ខ្សែប្រយុទ្ធ Erling Haaland (ក្លឹប Man City) បានក្លាយជាកំពូលថ្វីជើងដែលប្រកួតនៅអង់គ្លេសឆ្នើមបំផុតក្នុងមួយរដូវកាល បន្ទាប់ពីបានស៊ុតបញ្ចូលទីរបស់ Bayern Munich។
កីឡាករន័រវែស កើតឆ្នាំ 2000 Haaland រកបានគ្រាប់បាល់នៅក្នុងជ័យជម្នះ 3-0 របស់ Man City ទៅលើ Bayern Munich ក្នុងវគ្គ ¼ នៃជើងទីពីរនៅពានរង្វាន់ជើងឯកបណ្ដាក្លឹបនៅអឺរ៉ុប (UEFA Champions League) 2022-2023។ នៅនាទីទី 76 បន្ទាប់ពីការតែតបញ្ជូនបាល់របស់ Stones កីឡាករ Haaland ក៏ទទួលបានបាល់ ហើយស៊ុតបញ្ចូលទីបានជោគជ័យ ជួយឱ្យ Man City ឈ្នះ 3-0។
នេះគឺជាគ្រាប់បាល់ទី 45 ដែល Haaland រកបាននៅគ្រប់ការប្រកួតក្នុងរដូវកាល 2022-2023 នាំឱ្យជើងខ្លាំងរូបនេះក្លាយជាកីឡាករឆ្នើមជាងគេបង្អស់ក្នុងមួយរដូវកាល។
នៅមុន Haaland ខ្សែប្រយុទ្ធមួយចំនួន មានដូចជា Mohamed Salah (Liverpool ក្នុងរដូវកាល 2017-2018) និង Ruud van Nisterooy (Man United ក្នុងរដូវកាល 2002-2003) រកបាន 44 គ្រាប់នៅក្នុងការប្រកួត ពេលលេងឱ្យបណ្ដាក្លឹបនៅអង់គ្លេស។ ក្រៅពីនេះ Cristiano Ronaldo (Man United រដូវកាល 2007-2007) ក៏ធ្លាប់រកបាន 42 គ្រាប់ ក្រោយទាត់បាន 46 ប្រកួតដោយមិនលេងក្នុងខ្សែប្រយុទ្ធ។
ក្នុងចំណោម 45 គ្រាប់ដែលអតីតខ្សែប្រយុទ្ធរបស់ Dortmund រកបាន មាន 30 គ្រាប់នៅឯពានរង្វាន់លីគកំពូលអង់គ្លេស, 11 គ្រាប់នៅឯ UEFA Champions League, 3 គ្រាប់នៅឯ FA Cup និង 1 គ្រាប់នៅ League Cup។ Erling Haaland កំពុងនាំមុខគេនៅក្នុងបញ្ជីចំណាត់ថ្នាក់កីឡាករស៊ុតបញ្ចូលទីបានច្រើនជាងគេ ទាំងនៅក្នុងលីគកំពូលអង់គ្លេស ទាំងនៅ UEFA Champions League។
45 គ្រាប់នេះត្រូវបាន Haaland រកបាននៅក្នុង 39 ប្រកួត ហើយគាត់នៅសល់យ៉ាងតិច 10 ប្រកួតទៀតដែលអាចបង្កើនចំនួនគ្រាប់បាល់ឈ្នះរបស់ខ្លួន។
ក្លឹប Man City របស់ Haaland បច្ចុប្បន្ននៅមានឱកាសក្នុងការដណ្ដើមបានតំណែងជើងឯកនៅលីគកំពូលអង់គ្លេស, UEFA Champions League និង FA Cup៕
