ភ្នំពេញ៖ ស្របពេលដែលពលករចំណាកស្រុកកម្ពុជាត្រូវបានគេដឹងថា បានទទួលរងការធ្វើទុក្ខបុកម្នេញជាបន្តបន្ទាប់ពីអាជ្ញាធរក៏ដូចជាថៅកែបរទេស ជាពិសេសប្រទេសថៃ និងពលករធ្វើការងារតាមផ្ទះនៅម៉ាឡេស៊ី និងប្រទេសចិនផងដែរនោះ រហូតមកទល់ពេលនេះមេដឹកនាំនៃប្រទេសអាស៊ានទាំង10បានឯកភាពចុះកិច្ចព្រមព្រៀងការពារសិទ្ធិពលករសម្រាប់គ្នាទៅវិញទៅមក។
នៅមុនពេលបញ្ចប់កិច្ចប្រជុំកំពូលអាស៊ានលើកទី31 នៅឯទីក្រុងម៉ានីល ប្រទេសហ្វីលីពីន កាលពីម្សិលមិញនេះ មេដឹកនាំប្រទេសនីមួយៗបានជជែកពិភាក្សាផ្លាស់ប្តូរយោបល់គ្នាដើម្បីរកផលប្រយោជន៍រួមទាំងក្នុងកម្រិតតំបន់ និងក្នុងកម្រិតពិភពលោកទាំងមូលផងដែរ ពិសេសឈានដល់ការចុះកិច្ចព្រមព្រៀងក្នុងការការពារសិទ្ធិពលករចំណាកស្រុករបស់ខ្លួន។
ប្រមុខដឹកនាំប្រទេសអាស៊ានទាំង10 រួមមានប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម បានឯកភាពគ្នាចុះហត្ថលេខាលើកិច្ចព្រមព្រៀងការពារពលករចំណាកស្រុក (Agreement on the Protection of Migrant Workers’ Rights.) ហើយរបាយការណ៍អំពីការអនុវត្តកាតព្វកិច្ចនេះនឹងត្រូវបានធ្វើជារបាយការណ៍បន្តទៀតនៅឯកិច្ចប្រជុំកំពូលអាស៊ានសម្រាប់ឆ្នាំ2018 នៅប្រទេសសិង្ហបុរី។
យោងតាមរបាយការណ៍របស់ធនាគារពិភពលោកចេញផ្សាយកាលពីខែតុលា ឆ្នាំ2017នេះ បង្ហាញថា កម្ពុជាគឺជាប្រទេសមួយដែលបញ្ជូនពលករចេញទៅក្រៅប្រទេសច្រើនជាងគេក្នុងចំណោមប្រទេសបញ្ជូនពលករចំណាកស្រុកទៅក្រៅប្រទេសទាំងអស់។ ពលករចំណាកស្រុកទាំងនោះ ភាគច្រើនស្ថិតក្រោមរូបភាពជាពលករដែលមានជំនាញទាប និងច្រើនតែគ្មានឯកសារត្រឹមត្រូវ និងស្វែងរកការងារដែលមានប្រាក់ខែខ្ពស់នៅក្នុងវិស័យសំណង់ ដាំដុះ និងបម្រើការងារតាមផ្ទះ។ ប្រទេសក្នុងតំបន់អាស៊ីអាគ្នេយ៍ចំនួន3 គឺ ម៉ាឡេស៊ី សិង្ហបុរី និងថៃ បានក្លាយទៅជាទីកន្លែងសម្រាប់ពលករចំណាកស្រុកនៅក្នុងតំបន់ចំនួន 6 លាន 5 សែននាក់ ឬស្មើនឹង 96ភាគរយនៃចំនួនសរុប។
ជាមួយគ្នានេះធនាគារពិភពលោកក៏បានផ្តល់ជាយោបល់សម្រាប់ជាដំណោះស្រាយថា បណ្តាប្រទេសបញ្ជូនពលករចំណាកស្រុកដែលរួមមានកម្ពុជាផងដែរនោះ គួរធ្វើយ៉ាងណាឱ្យមានតុល្យភាពនៃការការពារចំពោះពលករចំណាកស្រុករបស់ខ្លួនជាមួយនឹងតម្រូវការនៃការអភិវឌ្ឍសេដ្ឋកិច្ច។ សម្រាប់ប្រទេសកម្ពុជាដែលត្រូវបានធនាគារពិភពលោកចាត់ចូលជាប្រទេសដែលមានសមត្ថភាពទាប គួរបន្តពិចារណាធ្វើយ៉ាងណាជួយឱ្យពួកគេមានជំនាញគ្រប់គ្រាន់ និងការពារសិទ្ធិពួកគេឱ្យបានពេញលេញ៕