ភ្នំពេញ៖ ដើម្បីកាត់បន្ថយការធ្វើចំណាកស្រុករបស់យុវជនកម្ពុជា ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយតំណាងអង្គការសហប្រជាជាតិប្រចាំប្រទេសកម្ពុជា ដើម្បីបង្កើតកម្មវិធី «រួមគ្នាដើម្បីមុខរបរ និងការងាររបស់យុវជនកម្ពុជា»។
ឯកឧត្តមបណ្ឌិត អ៊ិត សំហេង រដ្ឋមន្រី្តក្រសួងការងារ និងបណ្តុះបណ្តាលវិជ្ជាជីវៈមានប្រសាសន៍ថា គណៈប្រឹក្សាភិបាលរបស់កម្មវិធី “រួមគ្នាដើម្បីមុខរបរ និងការងាររបស់យុវជនកម្ពុជា” ដែលតទៅនឹងហៅថា “កម្មវិធីរួមគ្នា” គឺជាក្រុមប្រឹក្សាភិបាលនៃគម្រោងនេះ និងផ្តល់ការដឹកនាំជាយុទ្ធសាស្ត្រ ការត្រួតពិនិត្យផ្នែកអភិបាលកិច្ច និងការធានានូវសេចក្តីជឿទុកចិត្តគ្នា។ គណៈប្រឹក្សាភិបាលនឹងទទួលបានសិទ្ធិប្រទានពីម្ចាស់ជំនួយដើម្បីធ្វើការសម្រេចចិត្តនានា ដោយយោងតាមគោលបំណងអភិក្រម និងវិសាលភាពរបស់គម្រោងដូចដែលបានកំណត់នៅក្នុងឯកសារគម្រោង។
សមាជិក-សមាជិកាគណៈប្រឹក្សាភិបាលរួមមានតំណាងជាន់ខ្ពស់របស់ក្រសួងការងារ និងបណ្តុះបណ្តាលវិជ្ជាជីវៈ ក្រសួងអប់រំ យុវជន និងកីឡា ទីភ្នាក់ងារស្វ៊ីសដើម្បីកិច្ចសហប្រតិបត្តិការ និងអភិវឌ្ឍន៍ អង្គការអន្តរជាតិខាងការងារ (ILO) កម្មវិធីអភិវឌ្ឍន៍សហប្រជាជាតិ (UNDP) អង្គការសហប្រជាជាតិផ្នែកអប់រំ វិទ្យាសាស្ត្រ និងវប្បធម៌ (UNESCO) មូលនិធិសហប្រជាជាតិសម្រាប់កុមារ (UNICEF) និងកម្មវិធីស្ម័គ្រចិត្តសហប្រជាជាតិ (UNV) ព្រមទាំងក្រុមប្រឹក្សាយោបល់យុវជនរបស់អង្គការសហប្រជាជាតិ (UNYAP)។
សូមបញ្ជាក់ថា កម្មវិធីរួមគ្នារបស់អង្គការសហប្រជាជាតិស្តីពីមុខរបរ និងការងារ សម្រាប់យុវជននៅកម្ពុជានេះនឹងកាន់តែជំរុញដល់ការអនុវត្តប្រកបដោយជោគជ័យនូវគោលដៅនៃគោលនយោបាយជាតិធំៗរបស់រាជរដ្ឋាភិបាលកម្ពុជាដែលបានដាក់ចេញដែលកម្មវិធីរួមគ្នានេះ ចាប់ផ្តើមរយៈពេល2ឆ្នាំ ពីខែកញ្ញា ឆ្នាំ2017 ដល់ខែសីហា ឆ្នាំ2019 គឺដើម្បីអភិវឌ្ឍ យុវជន និងស្ត្រីវ័យក្មេងកាន់តែច្រើនឡើងទទួលបានឱកាសការងារសមរម្យ និងមានផលិតភាព ហើយអ្វីដែលជាការរំពឹងទុកក្នុងការសម្រេចឱ្យបានគឺ
ទី1. យុវជន និងស្ត្រីវ័យក្មេងទទួលបានការអប់រំក្នុង និងក្រៅប្រព័ន្ធប្រកបដោយគុណភាព និងការស្ម័គ្រចិត្តដើម្បីអភិវឌ្ឍជំនាញវិជ្ជាជីវ: និងបច្ចេកទេស។
ទី2. យុវជន និងស្ត្រីវ័យក្មេងទាំងក្នុង និងក្រៅសាលាបានទទួលជំនាញអាជីវកម្ម និងសហគ្រាសគ្រប់គ្រាន់ដើម្បីអភិវឌ្ឍសហគ្រាសប្រកបដោយនិរន្តរភាព។
ទី3. យុវជន និងស្ត្រីវ័យក្មេងបានទទួលអត្ថប្រយោជន៏ពីហានិភ័យនៃការរំលោភបំពាន និងការរើសអើងនៅកន្លែងការងារ៕