បើទោះជាបច្ចុប្បន្នមានការលើកឡើងថា សកម្មភាពនៃការទិញ លក់អចលនទ្រព្យនៅកម្ពុជា ហាក់មានភាពស្ងប់ស្ងាត់បន្តិចដោយសារតែការបោះឆ្នោតជិតឈានចូលមកដល់នោះ ក៏សកម្មភាពនៃការទិញ លក់ និងតម្លៃអចលនទ្រព្យនៅក្នុងក្រុងបាត់ដំបងមិនមានអ្វីជាបញ្ហាចោតនោះទេ។
បុគ្គលិកជាន់ខ្ពស់នៃក្រុមហ៊ុន ឃី រៀលអ៊ីស្ទេត ប្រចាំខេត្ដបាត់ដំបង លោក សៀក នារតី បាននិយាយថា ស្ថានភាពអចលនទ្រព្យនៅក្រុងបាត់ដំបង ពេលនេះគឺមានភាពល្អប្រសើរជាធម្មតា នេះមានន័យថា តម្លៃ និងសកម្មភាពនៃការទិញ លក់ គឺនៅធម្មតាដដែល ដែលស្ថានភាពបែបនេះមានតាំងពីឆ្នាំមុនមកម្ល៉េះ។ លោក បន្ដទៀតថា ទោះជាការបោះឆ្នោតថ្នាក់ជាតិនៅកម្ពុជា ជិតឈានចូលមកដល់ក៏ដោយ ក៏ស្ថានភាពនៃការទិញ លក់អចលនទ្រព្យនៅក្នុងខេត្តបាត់ដំបង មិនមានការថមថយនោះទេ។
បច្ចុប្បន្នដីធ្លីក្នុងក្រុងបាត់ដំបង ម្ដុំផ្សារណាត់ និងផ្សារថ្មី មួយម៉ែត្រការ៉េមានតម្លៃចន្លោះពី1,000-1,500ដុល្លារ រីឯនៅតំបន់ក្រវាត់ក្រុង អាចមានតម្លៃក្នុងរង្វង់ពី250-600ដុល្លារ។ លោក នារតី បានប្រាប់ឱ្យដឹងទៀតថា មូលហេតុដែលធ្វើឱ្យតម្លៃដីធ្លីនៅក្រុងបាត់ដំបងអាចរក្សាបានភាពរឹងមាំនោះ គឺដោយសារតែមានកត្តាធំៗចំនួន2 គឺទី1 កត្តាប្រជាជន និងអ្នករកស៊ីក្នុងវិស័យនេះនៅតែមានជំនឿលើស្ថិរភាពនយោបាយ និងកំណើនសេដ្ឋកិច្ចកម្ពុជា និងទី2 ក្រុងបាត់ដំបង ជាកន្លែងដែលសម្បូរទៅដោយតំបន់កម្សាន្ត និងប្រាសាទបុរាណជាច្រើនសម្រាប់ភ្ញៀវទេសចរ។
បាត់ដំបង ត្រូវបានគេដឹងថាជាខេត្តមានសក្ដានុពលមួយក្នុងចំណោមខេត្ដក្រុងដែលមានសក្ដានុពលទាំងបួនរបស់កម្ពុជាក្រៅពីរាជធានីភ្នំពេញ ដែលមានដូចជា ខេត្ដសៀមរាប ខេត្តព្រះសីហនុ និងខេត្តកំពង់ចាម។ បាត់ដំបង ជាខេត្តដែលមានប្រជាជនរស់នៅច្រើន មានសកម្មភាពពាណិជ្ជល្អប្រសើរ មានតំបន់ទេសចរណ៍ និងប្រាសាទបុរាណ ព្រមទាំងមានព្រំប្រទល់នៅជាប់ជាមួយប្រទេសថៃ ដែលបង្កលក្ខណៈអំណោយផលសម្រាប់ការធ្វើពាណិជ្ជកម្មជាលក្ខណៈអន្តរជាតិ។
នាពេលថ្មីៗនេះក្រុងបាត់ដំបង ក៏កំពុងតែត្រៀមសម្រាប់ការដាក់បញ្ចូលអគារចាស់ៗ រួមទាំងវត្ដអារ៉ាម និងផ្សារដែលត្រូវបានសាងសង់ឡើងនាសម័យអាណានិគមបារាំង ដើម្បីដាក់បញ្ចូលទៅក្នុងបញ្ជីបេតិកភណ្ឌពិភពលោករបស់អង្គការ UNESCO ផងដែរ។
លោក សៀក នារតី បានអះអាងថា៖ «តាមរយៈបទពិសោធខ្ញុំដែលធ្វើការងារលើផ្នែកអចលនទ្រព្យនៅខេត្ដបាត់ដំបង ខ្ញុំគិតថាស្ថានភាពដីធ្លីនៅទីនេះនឹងមិនមានបញ្ហាអ្វីនោះទេ គឺនៅតែមានឱកាសសម្រាប់ការទិញលក់បានយ៉ាងល្អ។ ប្រសិនបើគម្រោងរបស់អាជ្ញាធរខេត្ដដែលកំពុងធ្វើជាមួយអង្គការ UNESCO អាចឈានដល់ភាពជោគជ័យ ខ្ញុំជឿថាភ្ញៀវទេសចរនឹងមានកំណើនបន្ថែមទៀត ហើយពេលនោះអ្នកវិនិយោគកាន់តែមានឱកាសច្រើនសម្រាប់ការប្រកបអាជីវកម្ម ក៏ដូចជាការសង់សណ្ឋាគារ ផ្សារទំនើប និងអាផាតមិន ជាដើម»។
យ៉ាងណា ក៏លោកបានចែករំលែកបទពិសោធថា លោកមិនអាចសន្មត់ថាអចលនទ្រព្យនៅក្នុងបាត់ដំបងនឹងមានការអភិវឌ្ឍកម្រិតណានោះទេ ប៉ុន្ដែតាមរយៈសក្ដានុពលដែលក្រុងបាត់ដំបងមាន គឺអ្នកវិនិយោគគួរតែចាប់ផ្ដើមគិតគូរពីការវិនិយោគពីពេលនេះតទៅ ព្រោះអាចថាជាពេលវេលាមួយស័ក្តិសមបំផុត៕
