ភ្នំពេញ៖ បន្ទាប់ពីបានផ្លាស់ប្តូរការងារពីរដ្ឋមន្ត្រីក្រសួងពាណិជ្ជកម្ម មកជារដ្ឋមន្ត្រីក្រសួងសាធារណការវិញ មួយរយៈចុងក្រោយនេះគេសង្កេតឃើញមានសមិទ្ធផលធំៗគួរឱ្យកត់សម្គាល់មួយចំនួនបានកើតឡើងសម្រាប់ការអភិវឌ្ឍប្រទេសជាតិ ពិសេសគឺការធ្វើកំណែទម្រង់ដាក់ QR Code នៅលើស្លាកលេខរថយន្ត និងម៉ូតូ ដែលមានមុនគេសម្រាប់ប្រទេសក្នុងតំបន់អាស៊ី។
ក្នុងពិធីធ្វើបឋកថាបង្ហាញទៅដល់មន្ត្រីរាជការ សាស្ត្រាចារ្យ និស្សិតជាច្រើនរយនាក់ និងព្រះសង្ឃជាច្រើនរយអង្គកាលពីម្សិលមិញនេះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានធ្វើបច្ចុប្បន្នភាពអំពីសមិទ្ធផលការងារដែលសម្រេចបានសំខាន់ៗទាក់ទងនឹងផែនការសកម្មភាព100ថ្ងៃ និងកំណែទម្រង់ដែលកំពុងបន្តធ្វើរបស់ក្រសួងសាធារណការ និងដឹកជញ្ជូន។
សមិទ្ធផលការងារសម្រេចបានទាំងនោះរួមមាន៖ ការដាក់ឱ្យដំណើរការមណ្ឌលប្តូរ និងពន្យារប័ណ្ណបើកបរនៅផ្សារទំនើប AEON Mall ភ្នំពេញ ដោយចំណាយពេលត្រឹមតែ15នាទី ដើម្បីទទួលបានប័ណ្ណបើកបរ ការបិទស្លាកសុវត្ថិភាពស្ទីគ័រចំណាំងប្លាតពន្លឺពេលយប់ចំនួន3.4លានសន្លឹក យុទ្ធនាការចែកមួកសុវត្ថិភាព ការរៀបចំរចនាសម្ព័ន្ធអង្គការលេខរបស់ក្រសួងឡើងវិញដើម្បីបំពេញការងារឱ្យកាន់តែមានប្រសិទ្ធភាព ការដាក់ឱ្យដំណើរការចុះបញ្ជីយានយន្តតាមប្រព័ន្ធស្វ័យប្រវត្តិកម្មការផ្តល់ប័ណ្ណបើកបរយានយន្ត កម្មវិធីយល់ដឹងអំពីទ្រឹស្តីនៃការបើកលើទូរស័ព្ទឈៀកចល័ត និងស្លាកលេខយានយន្តដែលមាន QR Code ដើម្បីកាត់បន្ថយការក្លែងបន្លំ។
ឯកឧត្តមទេសរដ្ឋមន្ត្រីក៏បានលើកឡើងផងដែរអំពីការសាងសង់ផ្លូវរថភ្លើងពីភ្នំពេញទៅព្រលានយន្តហោះដើម្បីកាត់បន្ថយការកកស្ទះចរាចរណ៍ដែលគ្រោងដាក់ឱ្យដំណើរក្នុងពេលឆាប់ៗ ការដឹកជញ្ជូនអ្នកដំណើរតាមផ្លូវទឹកពីភ្នំពេញទៅខេត្តកណ្តាល ការរៀបចំក្របខ័ណ្ឌស្ថាប័នទទួលបន្ទុកភ័ស្តុភារកម្មដើម្បីកាត់បន្ថយថ្លៃដឹកជញ្ជូន ការធ្វើសមាហរណកម្មទូទាំងប្រទេសតាមរយៈការកសាង និងពង្រីកបណ្តាញផ្លូវតភ្ជាប់ ការកសាងផ្លូវរថភ្លើង ការគ្រប់គ្រងការដឹកជញ្ជូនលើសទម្ងន់កំណត់ ការកសាងកំពង់ផែទឹកជ្រៅ ការលុបជង្ហុកសម្បុកមាន់លើផ្លូវនៅទូទាំង 25រាជធានី-ខេត្ត តាមរយៈការដាក់ឱ្យដំណើរការរ៉ឺម៉កដែលបំពាក់ដោយឧបករណ៍ចំនួនជាង300គ្រឿង និងសម្ភារគ្រប់គ្រាន់សម្រាប់ចល័តចុះពិនិត្យ និងជួសជុលជង្ហុកសម្បុកមាន់ភ្លាមៗក្នុងគោលបំណងថែរក្សាបណ្តាញផ្លូវថ្នល់របស់យើងឱ្យជាប់បានយូរ។
ឯកឧត្តមទេសរដ្ឋមន្ត្រី ស៊ុន ចាន់ថុល បានកត់សម្គាល់អំពីសារៈសំខាន់នៃការអនុវត្តច្បាប់ដើម្បីប្រជាជាតិកាន់តែមានសុវត្ថិភាព និងវិបុលភាពថែមទៀត និងបានលើកទឹកចិត្តឱ្យសិក្ខាកាមទាំងអស់ចូលរួមឱ្យបានសស្រាក់សស្រាំក្នុងការអនុវត្តច្បាប់ចរាចរណ៍ផ្លូវគោក ដើម្បីជួយកាត់បន្ថយគ្រោះថ្នាក់ចរាចរណ៍ និងការកកស្ទះចរាចរណ៍នៅកម្ពុជា៕