម និងការអនុវត្តកម្មវិធីសាកល្បង ការប្រឹក្សាបច្ចេកទេស ការផ្លាស់ប្តូរព័ត៌មាន និងបទពិសោធតាមរយៈកិច្ចប្រជុំបច្ចេកទេសរួម និងសិក្ខាសាលាហើយក៏ជាផ្នែកមួយនៃការបង្កើនកិច្ចសហប្រតិបត្តិការរវាងវិស័យសាធារណៈ និងវិស័យឯកជនរវាងព្រះរាជាណាចក្រកម្ពុជា និងសាធារណរដ្ឋកូរ៉េ។
ឯកឧត្តមរដ្ឋមន្ត្រីស្តីទី សួង ហេង បានគូសបញ្ជាក់ថា កំណើនសេដ្ឋកិច្ចរបស់កម្ពុជាភាគច្រើនពឹងផ្អែកលើហេដ្ឋារចនាសម្ព័ន្ធដឹកជញ្ជូនគួរឱ្យទុកចិត្តបានរួមមាន ផ្លូវថ្នល់ និងស្ពាន ផ្លូវដែក និងការដឹកជញ្ជូនផ្លូវអាកាស និងផ្លូវទឹក។ រាជរដ្ឋាភិបាលកម្ពុជាបានដើរតួនាទីយ៉ាងសំខាន់ក្នុងការអភិវឌ្ឍហេដ្ឋារចនាសម្ព័ន្ធនៅកម្ពុជា រួមទាំងការធ្វើឱ្យប្រសើរឡើងនូវការតភ្ជាប់បណ្តាញផ្លូវថ្នល់នៅកម្ពុជា។ ដើម្បីទទួលបានភាពជោគជ័យនូវគោលនយោបាយរបស់រដ្ឋាភិបាលខាងលើ តម្រូវឱ្យមានធនធានមនុស្សប្រកបដោយវិជ្ជាជីវៈ និងជំនាញ។
ឯកឧត្តមរដ្ឋមន្ត្រីស្តីទីបានសម្តែងនូវការគាំទ្រយ៉ាងមុតមាំរបស់ខ្លួនចំពោះកិច្ចសហប្រតិបត្តិការរវាងស្ថាប័នទាំងពីរ និងរំពឹងថា ការអនុវត្តអនុស្សរណៈនេះមានប្រសិទ្ធភាពសម្រាប់អត្ថប្រយោជន៍នៃប្រទេសទាំងពីរ។
ចំណែកភាគីតំណាងវិទ្យាស្ថានកូរ៉េ លោកបណ្ឌិត Pyeong Jun Yoo បានថ្លែងដោយគូសបញ្ជាក់ដែរថា តាមរយៈអនុស្សរណៈយោគយល់គ្នានេះ គឺដើម្បីបង្កើតក៏ដូចជាការចែករំលែកចំណេះដឹង និងជំនាញដល់គ្នាទៅវិញទៅមក ធ្វើយ៉ាងណាឱ្យវិស័យហេដ្ឋារចនាសម្ព័ន្ធប្រទេសទាំងពីរកាន់តែមានភាពល្អប្រសើរឡើងជាមួយគ្នា។
យ៉ាងណាក៏ដោយតាមរយៈអនុស្សរណៈយោគយល់គ្នានេះ ភាគីកម្ពុជារំពឹងថា នឹងទទួលបានបទពិសោធ និងចំណេះដឹងថ្មីៗពីដៃគូប្រទេសកូរ៉េក្នុងការគ្រប់គ្រងផ្លូវថ្នល់ឱ្យកាន់តែប្រសើរឡើង ដោយសារវិស័យហេដ្ឋារចនាសម្ព័ន្ធកូរ៉េកាន់ត្រូវបានគេមើលឃើញថា មានភាពល្អប្រសើរខ្លាំងជាងកម្ពុជា៕
