នៅពេលរៀបអាពាហ៍ពិពាហ៍រួច សម្រស់របស់កូនក្រមុំដែលស្រស់ស្អាតដូចទេពធីតា នឹងត្រូវបានបំផ្លាញ់ ជាពិសេសសក់របស់អ្នកតែម្តង។ ដោយសារការធ្វើម៉ូដសក់របស់កូនក្រមុំ ដែលផ្លាស់ប្ដូរម៉ូដសក់ជាច្រើនម៉ូដ ហើយម៉ូដសក់នីមួយៗ ត្រូវតម្រូវទៅតាមឈុតសម្លៀកបំពាក់ ដែលសមស្របទៅតាមកម្មវិធីនីមួយៗ មានទៅតាមទំនៀមទម្លាប់ប្រពៃណីបុរាណខ្មែរយើង។ ភ្នួង ឬជាងផាត់មុខធ្វើសក់នៅក្នុងកម្មវិធីមង្គលការ តែងតែណែនាំម៉ូដសក់ដែលសមនឹងទម្រង់មុខ និងម៉ូដសក់ដែលងាយផ្លាស់ប្ដូរស្ទាយល៍ ពេលវេលាមួយថ្ងៃនៅក្នុងកម្មវិធីមង្គលការ គឺពិតជាខ្លីខ្លាំងណាស់ អ្នកមិនមានពេលគ្រប់គ្រាន់ក្នុងការថែរក្សាសក់មិនឱ្យខូចនោះទេ ដូច្នេះបន្ទាប់ពីរៀបអាពាហ៍ពិពាហ៍រួច អ្នកត្រូវធ្វើការថែរក្សាសុខភាពសក់របស់អ្នកឱ្យបានល្អឡើងវិញតាមវិធីសាស្រ្តដូចខាងក្រោមនេះ។
ដើម្បីឱ្យម៉ូដសក់ស្អាត ជាងធ្វើសក់បានប្រើថ្នាំបាញ់ឱ្យសក់រឹង ឬភាសាបរទេសហៅថា Spray(ស្ព្រៃយ៍) ក្នុងការជួយឱ្យសក់រឹងជាប់ម៉ូដបានក្នុងរយៈពេលយូរ ហើយនៅក្នុងថ្ងៃមង្គលការ គឺជាងបានប្រើបាញ់សក់កូនក្រមុំច្រើនខ្លាំងណាស់ដែលធ្វើឱ្យសក់របស់អ្នកត្រូវរងនូវការខូចខាតជាខ្លាំង ពីព្រោះមិនត្រឹមតែបាញ់ស្ព្រៃយ៍ច្រើននោះទេ គឺត្រូវរងនូវកម្ដៅរបស់ម៉ាស៊ីនកៀបសក់ទៀតផង ដោយមិនមានពេលវេលាថែរក្សាសក់ លាងជម្រះសក់នឹងសាប៊ូកម្ចាត់សារធាតុស្ព្រៃយ៍នោះឡើយ ដែលជាមូលហេតុមួយបណ្ដាលឱ្យសក់របស់កូនក្រមុំត្រូវរឹងខូច និងមិនមានសុខ-ភាពល្អនោះទេ។ តែកុំព្រួយបារម្ភអី ថ្ងៃនេះ ទស្សនាវដ្តី ឡារ៉ែនបានពាំនាំនូវវិធីសាស្ត្រព្យាបាលឱ្យសក់ស្រស់ស្អាត ភ្លឺរលោងឡើងវិញ ក្រោយពីថ្ងៃរៀបមង្គលការបានបញ្ចប់ ដោយវិធីបែបធម្មជាតិ ហើយចំណាយថវិកាអស់តិចថែមទៀតផង។ ខាងក្រោមនេះគឺជាវត្ថុធាតុផ្សំ និងវិធីធ្វើសាប៊ូកក់សក់តាមបែបធម្មជាតិសម្រាប់កូនក្រមុំថ្មោងថ្មី៖
វត្ថុធាតុផ្សំ
– ស៊ុតមាន់ 1គ្រាប់
– ក្រូចឆ្មារ 1ផ្លែ
របៀបធ្វើសាប៊ូកក់សក់
1. ដំបូងអ្នកត្រូវគោះស៊ុតមាន់ដាក់ចូលក្នុងចាន ហើយច្របាច់ក្រូចឆ្មារយកទឹក រួចចាក់ចូលទៅក្នុងចានស៊ុតមាន់តែមួយ។
2. បន្ទាប់មកយកស្លាបព្រាបាយវាយបំបែកស៊ុតមាន់ និងកូរទឹកក្រូចឆ្មារលាយច្របល់ចូលគ្នាឱ្យសព្វក្លាយជាល្បាយតែមួយ។
3. រួចសឹមយកល្បាយដែលផ្សំហើយនេះមកកក់សក់របស់អ្នកឱ្យសព្វសរសៃសក់ ហើយផ្អាប់ទុករយៈពេល15-20នាទី។
4. ត្រូវធ្វើម៉ាស្សាសរសៃសក់របស់អ្នកថ្នមៗ ដោយច្បូតសក់ពីគល់់រហូតដល់ចុងសរសៃសក់។
5. ជាចុងក្រោយនេះ អ្នកត្រូវលាងសម្អាតសក់ជាមួយទឹកស្អាតជាមុនសិន រួចរាល់ហើយ សូមកក់សក់ជាមួយសាប៊ូ និងក្រែកបន្ទន់សក់តាមធម្មតាជាការស្រេច។
6. ចូរអនុវត្តបែបនេះឱ្យបាន2ដងក្នុងមួយថ្ងៃ នោះអ្នកនាងនឹងសង្កេតឃើញថា សរសៃសក់ដែលរឹងគ្មានសំណើមរបស់អ្នកបានប្រែមកមានជីវិតរស់រវើកដូចដើម ព្រមទាំងមានសភាពទន់ និងភ្លឺរលោងថែមទៀតផង៕