នៅថ្ងៃទី 19 ធ្នូនេះ ក្រសួងពាណិជ្ជកម្ម បានចេញប្រកាសស្ដីពី ការបង់កម្រៃសមាជិកភាពរបស់ខ្លួនប្រចាំឆ្នាំ ដើម្បីក្លាយជាភ្នាក់ងារតំណាងស្របច្បាប់នៃម្ចាស់ម៉ាកដែលទទួលស្គាល់ជាផ្លូវការសម្រាប់ឆ្នាំ 2023។
«ក្រសួងពាណិជ្ជកម្មមានកិត្តិយស សូមជម្រាបជូនដំណឹងដល់ លោក លោកស្រី អ្នកនាង កញ្ញា ទាំងអស់ដែលជា ភ្នាក់ងារតំណាងស្របច្បាប់នៃម្ចាស់ម៉ាកក្នុងព្រះរាជាណាចក្រកម្ពុជា ឬ/និង កន្លងមកទទួលបានជោគជ័យក្នុងការបណ្តុះបណ្តាល ធ្វើជាភ្នាក់ងារតំណាងស្របច្បាប់នៃម្ចាស់ម៉ាកក្នុងព្រះរាជាណាចក្រកម្ពុជា សូមមកបង់កម្រៃសមាជិកភាពរបស់ខ្លួនប្រចាំឆ្នាំ ដើម្បីក្លាយជាភ្នាក់ងារតំណាងស្របច្បាប់នៃម្ចាស់ម៉ាកដែលទទួលស្គាល់ជាផ្លូវការសម្រាប់ឆ្នាំ 2023» ក្រសួងពាណិជ្ជកម្ម បានប្រកាសដូច្នេះ។
ក្រសួងឱ្យដឹងថា ការជូនដំណឹងខាងលើ គឺយោងតាមប្រកាសលេខ 045 MOC/SM 2011 ចុះថ្ងៃទី 09 កុម្ភៈ 2011 ស្តីពីភា្នក់ងារតំណាងស្របច្បាប់នៃម្ចាស់ម៉ាកក្នុងព្រះរាជាណាចក្រកម្ពុជា និងប្រកាសអន្តរក្រសួងស្តីពី ការផ្តល់សេវាសាធារណៈរបស់ ក្រសួងពាណិជ្ជកម្ម។
ក្រសួងបញ្ជាក់ថា ពាក្យស្នើសុំត្រូវដាក់នៅបញ្ជនៃនាយកដ្ឋានកម្មសិទ្ធិបញ្ញា និងត្រូវបង់កម្រៃសមាជិកភាពរបស់ខ្លួនដើម្បី ក្លាយជាភ្នាក់ងារតំណាងស្របច្បាប់នៃម្ចាស់ម៉ាកដែលទទួលស្គាល់ជាផ្លូវការសម្រាប់ឆ្នាំ 2023 នៅបញ្ជបង់ប្រាក់រួមរបស់ ក្រសួងពាណិជ្ជកម្ម រៀងរាល់ម៉ោងធ្វើការ ចាប់ពីថ្ងៃជូនដំណឹងនេះរហូតដល់ ថ្ងៃទី10 កុម្ភៈ 2023៕
