ភ្នំពេញ- បន្ទាប់ពីមានការផ្ដល់ទឹកប្រាក់ក្នុងរង្វង់15លានដុលា្លរអាមេរិកដល់ក្រុមហ៊ុននាំចេញអង្ករធំៗចំនួន2ដើម្បីធ្វើការសាងសង់ឡសម្ងួត និងឃ្លាំងស្ដុកស្រូវ 3 ទីតាំងបន្ថែមទៀតរួចមក គេរំពឹងថា នៅឆ្នាំ2018 ស្ថានភាពស្រូវអង្ករនៅកម្ពុជានឹងកាន់តែមានភាពល្អប្រសើរឡើងមិនខាន។
ឯកឧត្ដម កៅ ថាច អគ្គនាយកនៃធនាគារអភិវឌ្ឍន៍ជនបទ បានលើកឡើងថា គម្រោងសាងសង់ឃ្លាំងស្ដុកស្រូវ និងឡសម្ងួតរបស់ធនាគារអភិវឌ្ឍន៍ជនបទត្រូវបានសាងសង់ឡើងនៅលើទីតាំង 3 កន្លែង ស្ថិតនៅក្នុងខេត្ដចំនួន3 មានកំពង់ធំ តាកែវ និងព្រៃវែង។ ឯកឧត្ដមបន្ដថា គម្រោងសាងសង់ឡសម្ងួត និងឃ្លាំងស្ដុកទាំង 3ទីតាំងនេះ គឺជាគម្រោងទី2 របស់រាជរដ្ឋាភិបាលដែលចាប់ដៃជាមួយវិស័យឯកជន ដោយក្នុងមួយទីតាំងត្រូវប្រើទឹកប្រាក់អស់ចំនួន 5 លានដុល្លារ និងអាចមានសមត្ថភាពសម្ងួតក្នុងមួយថ្ងៃបាន1,500តោន និងអាចស្ដុកបាន5ម៉ឺនតោន។
ឡសម្ងួត និងឃ្លាំងស្ដុកស្រូវចំនួន3ទីតាំងនេះនឹងជួយសម្រូលដល់ដំណើរការប្រមូលផលស្រូវ និងស្ដុកទុក ធ្វើយ៉ាងណាមិនឱ្យទិន្នផលស្រូវមានការខូចគុណភាព ដែលគេរំពឹងថា ការប្រមូលផលស្រូវក្នុងឆ្នាំថ្មីខាងមុខនេះនឹងកាន់តែមានភាពល្អប្រសើរឡើង ខណៈគម្រោងទីពីរនេះនឹងចាប់ផ្ដើមដំណើរការក្នុងឆ្នាំ2018។ គួរបញ្ជាក់ថា គម្រោងទីមួយនៃការសាងសង់ឡសម្ងួត និងឃ្លាំងស្ដុកស្រូវនេះដែរ ត្រូវបានអនុវត្ដនៅខេត្ដបាត់ដំបងរវាងរាជរដ្ឋាភិបាលជាមួយក្រុមហ៊ុនលោកឧកញ៉ា ភូ ពុយ ៕
