លោក Giampiero Ventura អ្នកចាត់ការទូទៅរបស់ក្រុមបាល់ទាត់ជម្រើសជាតិអ៊ីតាលី បានបញ្ជាក់ថា ក្រុមរបស់លោកត្រូវតែ «បង្ហាញពីទម្រង់លេងដ៏អស្ចារ្យ» មួយ ក្នុងការប្រកួតជើងទី2នៃវគ្គ Playoff របស់ពួកគេជាមួយនឹងក្រុមជម្រើសជាតិស៊ុយអែត ប្រសិនបើពួកគេចង់គេចផុតពីការធ្លាក់ចេញពីយុទ្ធនាការ World Cup ជាលើកទី1ចាប់តាំងពីឆ្នាំ1958 មក។
ក្រុមជម្រើសជាតិស៊ុយអែត បានទទួលជ័យជម្នះក្នុងការប្រកួតជើងទី1 ក្នុងលទ្ធផល 1-០ នាកីឡដ្ឋាន Friends Arena កាលពីថ្ងៃសុក្រ ខណៈដែលគ្រាប់បាល់តែ1គ្រាប់នោះបានកើតឡើង នៅពេលដែលកីឡាករ Jakob Johansson បានស៊ុតបាល់បំប៉ោងសំណាញ់ទីពីចម្ងាយប្រមាណជា18ម៉ែត្រ។ ក្រុមជម្រើសជាតិស៊ុយអែត បានលេងយ៉ាងល្អក្នុងតង់ទី1 ស្របពេលដែលអ៊ីតាលី លេងបានល្អឡើងវិញក្នុងតង់ទី2 តែពួកគេនៅតែជួបការខកចិត្ត។ ខ្សែការពារ Matteo Darmian បានស្ថិតយ៉ាងប្រកៀកក្នុងការរកគ្រាប់បាល់តាមស្មើវិញ ប៉ុន្តែការព្យាយាមស៊ុតបាល់របស់គេបែរជាទៅប៉ះនឹងបង្គោលទីទៅវិញ។ ក្រុមជម្រើសជាតិអ៊ីតាលី ដែលនឹងលេងដោយគ្មានខ្សែបម្រើឆ្នើម Marco Verratti នោះ នឹងត្រូវតែដណ្តើមយកជ័យជម្នះក្នុងការប្រកួតជើងទី2 នាកីឡដ្ឋាន San Siro ឱ្យបាន ដើម្បីឈានទៅយុទ្ធនាការ World Cup ក្នុងប្រទេសរុស្ស៊ី។ លោក Ventura បាននិយាយថា៖ «លទ្ធផលនេះដូចជាការដាក់ទណ្ឌកម្មមួយដែរ។ ខ្ញុំសង្ឃឹមថា នៅទីក្រុង Milan មន្ត្រីរៀបចំការប្រកួតនឹងផ្តល់ឲ្យនូវការកាត់សេចក្តីយ៉ាងល្អក្នុងការប្រកួត»។
គ្រូបង្វឹករូបនេះបានបន្ថែមទៀតថា៖ «ក្នុងការប្រកួតដ៏សំខាន់បែបនេះ យើងចង់បានការបង្ហាញពីទម្រង់លេងដ៏ល្អមួយ។ ប៉ុន្តែពេលនេះ រឿងដែលសំខាន់នោះគឺការដណ្តើមឲ្យបានលទ្ធផលល្អមួយជាមុនសិន។ យើងត្រូវតែផ្លាស់ប្តូររាល់អ្វីៗទាំងអស់ក្នុងពេលប្រកួតនៅទីក្រុង Milan។ កីឡដ្ឋាន San Siro ត្រូវតែផ្តល់នូវការមានប្រៀបដល់យើងផងដែរ ប៉ុន្តែ វាអាស្រ័យទៅលើយើងក្នុងការផ្តល់នូវការបង្ហាញពីទម្រង់លេងដ៏អស្ចារ្យមួយសម្រាប់អ្នកគាំទ្ររបស់យើង»៕
ប្រភពពី៖ BBC
