ភ្នំពេញ – ដោយសង្កេតឃើញថា តម្រូវការលំនៅឋានរបស់ប្រជាពលរដ្ឋនៅក្នុងរាជធានីភ្នំពេញកាន់តែមានកំណើន គម្រោងលំនៅឋានតម្លៃសមរម្យថ្មីមួយទៀតនឹងបើកការដ្ឋានសាងសង់នៅថ្ងៃទី8 ខែវិច្ឆិកាខាងមុខនេះដោយក្រុមហ៊ុនអភិវឌ្ឍន៍ ARAKAWA។
បើយោងតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ឯកឧត្ដមទេសរដ្ឋមន្ដ្រី ជា សុផារ៉ា នឹងចូលរួមក្នុងពិធីបើកការដ្ឋានលំនៅឋានតម្លៃសមរម្យរបស់ក្រុមហ៊ុន ARAKAWA ដែលអភិវឌ្ឍនៅក្នុងភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
លំនៅឋានតម្លៃសមរម្យនោះត្រូវបានអភិវឌ្ឍលើផ្ទៃដីទំហំ13,680ម៉ែត្រក្រឡាដែលត្រូវសាងសង់ជាពីរដំណាក់កាលដោយដំណាក់កាលដំបូងក្រុមហ៊ុនត្រូវសាងសង់អគារស្នាក់នៅរួមចំនួន10អគារចែកជា5ប្លុក ដោយមួយប្លុកមានពីរអគារ និងមានកម្ពស់19ជាន់ទៅ23ជាន់ និងមានបន្ទប់ប្រមាណជា2,000 បន្ទប់ និងគ្រោងចំណាយទុនវិនិយោគប្រមាណ70លានដុល្លារ។
គួរបញ្ជាក់ថា គម្រោងលំនៅឋានតម្លៃសមរម្យ របស់ក្រុមហ៊ុន Arakawa នេះ ជាគម្រោងទី3ដែលធ្វើការអភិវឌ្ឍ ខណៈគម្រោងទី1ត្រូវបានអភិវឌ្ឍដោយក្រុមហ៊ុនរបស់លោកឧកញ៉ាសៀ ឫទ្ធី នៅខាងត្បូងរាជធានីភ្នំពេញ និងគម្រោងទី2 អភិវឌ្ឍដោយក្រុមហ៊ុនលោកឧកញ៉ាប៊ុន ចេស នៅភាគខាងជើងនៃរាជធានី៕
