ភ្នំពេញ – កម្ពុជា និងចិន បាននិងកំពុងតែជំរុញឱ្យមានការប្រើប្រាស់រូបីយវត្ថុកម្ពុជាជាផ្លូវការដើម្បីជាកិច្ចសហប្រតិបត្ដិការលើវិស័យសេដ្ឋកិច្ច ពាណិជ្ជកម្មទ្វេភាគី និងក៏ដូចជាការចូលរួមគាំទ្រគោលនយោបាយខ្សែក្រវាត់មួយផ្លូវមួយរបស់ប្រទេសចិនផងដែរ។
លោកជំទាវ ជា សេរី អគ្គនាយកបច្ចេកទេសនៃធនាគារជាតិនៃកម្ពុជា បានលើកឡើងថា ពាណិជ្ជករនៃប្រទេសទាំងពីរនឹងមានភាពងាយស្រួលក្នុងការទូទាត់ទំនិញ ខណៈដែលពួកគាត់អាចទូទាត់ជាប្រាក់រៀលក៏បាន និងជាប្រាក់យន់ក៏បាន ដោយពុំចាំបាច់ធ្វើការប្ដូរប្រាក់ទៅជាដុល្លារអាមេរិកដូចមុនទៀតឡើយ។ ពិសេសពាណិជ្ជករក៏ពុំចាំបាច់ព្រួយបារម្ភពីហានិភ័យនៃអត្រាប្ដូរប្រាក់ទៀតដែរ។
កម្ពុជា ជាប្រទេសដែលមានទំនាក់ទំនងយ៉ាងជិតស្និទ្ធជាមួយប្រទេសចិនទាំងវិស័យរដ្ឋាភិបាល និងវិស័យឯកជន នយោបាយ វប្បធម៌ប្រពៃណីជាដើម។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានសម្ដែងនូវការសាទរចំពោះកិច្ចការនេះ ព្រោះពាណិជ្ជករចង់បានជម្រើសក្នុងការទូទាត់ទំនិញ និងការប្រើប្រាស់រូបីយវត្ថុបែបនេះ។ ជាមួយគ្នានេះដែរ លោកឧកញ៉ាក៏បានស្នើសុំឱ្យមានការបង្កើតកិច្ចសហប្រតិបត្ដិការបែបនេះជាមួយបណ្ដាប្រទេសផ្សេងៗទៀតផង៕
