ភ្នំពេញៈ តារាចម្រៀងស្រីដែលទើបដើរចេញពីទ្រនំចាស់ហង្សមាស មកជ្រកទ្រនំថ្មីផលិតកម្មថោន អ្នកនាង យក់ ឋិតរដ្ឋា នោះ ស្រាប់តែល្បីថា នាងមានក្តីប្រាថ្នាចង់ក្លាយខ្លួនជាតារាសម្តែងភាពយន្តព្រោះមានទីផ្សារល្អជាងចម្រៀងបង្កការភ្ញាក់ផ្អើលដល់មហាជនយ៉ាងខ្លាំង។
ពេលសាកសួរសាមីខ្លួន បើទោះបីជាមិនមានការបកស្រាយផ្ទាល់ពីតារាចម្រៀងស្រីយក់ ឋិតរដ្ឋា ក្តី តែបើតាមស្វាមីនាងគឺលោក ឃុំ ប៉ុណ្ណាដែត លាន់មាត់ឆ្ងល់ថា៖ «មានព័ត៌មានបែបណុងផង? ដូចជាមិនពិតទេព្រោះភរិយាខ្ញុំមិនធ្លាប់ប្រាប់ថាចង់ក្លាយជាតួសម្តែងនោះទេ»។ លោក ឃុំ ប៉ុណ្ណាដែត រំឮកបញ្ជាក់ថា៖ «ខ្ញុំគិតថាប្រហែលជាយល់ផ្សេងពីមតិយោបល់របស់ប្រពន្ធខ្ញុំ អ្នកសារព័ត៌មានធ្វើបទសម្ភាសកាលពីសម្ពោធរឿងទឹកចិត្តម្តាយសម័យថ្មីនោះហើយ ខណៈពួកយើងសុទ្ធតែជាអ្នកចម្រៀង ថាចង់ដើរតួកុននោះ ដូចជាមិនបានប្រាប់ចឹងទេ!»។
គូស្វាមីជាតារាចម្រៀងអ្នកនាង យក់ ឋិតរដ្ឋា និងលោក ឃុំ ប៉ុណ្ណាដែត គឺជាម្ចាស់ភោជនីយដ្ឋាន Factory-Pub ខណៈពេលឃ្លាតឆ្ងាយពីសិល្បៈមួយរយៈទៅផ្តោតលើការរកស៊ីនោះ ខណៈអ្នកទាំងពីរបានក្រាបផ្ទឹមរៀបចំអាពាហ៍ពិពាហ៍នៅថ្ងៃទី ១៣ ខែ ឧសភា ឆ្នាំ ២០០៥។ លោក ឃុំ ប៉ុណ្ណាដែត ក៏បានរំឭកប្រាប់ពីពេលមុនធ្លាប់មានផលិតកម្មខ្លះបានទាក់ទងប្តី ប្រពន្ធលោកទៅថតកុនដែរ តែដោយសារគ្មានពេលវេលា គ្រប់គ្រាន់ក៏បដិសេធគឺផលិតកម្មទូរទស្សន៍ប៉ុស្តិ៍លេខ ៥ និងលេខ ៣ ៕
