ការចាកចេញពីពិភពបាល់ទាត់លំដាប់កំពូលក្នុងវ័យ 38 ឆ្នាំ ប្រហែលជាជម្រើសដ៏សមស្របសម្រាប់ Cristiano Ronaldo ប៉ុន្តែ ប្រការនេះជួយឱ្យ CR7 ក្លាយជាកីឡាករដែលទទួលបានប្រាក់បៀវត្សរ៍ខ្ពស់ជាងគេលើពិភពលោក។
ក្រោយការសម្ភាសប្រកបដោយភាពចម្រូងចម្រាសនៅលើទូរទស្សន៍ មិនយូរប៉ុន្មាន Ronaldo ក៏ត្រូវបាន Man United បញ្ចប់កិច្ចសន្យា ហើយ CR7 ក៏បានទៅលេងឱ្យក្លឹប Al-Nassr របស់អារ៉ាប៊ីសាអូឌីត។ ថ្វីបើមកលេងឱ្យក្លឹបដែលមិនល្បីឈ្មោះ ប៉ុន្តែ CR7 នៅតែមានឥទ្ធិពលខ្លាំង។
ប្រការខាងលើនេះហើយបានជាកំពូលកីឡាកររបស់ព័រទុយហ្កាល់ ទទួលបានប្រាក់បៀវត្សរ៍ខ្ពស់ពី Al-Nassr។ យោងតាមទំព័រ Marca កីឡាករ Ronaldo ទទួលបាន 200 លានដុល្លារអាម៉េរិក/ឆ្នាំ ពីក្លឹប Al-Nassr។ បើសិនជាចែកខ្ទង់ប្រាក់នេះជាចំណែកតូចៗ គេឃើញថា CR7 រកបាន 16.6 លានដុល្លារ/ខែ, 548,000 ដុល្លារ/សប្ដាហ៍ និងជាង 21,000 ដុល្លារ/ម៉ោង។
នៅពេលគិតក្នុងមួយនាទីវិញ គេឃើញថា Ronaldo រកបានជិត 400 ដុល្លារឯណោះ។ ស្ដាប់ទៅគួរឱ្យភ្ញាក់ផ្អើលខ្លាំងណាស់។ ក៏ប៉ុន្តែ គ្មានអ្វីចម្លែកឡើយ ព្រោះថា CR7 គឺជាតារាបាល់ទាត់មួយរូបក្នុងចំណោមកំពូលកីឡាករពីររូបដែលមានឈ្មោះល្បីខ្លាំងនាបច្ចុប្បន្ន។
នៅឯក្លឹប Al-Nassr Ronaldo គោរពយ៉ាងខ្ជាប់ខ្ជួននូវរបបនៃការរស់នៅ និងការហ្វឹកហាត់ ហើយជាលទ្ធផល គាត់បានជួយឱ្យក្លឹបនេះស្ថិតនៅលើកំពូលតារាងចំណាត់ថ្នាក់នៅ Saudi Pro League រហូតដល់ពេលនេះ៕
