ក្រុមបិសាចក្រហម Manchester United បានត្រួសត្រាយផ្លូវរបស់ពួកគេឆ្ពោះទៅកាន់វគ្គ8 ក្រុមចុងក្រោយនៃពាន Carabao Cup ឬ League Cup យ៉ាងងាយស្រួល ក្រោយពីពួកគេបានកត់ត្រាជ័យជម្នះក្នុងលទ្ធផល 2-០ កាលពីថ្ងៃអង្គារ តាមរយៈការរកគ្រាប់បាល់បានទាំង 2គ្រាប់ពីសំណាក់កីឡាករ Jesse Lingard។
កីឡាកររូបនេះបានរកគ្រាប់បាល់បញ្ចូលទីយ៉ាងល្អ ស្របពេលដែលក្រុម Swansea មិនបានបង្ហាញពីភាពរឹងមាំរបស់ខ្លួនឡើយ។ Man United បានធ្វើការផ្លាស់ប្តូរកីឡាករ 7នាក់ពីក្រុមដែលបានចាញ់ក្រុម Huddersfield ក្នុងលទ្ធផល 2-1 កាលពីចុងសប្តាហ៍ថ្មីៗនេះ។ ស្របពេលជាមួយគ្នានេះ អ្នកចាំទី Claudio Bravo របស់ Manchester City បានក្លាយជាវីរបុរសរបស់ក្រុមកំពុងនាំមុខរបស់ក្របខ័ណ្ឌ Premier League មួយនេះ ខណៈដែលពួកគេបានផ្តួលក្រុមស្ថិតក្នុងក្របខ័ណ្ឌលំដាប់ទី2 Wolves ដោយការស៊ុតបាល់ប៉េណាល់ទីកាត់សេចក្តី ដើម្បីកក់កៅអីរបស់ពួកគេក្នុងវគ្គ8ក្រុមចុងក្រោយនៃពាន League Cup កាលពីថ្ងៃអង្គារ។
បើទោះបីជាក្រុមទាំងពីរសុទ្ធសឹងបានបង្កើតឱកាសល្អដូចគ្នានៅពេលជិតបញ្ចប់ការប្រកួតក៏ដោយ ប៉ុន្តែការប្រកួតនៅកីឡដ្ឋាន Etihad នេះ នៅតែបញ្ចប់ក្នុងលទ្ធផលស្មើ ០-០ដដែលក្រោយពីរយៈពេល30នាទីនៃនាទីបន្ថែម១៥នាទី2ដងត្រូវបានបញ្ចប់ ដែលនាំឲ្យឈានដល់ការស៊ុតបាល់ប៉េណាល់ទីកាត់សេចក្តីតែម្តង។ Bravo ដែលបានរងនូវការរិះគន់ ក្រោយពីបានបង្ហាញពីទម្រង់មិនល្អកាលពីរដូវកាលមុន និងបានបង្ហាញខ្លួនត្រឹមតែ3លើកក្នុងយុទ្ធនាការនេះ បានសង្គ្រោះបាល់ប៉េណាល់ទី 2លើកជាប់ៗគ្នាពីការស៊ុតរបស់ Alfred N’Diaye និង Conor Coady ពីចំណុច11ម៉ែត្រ។
ខ្សែប្រយុទ្ធ Sergio Aguero ដែលត្រូវការគ្រាប់បាល់តែ1គ្រាប់ទៀតដើម្បីក្លាយជាអ្នករកគ្រាប់បាល់ច្រើនជាងគេរបស់ Man City នោះ បានជួយឲ្យក្រុមខ្លួនទទួលជ័យជម្នះក្នុងលទ្ធផល 4-1 ក្នុងការស៊ុតបាល់ប៉េណាល់ទីនេះ៕
ប្រភពពី៖ ESPN