ការផ្លាស់ប្តូរការសិក្សានៅបរទេស (Exchange program) ជាកម្មវិធីយ៉ាងសំខាន់មួយដែលផ្តល់ឱកាសឱ្យយុវជនទទួលបានបទពិសោធជាអន្តរជាតិច្រើន និងអាចធ្វើឱ្យពួកគេមានឱកាសចេញទៅស្វែងយល់ពីរឿងរ៉ាវជាច្រើនផ្សេងទៀតនៅបរទេស។ វាក៏ជាក្តីស្រមៃមួយផងដែររបស់សិស្ស-និស្សិតជាច្រើននៅកម្ពុជា ព្រោះថា ការធ្វើដំណើរទៅផ្លាស់ប្តូរការសិក្សានេះ ជាដំណើរដែលប្រកបដោយចំណេះដឹង និងកិត្តិយស។
នៅថ្ងៃនេះ ឡារ៉ែន បានជួបសម្ភាសជាមួយ កញ្ញា ប៉ា សុខខេង សហស្ថាបនិកនៃក្រុមជំហានយុវជនកម្ពុជា ដែលបានធ្វើការផ្លាស់ប្តូរការសិក្សាពាក់ព័ន្ធនឹងបញ្ហាអាស៊ាន នៅប្រទេសហ្វ៊ីលីពីន ដើម្បីទុកជាបទពិសោធ និងចែករំលែកចំណេះដឹងដល់សិស្ស-និស្សិតជាច្រើនផ្សេងទៀតនៅកម្ពុជា។
1.តើធ្វើយ៉ាងណាទើបអាចទទួលបានឱកាសក្នុងការទៅផ្លាស់ប្តូរការសិក្សានៅបរទេស?
ឱកាសដែលខ្ញុំទទួលបានការផ្លាស់ប្តូរការសិក្សានេះគឺ ខ្ញុំ និងក្រុមបានឃើញការចុះផ្សាយនៅលើគេហទំព័រផ្លូវការ របស់ ASEAN FOUNDATION MODEL ASEAN MEETING (AFMAM) ដែលជ្រើសរើសយុវជនតំណាងប្រទេសជាសមាជិកអាស៊ានឱ្យចូលរួម ដោយមួយក្រុមតម្រូវឱ្យមាន៧នាក់។ បន្ទាប់មកមិត្តភ័ក្តិនៅសាកលវិទ្យាល័យផ្សេងៗគ្នាក៏បានពិភាក្សាចងជាក្រុមហើយបំពេញបែបបទព័ត៌មានដែលគេត្រូវការ ទាំងបទពិសោធ និងស្នាដៃដែលខ្លួនមានរួចក៏ដាក់ពាក្យ។ ក្នុងការដាក់ពាក្យនោះ មាន119ក្រុមពីបណ្ដាប្រទេសជាសមាជិកអាស៊ានដែលចូលរួមប្រកួតប្រជែង ក៏ប៉ុន្តែមានតែ10ក្រុមប៉ុណ្ណោះដែលត្រូវបានជ្រើសរើស។ ដូច្នេះក្រុមរបស់ខ្ញុំក៏ជាក្រុមក្នុងចំណោម119ដែលត្រូវបានគេពិចារណានោះដែរ។
- តើការទៅផ្លាស់ប្តូរការសិក្សាដែលកញ្ញាបានទៅនោះជាកម្មវីធីអ្វី? វាមានសារៈសំខាន់អ្វីខ្លះសម្រាប់យុវជនកម្ពុជា និងអាស៊ាន?
