ភ្នំពេញ៖ ដើម្បីចៀសវាងការចោទប្រកាន់ ការប្រើប្រាស់ភ្លើងអស់ច្រើនគីឡូវ៉ាត់ អាជ្ញាធរអគ្គិសនីបានសហការជាមួយអ្នកជំនាញការ JICA ជប៉ុន ដើម្បីរកភាពត្រឹមត្រូវជូនប្រជាពលរដ្ឋដែលសង្ស័យថា គីឡូវ៉ាត់អគ្គិសនីថ្លៃ ឬកើនឡើងច្រើនខុសប្រក្រតីនៅទូទាំងប្រទេស។
មន្ត្រីនៃអាជ្ញាធរអគ្គិសនីកម្ពុជានិយាយថា អគ្គិសនីដែលផ្គត់ផ្គង់លក់ឱ្យអ្នកប្រើប្រាស់នីមួយៗ តម្រូវឱ្យរត់កាត់នាឡិកាអគ្គិសនី ឬជញ្ជីងវាស់ភ្លើងអគ្គិសនីរបស់អ្នកប្រើប្រាស់នោះ ដើម្បីឱ្យនាឡិកាធ្វើការវាស់វែង និងកត់ត្រាចំនួនគីឡូវ៉ាត់ម៉ោងមុននឹងផ្គត់ផ្គង់ទៅឱ្យអ្នកប្រើប្រាស់ សម្រាប់គម្រប់1ខែ ទើបគេស្រង់យកចំនួនគីឡូអគ្គិសនីដែលបានផ្គត់ផ្គង់នោះទៅធ្វើវិក្កយបត្រគិតប្រាក់ថ្លៃអគ្គិសនី។ ដូច្នេះទាំងចំនួនទឹកប្រាក់ និងចំនួនគីឡូអគ្គិសនីត្រឹមត្រូវ ឬមិនត្រឹមត្រូវ គឺស្ថិតនៅលើថា តើការវាស់វែង និងកត់ត្រារបស់នាឡិកាវាស់នោះត្រឹមត្រូវដែរឬទេ?។
ជាមួយគ្នានេះដែរ មន្ត្រីអគ្គីសនីបានអំពាវនាវឱ្យប្រជាពលរដ្ឋកុំយល់ច្រឡំថា ឱ្យតែឧបករណ៍ប្រើអគ្គិសនីរបស់ខ្លួននៅដដែល គីឡូអគ្គិសនីដែលខ្លួនប្រើតាមខែត្រូវតែនៅដដែលដែរ ពីព្រោះថា ទោះជាឧបករណ៍ប្រើប្រាស់នៅដដែលក៏ដោយ តែចំនួនគីឡូ និងចំនួនថ្លៃអគ្គិសនីវាប្រែប្រួលទៅតាមចំនួនម៉ោង និងចំនួននាទីដែលឧបករណ៍នីមួយៗបើកប្រើ «បើកប្រើ1ម៉ោង និងបើកប្រើ3ម៉ោង ចំនួនគីឡូប្រើខុសគ្នា 3ដង) ដូច្នេះចង់ឱ្យគីឡូចុះតិចត្រូវបើកឧបករណ៍នីមួយៗឱ្យតិចម៉ោង និងតិចនាទីជាងមុន»។
ក្រុមការងារចម្រុះរវាងអាជ្ញាធរអគ្គិសនីជាមួយ JICA ជប៉ុន នឹងរួមគ្នាធ្វើដំណើរចុះតាមបណ្តាខេត្ត-ក្រុង ទាំង 25 ទូទាំងប្រទេស តាមកម្មវិធីជាបន្តបន្ទាប់ ដើម្បីរួមគ្នាដោះស្រាយការសង្ស័យលើគីឡូអគ្គិសនី ឬលើថ្លៃអគ្គិសនីអស់ច្រើនរបស់ប្រជាពលរដ្ឋ ។ ដូច្នេះប្រសិនបើសង្ស័យថាគីឡូ ឬចំនួនថ្លៃអគ្គិសនីឡើងមិនប្រក្រតី អ្នកប្រើប្រាស់អគ្គិសនីនៅតំបន់ណាក៏អាចបំពេញពាក្យស្នើសុំមកអាជ្ញាធរអគ្គិសនីកម្ពុជា និងក្រុមចម្រុះឱ្យយកឧបករណ៍ផ្ទៀងផ្ទាត់ទៅផ្ទៀងផ្ទាត់នាឡិកាវាស់អគ្គិសនីនោះមើលថា តើវាដើរត្រឹមត្រូវឬទេ?។ ការងារនេះធ្វើជូនដោយមិនយកប្រាក់ទេ។
ប្រសិនបើផ្ទៀងផ្ទាត់រួចហើយ អ្នកប្រើប្រាស់នៅតែសង្ស័យមិនជឿលើការផ្ទៀងផ្ទាត់របស់អាជ្ញាធរអគ្គិសនីកម្ពុជា ឬក្រុមការងារចម្រុះទេនោះ ពួកគេអាចទៅទិញនាឡិកា(កុងទ័រ)ណាមួយដែលពួកគេយល់ឃើញថាត្រឹមត្រូវ (ទោះជាទិញពីអាល្លឺម៉ង់ បារាំង ជប៉ុន អង់គ្លេស អាមេរិក -ល-ក៏ដោយ) រួចស្នើសុំមកអាជ្ញាធរអគ្គិសនីកម្ពុជា ឬក្រុមការងាររួមខាងលើពិនិត្យព្រមទាំងអនុញ្ញាតឱ្យដាក់នាឡិការនោះវាស់ និងកត់ត្រាទន្ទឹមគ្នានឹងនាឡិកាចាស់របស់អ្នកផ្គត់ផ្គង់ក្នុងរយៈពេល 3ខែ ដើម្បីផ្ទៀងផ្ទាត់ធ្វើសាក្សីមើលទាំងអស់គ្នាថា តើនាឡិកាចាស់ដែលអ្នកផ្គត់ផ្គង់តំបន់នោះកំពុងប្រើ វាស់ខុសពីនាឡិកាដែលអ្នកប្រើប្រាស់ទិញមកដាក់នោះដែរទេ?។ បើដាក់វាស់ទន្ទឹមគ្នារួចឃើញថា វាខុសគ្នាមែន ខាងអាជ្ញាធរនឹងរកខុសត្រូវជូនអ្នកប្រើប្រាស់នោះភ្លាម។
ការចុះពិនិត្យ និងធ្វើកិច្ចសហប្រត្តិបត្តិការជាមួយ JICA ខាងលើនេះ គឺបានបង្ហាញពីតម្លាភាពកាន់តែធំ និងបង្ហាញថា កិច្ចការស្វែងរកភាពត្រឹមត្រូវនៃការសង្ស័យលើគីឡូអគ្គិសនី ឬថ្លៃអគ្គិសនីអស់ច្រើនដែលអាជ្ញាធរអគ្គិសនីកម្ពុជាបានធ្វើពីមុនមកនោះ ទោះជាខាងអ្នកបច្ចេកទេសជប៉ុន ក៏គេត្រូវតែធ្វើបែបនេះដូចគ្នាដែរ៕
