ក្នុងនាមជាអាហារបែបបស្ចិមប្រទេស សាឡាដ គឺជាប្រភេទអាហារដែលត្រូវបានគេពេញនិយមខ្លាំងបំផុត ជាពិសេស ចំពោះអ្នកដែលប្រាថ្នាមិនចង់ឡើងទម្ងន់ ឬចង់សម្រក់ទម្ងន់ ដើម្បីរក្សារាង ដ្បិតវាមានកម្រិតកាឡូរីទាបបំផុត និងគ្មានជាតិខ្លាញ់។ ដោយឡែកពេលនេះ សាឡាដ កាន់តែមានភាពទាក់ទាញពីសំណាក់អ្នកទទួលទានប្រចាំនៅក្នុងភោជនីយដ្ឋាន Cowboy ជាខ្លាំង ខណៈដែលអ្នកជំនាញផ្នែកម្ហូបអាហារបានយកសាច់ខ្យងស្កាឡប់មកបន្ថែមពីលើ ដើម្បីបង្កើនរសជាតិឱ្យកាន់តែឆ្ងាញ់ទ្វេដង។
គ្រឿងផ្សំ
• សាច់ខ្យងស្កាឡប់
• សាឡាដគ្រប់មុខ
• ទឹកសស់ប៉ោមជូរ
• ម្សៅស៊ុបខ្នរ
• ប៉េងប៉ោះ (ផ្លែប៉េងប៉ោះតូច)
• អំបិល
• ការ៉ុត
• ម្រេច
វិធីធ្វើ
អ្វីដែលត្រូវធ្វើមុនគេនោះគឺ រៀបចំបន្លែ ដែលមានការ៉ុត (ឈូសជាសរសៃ) ប៉េងប៉ោះតូច និងសាឡាដគ្រប់មុខដាក់នៅលើចាន រួចទុកមួយអន្លើ។ យកសាច់ខ្យងស្កាឡប់ច្របល់ជាមួយគ្រឿងផ្សំ ដូចជា អំបិល ម្រេច និងម្សៅស៊ុបខ្នរ ហើយបន្តយកទៅចៀនឱ្យឆ្អិនល្មម ដោយប្រើកម្ដៅភ្លើងតិចៗ (កុំឱ្យឆ្អិនពេក) រួចដោតជាមួយចង្កាក់ស្រួច ដាក់ពីលើសាឡាដដែលបានរៀបចំរួចជាស្រេច ហើយជាចុងក្រោយ យកទឹកសស់ប៉ោមជូរ ស្រោចពីលើជាការស្រេច។ចំពោះអាហារនេះ មានប្រយោជន៍ចំពោះអ្នកប្រាថ្នាមិនចង់ឡើងទម្ងន់៕
