ទុនបង្វិលច្រើនថែមទៀតនៅតែត្រូវការសម្រាប់ជួយស្រោចស្រង់ស្ថានភាពស្រូវអង្ករនៅកម្ពុជាឱ្យកាន់តែប្រសើរ ថ្វីបើស្ថានភាពនាពេលនេះមានភាពវិជ្ជមានឡើងវិញចាប់តាំងពីពាក់កណ្តាលឆ្នាំ2017 ដោយសារតម្រូវការទីផ្សារខាងក្រៅប្រទេសបានងើបឡើង និងតម្លៃក៏ប្រសើរជាងពេលប៉ុន្មានឆ្នាំកន្លងមក។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន មេគង្គ អូរីហ្សាដែលជាក្រុមហ៊ុននាំចេញអង្ករដ៏សំខាន់មួយនៅកម្ពុជា បានអះអាងថា ស្ថានភាពស្រូវអង្ករបានវិលមករកភាពល្អប្រសើរវិញចាប់តាំងពីពាក់កណ្តាលឆ្នាំ2017 ដោយទីផ្សារខាងក្រៅបានបញ្ជាទិញកាន់តែច្រើន ហើយតម្លៃអង្ករក៏ល្អជាងពេលមុនផងដែរ។ ជាមួយគ្នានេះ តម្លៃស្រូវនៅក្នុងស្រុកក៏រក្សាបាននូវស្ថិរភាពខ្ពស់ជាងឆ្នាំមុន។
លោកឧកញ៉ា បានបន្ថែមទៀតថា ស្ថានភាពល្អប្រសើរបែបនេះមិនអាចរក្សាបានយូរទេ ប្រសិនបើវិស័យមួយនេះនៅតែខ្វះទុនសម្រាប់ធ្វើចលនាទិញពេលប្រមូលផលឱ្យបានរហ័ស បើទោះបីជាកសិករចូលរួមស្វែងយល់ និងដាំដុះស្រូវដែលមានតម្រូវការទីផ្សារខ្ពស់ក៏ដោយ។
លោកឧកញ៉ា បានបញ្ជាក់ថា៖“កសិករខ្មែរនាពេលនេះមានភាពវ័យឆ្លាតក្នុងការដាំដុះស្រូវ ដែលខុសពីប៉ុន្មានឆ្នាំមុន ការផលិតស្រូវគឺមិនទាន់មានភាពច្បាស់លាស់ ផ្សាភ្ជាប់ទៅនឹងតម្រូវការទីផ្សារនោះទេ។ ដំណើរការផលិត គឺទៅមុខហើយ តែអ្វីដែលត្រូវធ្វើគឺដើមទុនសម្រាប់ទិញស្រូវនៅពេលប្រមូលផល និងឃ្លាំងស្តុកស្រូវ។ ទាំងការផលិត ដើមទុន និងឃ្លាំងស្តុកត្រូវតែដើរស្របគ្នា ទើបវិស័យនេះដំណើរការទៅមុខបានលឿន។ បម្រែបម្រួលទាំងតម្រូវការ និងតម្លៃ ក្នុងវិស័យស្រូវអង្ករនាពេលនេះបានធ្វើឱ្យវិស័យនេះមានភាពធូរស្រាល បើធៀបទៅនឹងស្ថានភាពកាលពីឆ្នាំកន្លងមក។ ស្រូវអង្ករកម្ពុជា លែងមានកង្វល់ចំពោះកង្វះអ្នកទិញ ហើយក៏គ្មានកង្វល់ចំពោះការធ្លាក់ថ្លៃនោះដែរ ប៉ុន្តែកញ្ចប់ថវិកាបម្រុងសម្រាប់ផ្តល់កម្ចីដល់អ្នកទិញស្រូវ និងម្ចាស់រោងម៉ាស៊ីន ដែលទម្លាក់ដោយរាជរដ្ឋាភិបាលប្រមាណ50លានក្នុងឆ្នាំ2017 នេះគឺមិនគ្រប់គ្រាន់ទេ។
