មហាសេដ្ឋីអាម៉េរិក Elon Musk ត្រូវបានគេជឿថា កំពុងពិភាក្សាជាមួយក្រុមអ្នកជំនាញកំពូលៗដែលធ្លាប់ធ្វើការឱ្យ Google ដើម្បីអភិវឌ្ឍប្រព័ន្ធបញ្ញាសិប្បនិម្មិត (AI) ថ្មី ក្នុងបំណងប្រកួតប្រជែងនឹង ChatGPT។
កាលពីប៉ុន្មានសប្ដាហ៍កន្លង លោក Musk បានជួបអ្នកស្រាវជ្រាវផ្នែក AI ជាច្រើនរូប ដើម្បីពិភាក្សាអំពីការបង្កើតបន្ទប់ពិសោធន៍ថ្មីសម្រាប់ការអភិវឌ្ឍកម្មវិធីដែលអាចជំនួស ChatGPT។ ក្នុងចំណោមអ្នកជំនាញទាំងនោះក៏មាន Igor Babuschkin អតីតអ្នកជំនាញជាន់ខ្ពស់របស់ Google DeepMind និង OpenAI។
Babuschkin បានបញ្ជាក់ថាបានចាកចេញពី DeepMind កាលពីសប្ដាហ៍កន្លង ប៉ុន្តែមិនទាន់យល់ព្រមធ្វើការជាផ្លូវការឱ្យ Elon Musk។ លោក Babuschkin និយាយថា ខ្លួនចង់ធ្វើការជាមួយ Musk ដើម្បីបង្កើតអ្វីមួយដែលស្ថិតក្នុងបរិយាកាស LLM (រូបមន្តភាសាធំ)។ នេះគឺជាបច្ចេកវិទ្យានៅពីក្រោយជោគជ័យរបស់ ChatGPT។ ប៉ុន្តែ លោក Babuschkin ឱ្យដឹងថា ការបង្កើត chatbot មួយដែលមិនមានការគ្រប់គ្រងត្រឹមត្រូវ មិនមែនជាគោលដៅរបស់មហាសេដ្ឋីអាម៉េរិក។
Elon Musk រួមនឹង Sam Altman, Reid Hoffman, Peter Theil គឺជាសហស្ថាបនិករបស់ OPenAI តាំងពីឆ្នាំ 2015។ ដំបូងឡើយ នេះគឺជាប្រព័ន្ធប្រភពបើកចំហ (open source) និងធ្វើសកម្មភាពមិនរកប្រាក់ចំណេញ។ ពួកគេផ្ដោតលើការអភិវឌ្ឍ AI ដើម្បីធ្វើឱ្យមានតុល្យភាពជាមួយ Google។
ខែកុម្ភៈ 2018 លោក Musk ក៏បានលាលែងពីតំណែងប្រធានក្រុមហ៊ុនខាងលើ។ ឆ្នាំ 2020 លោក Musk សម្ដែងការមិនពេញចិត្តនៅពេល OpenAI ផ្ដល់ការអនុញ្ញាតឱ្យ Microsoft ធ្វើការដោយផ្ដាច់មុខចំពោះ GPT-3។ លោក Musk ធ្លាប់និយាយថា «ជាមូលដ្ឋាន OpenAI ត្រូវបានគ្រប់គ្រងដោយ Microsoft»។
ថ្មីៗនេះ លោក Musk ក៏បានរិះគន់ចំពោះ OpenAI ព្រោះតែមិនមានវិធានការទប់ស្កាត់ ChatGPT បង្កើតការសន្ទនាដែលមានផ្ទុកព័ត៌មានមិនពិត ឬបះពាល់ដល់អ្នកប្រើប្រាស់។
ChatGPT ត្រូវបានវាយតម្លៃថាជាកម្មវិធីបញ្ញាសិប្បនិម្មិតមួយក្នុងចំណោមបច្ចេកវិទ្យាលេចធ្លោជាងគេក្នុងឆ្នាំកន្លង។ ក៏ប៉ុន្តែ ក្រុមអ្នកជំនាញព្រមានចំពោះហានិភ័យជាច្រើនទាក់ទងនឹង AI មួយនេះ។ Sam Altman ដែលជា CEO របស់ OpenAI ក៏បាននិយាយថា លទ្ធផលដែលបង្កើតឡើងដោយ ChatGPT ជាក់ស្ដែងមានផ្ទុកកំហុសច្រើន។ កាលពីខែធ្នូ 2022 លោក Sam Altman បានសរសេរលើ Twitter ថា «វាដឹងច្រើនណាស់ ប៉ុន្តែអ្វីដែលគ្រោះថ្នាក់គឺថា វាមានការជឿជាក់ និងបង្កកំហុសឆ្គងមួយផ្នែកគួរឱ្យបារម្ភ»។
ChatGPT គឺជា chatbot បញ្ញាសិប្បនិម្មិតមួយដែលអភិវឌ្ឍដោយក្រុមហ៊ុន OpenAI និងបង្ហាញខ្លួនកាលពីខែវិច្ឆិកា 2022។ វាត្រូវបានបង្កើតឡើងដោយយោងទៅលើរូបមន្តភាសាធំ GPT-3 របស់ OpenAI និងត្រូវបានកែលំអដោយបច្ចេកវិទ្យាសិក្សា។
អ្នកប្រើប្រាស់អាចបញ្ជាឱ្យ ChatGPT សរសេរអត្ថបទទៅតាមប្រធានបទដែលខ្លួនបានជ្រើសរើស ដោយមិនមានបញ្ហារំលោភលើកម្មសិទ្ធិបញ្ញារបស់អ្នកដទៃ៕