ភ្នំពេញ៖ ដោយសម្លឹងឃើញកម្ពុជាជាទីតាំងភូមិសាស្ត្រមួយនៅអាស៊ីដែលអំណោយផលផ្នែកកសិកម្ម ក្រុមហ៊ុនដ៏ធំមួយរបស់ជប៉ុនគ្រោងបោះទុនប្រមាណជា 3លានដុល្លារអាមេរិក ដើម្បីសាងសង់សាកលវិទ្យាល័យបណ្តុះបណ្តាលជំនាញកសិកម្ម ទេសចរណ៍ និងថែទាំមនុស្សចាស់លើកដំបូងនៅកម្ពុជាយើង។
ដំណឹងសាងសង់សាកលវិទ្យាល័យថ្មីមួយនេះត្រូវបានឱ្យដឹងនៅពេលដែលលោក Yoshio Kondo នាយកក្រុមហ៊ុន Procast Asia Co.,Ltd បានដឹកនាំគណៈប្រតិភូនៃសមាគម Toukaizaikai ដែលជាសមាគមមួយមានក្រុមហ៊ុនផ្នែកឧស្សាហកម្ម ផ្នែកសេវាកម្ម ផ្នែកវេជ្ជសាស្ត្រ និងហិរញ្ញវត្ថុសរុបជាង300ក្រុមហ៊ុនជាសមាជិកមកកម្ពុជាដើម្បីស្វែងយល់ពីភាពអនុគ្រោះ និងលក្ខខណ្ឌការងារដែលពាក់ព័ន្ធនឹងការវិនិយោគនៅប្រទេសកម្ពុជាជាមួយឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ។
លោក Yoshio Kondo នាយកក្រុមហ៊ុន Procast Asia co.,Ltd ប្រចាំនៅកម្ពុជាបានបញ្ជាក់ដែរថា ទៅថ្ងៃអនាគត សមាគម Toukaizaikai នឹងពង្រីកការវិនិយោគទុននៅប្រទេសកម្ពុជា ខណៈបច្ចុប្បន្នក្រុមហ៊ុនរបស់លោកបាន និងកំពុងសាងសង់សាកលវិទ្យាល័យមួយដើម្បីបណ្ដុះបណ្ដាលលើជំនាញថែទាំជនចាស់ជរា កសិកម្ម និងទេសចរណ៍ នៅតំបន់ខាំកូស៊ីធី ស្ថិតក្នុងខណ្ឌសែនសុខដែលគ្រោងនឹងចំណាយថវិកាប្រមាណជា3លានដុល្លារអាមេរិកក្នុងការសាងសង់អគារសាកលវិទ្យាល័យថ្មីមួយនេះ។
ក្នុងជំនួបដ៏កម្រនេះឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈមានប្រសាសន៍បញ្ជាក់ថា នៅពេលខាងមុខនេះក្រុមហ៊ុន Procast Asia នឹងពង្រីកគម្រោងវិនិយោគរបស់ខ្លួននៅកម្ពុជាដែលអាចផ្ដល់នូវកាលានុវត្តភាពបន្ថែមទៀតសម្រាប់អភិវឌ្ឍសេដ្ឋកិច្ចជាតិ ក៏ដូចជាការបង្កើតនូវឱកាសការងារថ្មីៗជូនដល់ប្រជាពលរដ្ឋកម្ពុជាផងដែរ។
ឯកឧត្តមបណ្ឌិត បានជូនដំណឹងទៅក្រុមគណៈប្រតិភូនៃសមាគម Toukaizaikai នូវព័ត៌មានមួយចំនួនពាក់ព័ន្ធនឹងភាពអនុគ្រោះ និងលក្ខខណ្ឌការងារ ក៏ដូចជាភាពរីកចម្រើននៃសេដ្ឋកិច្ចកម្ពុជានាពេលបច្ចុប្បន្ន ជាពិសេសកិច្ចសហប្រតិបត្តិការល្អរវាងកម្ពុជា និងជប៉ុនក្នុងដំណាក់កាលបច្ចុប្បន្ននេះ។ លើសពីនេះទៀត គឺភាពរឹងមាំនៃសន្តិភាព និងស្ថិរភាពពេញប្រទេសកម្ពុជាផងដែរ។ ហើយសមាគមបានចាប់ផ្ដើមធ្វើការសិក្សាស្វែងយល់តាមរយៈព័ត៌មាននានារួចហើយ គ្រាន់តែសមាគមត្រូវធ្វើការពិនិត្យស្ថានភាពជាក់ស្ដែងនៅកម្ពុជាបន្ថែមទៀតដើម្បីយល់ដឹងឱ្យកាន់តែប្រាកដច្បាស់។
ទោះយ៉ាងណាលោកនាយកក្រុមហ៊ុន Procast មិនទាន់អាចបញ្ជាក់ពីទំហំវិនិយោគច្បាស់លាស់ និងថ្ងៃចាប់ផ្ដើមនៃការវិនិយោគនៅឡើយទេ ដោយសារត្រូវរង់ចាំបញ្ចប់ការត្រួតពិនិត្យជាក់ស្ដែង និងត្រូវឆ្លងកាត់បែបបទគតិយុត្តនៅកម្ពុជាជាច្រើនដំណាក់កាលតទៅទៀត៕