ភ្នំពេញ៖ ធនាគារជាតិនៃកម្ពុជា (NBC) បានប្រកាសជាផ្លូវការ សហការជាមួយគ្រឹះស្ថានធនាគារអេស៊ីលីដា ធនាគារស្ថាបនា និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើប្រាសាក់ ដាក់ឱ្យដំណើរការរួមគ្នាជាបឋមនូវប្រព័ន្ធ Cambodia Share Switch (CSS) ដែលជាប្រព័ន្ធរួមបញ្ចូលគ្នាមួយសម្រាប់សម្រួលដល់អតិថិជនធ្វើប្រតិបត្តិការអន្តរធនាគារតាមរយៈប័ណ្ណទូទាត់ម៉ាស៊ីន ATM និង POS របស់គ្រឹះស្ថានសមាជិកប្រកបដោយភាពងាយស្រួល និងឆាប់រហ័ស។
ខ្លឹមសារនៃសេចក្តីប្រកាសព័ត៌មានរបស់ NBC បានឱ្យដឹងថា គោលបំណងនៃការដាក់ឱ្យដំណើរការជាបឋមនូវប្រព័ន្ធ CSS គឺដើម្បីធ្វើទំនើបកម្មប្រព័ន្ធទូទាត់ កាត់បន្ថយចរាចរសាច់ប្រាក់នៅលើទីផ្សារ លើកកម្ពស់ប្រសិទ្ធភាពទូទាត់នៅកម្ពុជាឱ្យកាន់តែប្រសើរឡើង និងជំរុញប្រតិបត្តិការអន្តរធនាគារឱ្យកាន់តែទូលំទូលាយ តាមរយៈការផ្តល់មធ្យោបាយធ្វើប្រតិបត្តិការបន្ថែមទៀតសម្រាប់អតិថិជន។
ជាមួយនឹងបណ្តាញ ATM ដ៏ទូលំទូលាយរបស់គ្រឹះស្ថានជាសមាជិក ប្រព័ន្ធនេះនឹងអនុញ្ញាតឱ្យប្រជាជននៅតាមជនបទអាចប្រើប្រាស់សេវាធនាគារបាន ដែលនឹងអាចរួមចំណែកយ៉ាងសកម្មក្នុងគោលនយោបាយរបស់រាជរដ្ឋាភិបាលក្នុងការលើកកម្ពស់បរិយាប័ន្នហិរញ្ញវត្ថុ និងអភិវឌ្ឍសេដ្ឋកិច្ច។
ប្រព័ន្ធ CSS គឺជាប្រព័ន្ធរួមមួយដែលផ្តល់លទ្ធភាពដល់អតិថិជនរបស់គ្រឹះស្ថានជាសមាជិក ក្នុងការធ្វើប្រតិបត្តិការទូទាត់ទំនិញ និងសេវាកម្មដកប្រាក់-ផ្ទេរប្រាក់អន្តរធនាគារពិនិត្យសមតុល្យគណនី និងរបាយការណ៍ហិរញ្ញវត្ថុសង្ខេបតាមម៉ាស៊ីន ATM ឬ POS របស់គ្រឹះស្ថានដែលជាសមាជិកប្រព័ន្ធ CSS។
គួរបញ្ជាក់ថា នាពេលឆាប់ៗខាងមុខនេះបន្ទាប់ពីដាក់ឱ្យដំណើរការជាបឋមបានជោគជ័យ អតិថិជនអាចប្រើម៉ាស៊ីន ATM ឬ POS បានកាន់តែទូលំទូលាយថែមទៀត ព្រោះក្រៅពីគ្រឹះស្ថានស្ថាបនិកទាំងបីខាងលើហើយ នៅមានគ្រឹះស្ថានធនាគារពាណិជ្ជ និងគ្រឹះស្ថានមីក្រូហិរញ្ញវត្ថុទទួលប្រាក់បញ្ញើផ្សេងទៀត បាននិងកំពុងដាក់ពាក្យសុំចូលរួមដែរហើយ។