ទោះបីជាយ៉ាងណាថ្មីៗនេះគេសង្កេតឃើញមានប្រភពទុនថ្មីៗ បានផ្តល់កម្ចីដល់ប្រតិបត្តិករហិរញ្ញវត្ថុខ្នាតតូច ដើម្បីត្រៀមផ្តល់កម្ចីដល់វិស័យស្រូវអង្ករ ប៉ុន្តែទុនទាំងនេះគឺនៅតិចណាស់ បើធៀបទៅនឹងតម្រូវការប្រតិបត្តិការជាក់ស្តែង។ កម្ចីសម្រាប់វិស័យកសិកម្មមាននិន្នាការកើនឡើងជាបន្តបន្ទាប់ ពិសេសពីវិស័យហិរញ្ញវត្ថុឯកជន។ នេះបើតាមមន្ត្រីជាន់ខ្ពស់នៃធនាគារជាតិនៃកម្ពុជា។
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា នាពេលកន្លងមក បានលើកឡើងថា តាមការសង្កេតតាមដាន ការផ្តល់កម្ចីពីធនាគារពាណិជ្ជ និងគ្រឹះស្ថានមីក្រូហិរញ្ញវត្ថុ កម្ចីដែលបានផ្តល់ដល់វិស័យកសិកម្មទាំងមូលមានទំហំ2.5ប៊ីលានដុល្លារ ដោយក្នុងនោះពីគ្រឹះស្ថានមីក្រូហិរញ្ញវត្ថុមានទំហំ 1ប៊ីលានដុល្លារ និងពីធនាគារពាណិជ្ជកម្មមានទំហំ1.5ប៊ីលានដុល្លារ គិតមកត្រឹមខែសីហា ឆ្នាំ2017។
លោកជំទាវ បានបន្តថា ជាមួយគ្នានៃការផ្តល់កម្ចីដែលមានភាគរយធំបែបនេះ ធនាគារជាតិនៃកម្ពុជាក៏បានលើកទឹកចិត្តដល់ប្រតិបត្តិករហិរញ្ញវត្ថុឯកជន ពិនិត្យមើលក្នុងការបន្ធូរបន្ថយលក្ខខណ្ឌក្នុងការផ្តល់កម្ចីដល់ការទិញស្រូវ ដោយមិនត្រូវចាំតែតម្រូវលើការដាក់អចលនទ្រព្យបញ្ចាំនោះទេ តែត្រូវពិនិត្យលើអាជីវកម្មជាក់ស្តែង។ ជាមួយការបន្ធូរលក្ខខណ្ឌខ្លះ ធនាគារដែលផ្តល់ប្រាក់កម្ចីគួរតែតាមដានអ្នកខ្ចីប្រាក់នោះថា តើគាត់ប្រាកដជាយកប្រាក់នោះទៅប្រកបអាជីវកម្មក្នុងវិស័យស្រូវអង្ករនេះពិតប្រាកដ ឬទេ? ព្រោះកន្លងមកមានអ្នកខ្លះអាចយកវិស័យនេះដឹកមុខ តែពេលទទួលបានកម្ចី បែរជាយកទៅប្រកបមុខរបរផ្សេងទៅវិញ។
លោកជំទាវ បានថ្លែងថា៖ “យើងលើកទឹកចិត្តឱ្យផ្តល់ប្រាក់កម្ចីក្នុងវិស័យស្រូវអង្ករនេះ ដោយពិនិត្យមើលលើអាជីវកម្មជាក់ស្តែងជាជាងទ្រព្យបញ្ចាំ តែត្រូវពិនិត្យឱ្យដិតដល់ថា គាត់ខ្ចីប្រាក់នេះយកទៅសម្រាប់តែស្រូវអង្ករតែមួយមុខទេ”៕