កីឡាករខ្សែប្រយុទ្ធ Kylian Mbappe បានបញ្ចេញមតិជាលើកដំបូង បន្ទាប់ពីការបរាជ័យរបស់ បារាំង នៅក្នុងវគ្គផ្ដាច់ព្រ័ត្រ World Cup 2022 ដោយការបង្ហោះសារមួយឃ្លាយ៉ាងខ្លីនៅលើបណ្ដាញសង្គម។
រយៈពេល 16 ម៉ោង ក្រោយពីការប្រកួតវគ្គផ្ដាច់ព្រ័ត្រ World Cup 2022 បានបញ្ចប់នៅលើទីលាន Lusail ក្នុង រាជធានីដូហា ប្រទេសកាតា ទើប Mbappe បញ្ចេញមតិជាលើកដំបូងទាក់ទងនឹងបរាជ័យរបស់ ក្រុមជម្រើសជាតិបារាំង។ «ពួកយើងនឹងត្រលប់មកវិញ» កីឡាករបារាំង Mbappe បង្ហោះសារលើ Twitter និង Instagram ដូច្នេះ។ សារនេះទាក់ទាញបានការចូលចិត្តជាង 10 លានលើក ក្រោយបង្ហោះបានប្រហែល 3 ម៉ោង។
គណនីបណ្ដាញសង្គមជាច្រើនបានបញ្ចេញមតិខាងក្រោមសាររបស់ Mbappe ក្នុងនោះ FIFA បានសរសេរថា «រង់ចាំការចូលរួមប្រកួតរបស់អ្នកម្ដងទៀត»។ «ស្ដេចបាល់ទាត់» Pele ក៏បានបញ្ចេញមតិដោយសរសេរថា «អរគុណ» អមនឹងរូបសំពះ និងរូបបេះដូង ខណៈដែលគ្រូបង្វឹក Jose Mourinho ប្រើប្រាស់តែរូបទះដៃជាការបញ្ចេញយោបល់។ ចំណែកគណនីរបស់ក្លឹប PSG វិញ បានប្រតិកម្មថា «អរគុណ Kylian។ យើងមានមោទកភាពខ្លាំងណាស់ចំពោះអ្នក»។
Hat-trick (រកបាន 3 គ្រាប់ក្នុង 1 ប្រកួត) បំប៉ើងសំណាញ់អាហ្សង់ទីន កាលពីយប់ថ្ងៃទី 18 ធ្នូ បានជួយឱ្យ Mbappe ក្លាយជាកីឡាករដែលរកបានគ្រាប់បាល់ច្រើនជាងគេក្នុងប្រវត្តិសាស្ត្រនៃវគ្គផ្ដាច់ព្រ័ត្រនៅ World Cup ដោយរកបាន 4 គ្រាប់។ Hat-trick របស់ Mbappe ក៏បានជួយឱ្យបារាំង ចូលដល់ការប្រកួតទាត់បាល់ប៉េណាំងទី។ ក្នុងការប្រកួតស៊ុតប៉េណាំងទី Mbappe ស៊ុតដំបូងគេ និងទទួលបានជោគជ័យ ប៉ុន្តែ Kingsley Coman និង Aurelien Tchouameni ធ្វើមិនបានសម្រេច នាំឱ្យ បារាំង ត្រូវចាញ់ 2-4 នៅក្នុងការប្រកួតនេះ។
ដោយសារតែ បារាំង មិនអាចដណ្ដើមបានពានរង្វាន់ជើងឯក ដូច្នេះ Mbappe ក៏របូតពានរង្វាន់ «កីឡាករឆ្នើមបំផុតក្នុងវគ្គផ្ដាច់ព្រ័ត្រ» និង «ពានបាល់មាស World Cup» ទៅលើដៃ Lionel Messi។ ក៏ប៉ុន្តែ Mbappe ក៏នៅតែដណ្ដើមបាន «ពានស្បែកជើងមាស» ដោយសាររកបាន 8 គ្រាប់នៅ World Cup 2022៕