លោកបណ្ឌិត អ៊ិន ចាន់នី ប្រធាននាយកប្រតិបត្តិនៃធនាគារអេស៊ីលីដាដែលជាធនាគារឈានមុខគេនៅកម្ពុជាឱ្យដឹងថា ការអនុវត្តសេវាបែបនេះគឺជាការល្អ ព្រោះនៅកម្ពុជាមានធនាគារពាណិជ្ជ និងធនាគារឯកទេសសរុបចំនួន51 ហើយធនាគារនីមួយៗមានទូATM រៀងៗខ្លួន ដូច្នេះការដាក់ឱ្យប្រើប្រាស់សេវាអេធីអឹមរួមគ្នានេះ គឺអាចធ្វើឱ្យធនាគារទាំងអស់តភ្ជាប់ជាមួយគ្នា ដោយអនុញ្ញាតឱ្យអតិថិជនអាចដកប្រាក់នៅធនាគារណាក៏បាន ខណៈដែលអេស៊ីលីដាមានទូATM សរុបជាង300គ្រឿងដាក់ពង្រាយទៅតាមទីប្រជុំជននានា។ លោកបានបន្តថា ការអនុវត្តបែបនេះគឺមានភាពងាយស្រួល ប៉ុន្តែអ្នកមានកាតអេធីអឹមដែលចង់ដកប្រាក់នៅធនាគារផ្សេង អតិថិជនត្រូវបង់សេវាកម្មពីការប្រើប្រាស់នោះ។
លោក អឿ សុធារ័ត្ន នាយកអភិវឌ្ឍន៏អាជីវកម្ម និងជាប្រធាននាយកប្រតិបត្តិស្តីទី នៃការិយាល័យឥណទានកម្ពុជា (CBC) មានប្រសាសន៍ថា ការប្រកាសនេះធ្វើឡើងបន្ទាប់ពីមានកិច្ចប្រឹងប្រែងរវាងធនាគារនីមួយៗនៅក្នុងប្រទេសកម្ពុជា ហើយធនាគារនីមួយៗសុទ្ធតែបានបង្កើតទូ ATM ដូចគ្នា គ្រាន់តែធនាគារខ្លះមានតិច និងធនាគារខ្លះមានច្រើនប៉ុណ្ណោះ។ លោកថា ប្រព័ន្ធថ្មីនេះនឹងផ្តល់ភាពងាយស្រួលទៅដល់អតិថិជនដែលកាន់កាត ATM នៅធនាគារណាដែលមិនមានប្រាក់គ្រប់គ្រាន់ក្នុងការបង្កើតទូ ATM ឱ្យបានច្រើន។
លោកបន្តថា តាមពិតទៅប្រតិបត្តិការខាងលើ គេបានធ្វើរួចទៅហើយនៅប្រទេសជឿនលឿន ដោយនៅប្រទេសទាំងនោះ មិនមានទូ ATM ដាក់តម្រៀបគ្នានៅកន្លែងតែមួយដូចនៅកម្ពុជានោះទេ ព្រោះមានការដាក់ឱ្យអតិថិជនអាចដកប្រាក់គ្រប់ទូ ATM តែមួយរួមគ្នានេះ។
គួរញ្ជាក់ផងដែរថា ដោយសារមន្ត្រីរាជការ កម្មកររោងចក្រ និងបុគ្គលិកក្រុមហ៊ុនឯកជនមួយ ចំនួន ត្រូវបានដាក់ឱ្យបើកប្រាក់តាមប្រព័ន្ធ ATM មក គេឃើញនៅពេលបើកប្រាក់ខែម្តងៗ ពួកគេតែងឈរតម្រង់ជួរគ្នាចាំបើកលុយ ប៉ុន្តែនៅពេលដាក់ឱ្យដំណើរការដកប្រាក់រួមគ្នានៅATM ផ្សេងគ្នាបានបែបនេះ នឹងធ្វើឱ្យការដំណើរការដកប្រាក់របស់ពួកគាត់ប្រពឹត្តទៅបានឆាប់រហ័សមិនចំណាយពេលរង់ចាំយូរ ដូចមុនទៀតទេ៕