(អារ៉ាប៊ីសាអូឌីត)- កីឡាករព័រទុយហ្គាល់ Cristiano Ronaldo មិនទាន់បានលេងនៅ AFC Champions League រដូវកាល 2022-2023 ដោយសារតែក្លឹប Al Nassr មិនមានសិទ្ធិចូលរួម។
Ronaldo បានចុះកិច្ចសន្យាជាមួយក្លឹប Al Nassr កាលពីថ្ងៃទី 30 ធ្នូ 2022។ កីឡាកររូបនេះនឹងរួមជាមួយក្លឹបថ្មី លេងនៅពានរង្វាន់ក្នុងស្រុកចំនួន 2 គឺ Saudi Pro League និង King Cup។ ក្លឹប Al Nassr មិនទាន់មានសិទ្ធិលេងនៅ AFC Champions League (AFC Champions League គឺជាពានរង្វាន់បាល់ទាត់ប្រចាំទ្វីបអាស៊ី ដែលរៀបចំឡើងដោយសហព័ន្ធកីឡាបាល់ទាត់អាស៊ី និងប្រកួតប្រជែងដោយក្លឹបបាល់ទាត់លំដាប់កំពូលរបស់ទ្វីបនេះ) ដោយសារតែជាប់ចំណាត់ថ្នាក់ទី 3 នៅ Saudi Pro League និងហាលអាវត្រឹមវគ្គ 4 គូ នៅ King Cup រដូវកាលមុន។
មុននោះ Ronaldo ក៏បានបរាជ័យក្នុងការស្វែងរកក្លឹបដែលមានសំបុត្រចូលរួមប្រកួតនៅ UEFA Champions League។ ក្នុងរដូវទិញដូរកីឡាករឆ្នាំ 2022 ក្លឹបនានាដែល CR7 បានទាក់ទង សុទ្ធតែបដិសេធការចុះកិច្ចសន្យា ក្នុងនោះមានទាំង Real Madrid, Chelsea, Bayern, Napoli, Marseille និង Frankfurt ផងដែរ។
ដើម្បីបានលេងនៅ AFC Champions League 2023-2024 Ronaldo ត្រូវតែជួយក្លឹប Al Nassr ដណ្ដើមបានពាននៅ Saudi Pro League ឬ King Cup។ អារ៉ាប៊ីសាអូឌិត មានសិទ្ធិបញ្ជូន 3 ក្រុមទៅចូលរួម AFC Champions League។ បញ្ជីឈ្មោះក្លឹបដែលនឹងទៅចូលរួមប្រកួតនៅ AFC Champions League រដូវកាលខាងមុខរួមមាន ជើងឯក Saudi Pro League 2022-2023, ជើងឯក King Cup 2022-2023 និង Al Hilal ដែលជាជើងឯក Saudi Pro League 2021-2022។
Al Nassr កំពុងនាំមុខនៅ Saudi Pro League 2022-2023។ ក្រោយ 11 ប្រកួត ក្លឹបថ្មីរបស់ Ronaldo មាន 26 ពិន្ទុ ច្រើនជាង Al Shabab 1 ពិន្ទុ និង Al Ittihad 2 ពិន្ទុ ប៉ុន្តែ Al Nassr លេងច្រើនជាងក្លឹបទាំងពីរនេះ 1 ប្រកួត។
យោងតាមកិច្ចសន្យា CR7 នឹងទទួលបានប្រាក់បៀវត្សរ៍ 75 លានដុល្លារអាម៉េរិក។ ខ្សែប្រយុទ្ធវ័យ 37 ឆ្នាំនេះក៏អាចរកបានប្រាក់បន្ថែមរហូតដល់ 200 លានដុល្លារ តាមរយៈការផ្សាយឃោសនា និងសកម្មភាពពាណិជ្ជកម្ម។
Cristiano Ronaldo ចូលមកកាន់ក្លឹប Al Nassr របស់ អារ៉ាប៊ីសាអូឌីត ទៅតាមទម្រង់សេរី បន្ទាប់ពីគាត់ និង ក្លឹប Man Utd យល់ព្រមបញ្ចប់កិច្ចសន្យាចាស់៕