អាណាព្យាបាលកម្ពុជាជាច្រើនតែងយល់ច្រឡំថា កូនក្មេងមិនគួរគិតគូរពីរឿងលុយកាក់នោះទេព្រោះអ្វីដែលពួកគេត្រូវធ្វើគឺ ខំរៀនចំណេះដឹងទូទៅឱ្យបានពូកែ ដើម្បីទទួលបានអនាគតល្អ តែគំនិតនេះគឺមិនប្រាកដថា ត្រឹមត្រូវនោះទេ ព្រោះមនុស្សដែលមានអនាគតល្អភាគច្រើនជាមនុស្សដែលចេះគ្រប់គ្រងហិរញ្ញវត្ថុ និងមានទម្លាប់គ្រប់គ្រងលុយកាក់ល្អតាំងពីក្មេង។
លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជាបានលើកឡើងថា ក្មេងតូចជាអ្នកដែលត្រូវយល់ដឹងបំផុតអំពីបញ្ហាលុយកាក់ ព្រោះវប្បធម៌សន្សំ ឬវប្បធម៌ឥណទានត្រូវបណ្តុះតាំងពីកុមារទើបមានប្រសិទ្ធភាពខ្ពស់។ នៅពេលដែលក្មេងយល់ច្បាស់ពីតម្លៃនៃការគ្រប់គ្រងលុយកាក់គាត់នឹងមានទម្លាប់ល្អក្នុងការចាយវាយតាំងពីនៅតូចដែលធ្វើឱ្យគាត់អាចក្លាយជាមនុស្សដែលចេះគ្រប់គ្រងហិរញ្ញវត្ថុបានល្អនៅពេលដែលគាត់ធំឡើង។
លោកជំទាវ ជា សិរី បាននិយាយថា៖ «ការគ្រប់គ្រងហិរញ្ញវត្ថុរបស់ក្មេងៗគឺមានសារៈសំខាន់ខ្លាំងណាស់ ទោះជានៅក្នុងក្របខ័ណ្ឌគ្រួសារ និងនៅក្នុងក្របខ័ណ្ឌជាស្ថាប័នធំៗក៏ដោយ។ មិនថាក្នុងកម្រិតណានោះទេ តែការគ្រប់គ្រងលុយគឺសុទ្ធតែជារឿងសំខាន់ទាំងអស់សម្រាប់មនុស្ស»។
បើតាមលោកជំទាវអគ្គនាយិកា ការបង្រៀនក្មេងតូចឱ្យចេះសន្សំលុយ ជាទម្លាប់ល្អបំផុតមួយដែលអាណាព្យាបាលគួរធ្វើដើម្បីជួយពួកគេឱ្យក្លាយជាមនុស្សដែលមានការគិតពិចារណាច្បាស់លាស់លើចំណូល និងចំណាយ ព្រោះវាជាធាតុសំខាន់ក្នុងការកំណត់ការអភិវឌ្ឍកម្រិតជីវភាពនៅថ្ងៃអនាគត។
ពាក់ព័ន្ធនឹងបញ្ហានេះដែរ លោក ប៉ិច ប៉ូឡែន អគ្គនាយកក្រុមហ៊ុន វេសឡាញ អេឌ្យូខេសិន បានលើកឡើងថា ក្មេងៗត្រូវការចេះដឹងលើជំនាញជាច្រើន ដែលក្នុងនោះរាប់បញ្ចូលទាំងចំណេះដឹងទូទៅនៅក្នុងសាលា ជំនាញទុនដែលពាក់ព័ន្ធនឹងបំណិនជីវិត និងការគ្រប់គ្រងហិរញ្ញវត្ថុ។
លោក ប៉ិច ប៉ូឡែន បាននិយាយថា៖ «ក្មេងៗនៅបរទេស ជាពិសេសនៅសិង្ហបុរី គេរៀនពីវិធីគ្រប់គ្រងហិរញ្ញវត្ថុតាំងពីថ្នាក់បឋមសិក្សា ដែលកត្តានេះធ្វើឱ្យប្រជាជនគេម្នាក់ៗក្លាយជាមនុស្សដែលមានចំណេះដឹងច្រើនលើការចាយវាយ»។
ផ្អែកលើចំណុចខាងលើនេះផងដែរ លោក ប៉ិច ប៉ូឡែន យល់ថា កុមារនៅកម្ពុជាក៏មានលទ្ធភាពគ្រប់គ្រាន់ដើម្បីសិក្សាពីការគ្រប់គ្រងហិរញ្ញវត្ថុនេះដែរ ហើយកម្មវីធីរបស់គ្រឹះស្ថានសិក្សាមួយចំនួនក៏បានបង្កើតកម្មវិធីល្អៗឡើងដើម្បីឱ្យក្មេងបានក្លាយជាមនុស្សដែលចេះអភិវឌ្ឍខ្លួនឯងឱ្យក្លាយជាមនុស្សពូកែសន្សំ ដូចជាកម្មវិធី Money Tree ជាដើម។ លោកបានបញ្ជាក់ផងដែរថា ក្មេងៗដែលចេះសន្សំ គឺមានលក្ខណៈល្អប្លែកពីក្មេងៗដែលមិនចូលចិត្តសន្សំ ហើយអាណាព្យាបាលក៏ធូរចិត្តច្រើនដែរនៅពេលដែលឃើញកូនគាត់ដឹងក្តី ឬចេះចាយវាយតាំងពីពួកគេនៅក្មេង៕