កម្មវិធីនោះមានឈ្មោះថា 3RD AFMAM 2017(3RD ASEAN FOUNDATION MODEL ASEAN MEETING ) ដែលជជែកពិភាក្សាអំពី Anticipating Environmental Displacement of People in ASEAN Due to Climate Change in Manila , 25-30 Sep. 2017។ ហើយកម្មវិធីនេះបានផ្តល់នូវអត្ថប្រយោជន៍ជាច្រើនដល់យុវជនកម្ពុជា និងអាស៊ានដូចជាបង្កើនទំនាក់ទំនងកាន់តែល្អប្រសើរក្នុងនាមជាយុវជនកម្ពុជា ជាមួយយុវជនអាស៊ាន9ប្រទេសផ្សេងទៀត និងផ្លាស់ប្តូរចំណេះដឹងផ្នែកវប្បធម៌ ក៏ដូចជាផ្សព្វផ្សាយពីវប្បធម៌ខ្មែរទៅកាន់យុវជនអាស៊ានផងដែរ។ លើសពីនេះទៅទៀតសម្រាប់យុវជនខ្មែរក៏អាចទទួលបានចំណេះដឹង និងបទពិសោធថ្មីៗទាក់ទងនឹងសង្គម ASEANលើការសម្រេចចិត្តទៅលើគោលការណ៍នីមួយៗដែលតម្រូវឱ្យតស៊ូមតិដើម្បីផលប្រយោជន៍ប្រទេសជាសមាជិកអាស៊ានទាំងអស់ មិនផ្តោតតែលើសមាជិកណាមួយឡើយ។ កម្មវិធីនេះក៏មានបញ្ចូលនូវកម្មវិធីតស៊ូមតិលើ 3 Pillars of ASEANដែលក្នុងនោះយុវជនកម្ពុជាបានចូលរួមយ៉ាងសកម្មក្នុងកម្មវិធីតស៊ូមតិនេះប្រកបដោយសីលធម៌។
3.តើការផ្លាស់ប្តូរការសិក្សានៅបរទេសអាចជួយយុវជនអ្វីខ្លះ? ហេតុអ្វីបានជាយុវជនគួរធ្វើការផ្លាស់ប្តូរការសិក្សានៅបរទេស?
ការផ្លាស់ប្តូរការសិក្សាអាចជួយឱ្យយុវជនមានភាពក្លាហានប្រកបដោយក្រមសីលធម៌ក្នុងការសិក្សានូវចំណេះដឹងថ្មីៗដោយរៀនសម្របខ្លួនទៅនឹងមជ្ឈដ្ឋាន និងបង្កើនទំនាក់ទំនងជាមួយយុវជនមកពីពហុប្រទេសផ្សេងទៀតនៅលើពិភពលោក។
មែនទែនទៅយុវជនគួរចូលរួមប្រភេទនេះឱ្យបានច្រើន ព្រោះការធ្វើដូច្នេះយុវជនអាចនាំយកចំណេះដឹងដែលខ្លួនទទួលបានមកច្នៃជាបំណិនក្នុងជីវិតខ្លួនឯង គ្រួសារ និងសង្គម ព្រមទាំងចូលរួមអភិវឌ្ឍប្រទេសជាតិឱ្យសមស្របជាសមាជិកអាស៊ានផងដែរ។
- តើកញ្ញាយល់ឃើញយ៉ាងណាដែរចំពោះសមត្ថភាពរបស់យុវជនកម្ពុជា ក្នុងចំណោមយុវជនដទៃនៅបរទេស?
ខ្ញុំយល់ថា យុវជនកម្ពុជាយើង បើនិយាយពីសមត្ថភាពគឺមានភាពប្រហាក់ប្រហែលនឹងយុវជនដទៃទាំង10ប្រទេសដែរ។ ចំណុចខ្លះយុវជនខ្មែរមានគំនិតទូលំទូលាយ និងលេចធ្លោក្នុងការតស៊ូមតិជាភាសាអង់គ្លេស ជាមួយយុវជនផ្សេងទៀតដោយភាពក្លាហាន។ តែយើងក៏មើលឃើញនូវចំណុចខ្វះខាតបន្តិចបន្តួចដែរ ព្រោះប្រទេសយើងកំពុងអភិវឌ្ឍ ដូច្នេះចំណេះដឹងផ្នែកបច្ចេកវិទ្យាទំនើបផ្នែកវិទ្យាសាស្ត្របរិស្ថាន ក៏នៅមានកម្រិតនៅឡើយបើប្រៀបធៀបជាមួយយុវជនសាំងហ្គាពួ តែជារួម សមត្ថភាពយុវជនយើងគឺមានសក្តានុពលមិនចាញ់យុវជនអាស៊ានដទៃនោះទេ៕
