មុននឹងធ្វើទឹកល្មុតដើម្បីទទួលទាន អ្នកត្រូវដឹងពីគុណប្រយោជន៍នៃផ្លែល្មុតជាមុនសិន ហើយនៅពេលនេះ ឡារ៉ែន បានដកស្រង់នូវអត្ថបទដ៏ល្អ និងមានអត្ថប្រយោជន៍សម្រាប់ប្រិយមិត្តអ្នកអានទាំងឡាយ ឱ្យបានជ្រាបអំពីគុណប្រយោជន៍របស់ទឹកល្មុត ក្នុងការការពារជំងឺមហារីកពោះវៀនដូចតទៅ។
ផ្លែល្មុត ជាប្រភេទផ្លែឈើដែលមានគុណប្រយោជន៍ការពារជំងឺមហារីកពោះវៀន ហើយម្យ៉ាងទៀត វាថែមទាំងធ្វើឱ្យអ្នកទទួលទានមានអារម្មណ៍ថាផ្អែមឆ្ងាញ់ជាប់មាត់ថែមទៀតផង។ ប្រសិនបើអ្នកទទួលទានផ្លែល្មុតជាប្រចាំ និងជួយឱ្យប្រព័ន្ធរំលាយអាហាដំណើរការបានល្អជាធម្មតា ទើបវាមិនបណ្ដាលឱ្យមានផលប៉ះពាល់ ឬហុចផលអាក្រក់ដល់ពោះវៀនរបស់អ្នក ក៏ប៉ុន្ដែ វាអាចការពាររោគជំងឺមហារីកពោះវៀនបានយ៉ាងល្អប្រសើរ ដោយសារតែផ្លែល្មុតមានកាកសរសៃអាហារដែលមានបរិមាណច្រើន។
ការសិក្សាស្រាវជ្រាវមួយបានរកឃើញថា នៅក្នុងផ្លែល្មុត សម្បូរទៅដោយស្ករ Fructose និងមានកាកសរសៃអាហារក្នុងបរិមាណច្រើនគួរសម ដែលហុចផលល្អដល់ប្រព័ន្ធរំលាយអាហាររបស់អ្នក។ ក្រៅពីនេះ ផ្លែល្មុត នៅមានសារធាតុជាច្រើនទៀតដូចជា វីតាមីន A, វីតាមីន C, ផូស្វ័រ និងកាល់ស្យូមផងដែរ។ នៅពេលបានជ្រាបពីគុណប្រយោជន៍របស់ផ្លែល្មុត ដូច្នេះអ្នកគួរតែធ្វើទឹកល្មុតជាមួយនឹងគ្រឿងផ្សំដូចខាងក្រោមនេះទាំងអស់គ្នា។
គ្រឿងផ្សំក្នុងការធ្វើទឹកល្មុត
• សាច់ល្មុត 1 កែវ
• ទឹកបរិសុទ្ធ 1 កែវ
• អំបិល 1/4 ស្លាបព្រាកាហ្វេ
• ទឹកកក 1 កែវ
វិធីធ្វើ
• ត្រៀមគ្រឿងនីមួយៗឱ្យគ្រប់តាមចំនួនដែលបានរៀបរាប់ខាងលើ។
• យកផ្លែល្មុតទៅចិតសម្បក ហើយយកគ្រាប់ចេញ គឺយកតែសាច់ល្មុតតែប៉ុណ្ណោះ បន្ទាប់មកចាក់ចូលក្នុងម៉ាស៊ីនទឹកក្រឡុក។
• បន្ថែមអំបិល ទឹកបរិសុទ្ធ និងទឹកកកចូលទៅក្នុងម៉ាសីុនក្រឡុក។
• រួចចាប់ផ្ដើមក្រឡុក ឱ្យគ្រឿងផ្សំទាំងអស់ម៉ដ្ឋ និងរលាយចូលគ្នា។
• បន្ទាប់មកចាក់ទឹកល្មុតនោះដាក់ក្នុងកែវ ដោយអ្នកអាចទទួលទានបែបត្រជាក់ៗ ដើម្បីកាត់បន្ថយអាការក្រហាយពោះបានភ្លាមៗតែម្តង៕
