កំពូលខ្សែភាពយន្តរឿង «Avatar: The Way of Water» រកបានប្រាក់ចំណូលជាង 434 លានដុល្លារអាម៉េរិក នៅទូទាំងសកលលោក ទាបជាង «Doctor Strange 2» និង «Spider-Man: No Way Home» នៅក្នុងសប្ដាហ៍ដំបូង។
យោងតាម Deadline 300.5 លានដុល្លារអាម៉េរិក នៅក្នុងប្រាក់ចំណូលរបស់ Avatar 2 គឺបានមកពីការលក់សំបុត្រក្នុងទីផ្សារអន្តរជាតិ (ខាងក្រៅអាម៉េរិកខាងជើង)។ រឿង «Avatar 2» បានក្លាយជាកំពូលខ្សែភាពយន្តដែលទទួលបានជោគជ័យជាងគេលំដាប់ទីបី រាប់ចាប់ពីកូវីដ-19 បានផ្ទុះឡើង។ «Spider-Man: No Way Home» ធ្លាប់រកប្រាក់ចំណូលបាន 601 លានដុល្លារ និង «Doctor Strange 2» រកបាន 442 លានដុល្លារនៅក្នុងការបញ្ចាំងក្នុងសប្ដាហ៍ដំបូង។
ក្រុមអ្នកជំនាញអះអាងថា ប្រាក់ចំណូលក្នុងសប្ដាហ៍ដំបូងរបស់ «Avatar 2» សម្រេចមិនបានដូចបំណង។ ក្នុងនោះ ទីផ្សារប្រទេសចិន រកបានតែ 57.1 លានដុល្លារ ស្មើនឹងជាងពាក់កណ្ដាល ធៀបនឹងការព្យាករនាពេលកន្លង។ អ្នកវិភាគយល់ថា មូលហេតុសំខាន់ដែលនាំឱ្យប្រាក់ចំណូលមិនខ្ពស់ដូចការរំពឹងទុក គឺដោយសារស្ថានភាពកូវីដ-19 នៅ ប្រទេសចិន នៅតែប៉ះពាល់ដល់វិស័យបញ្ចាំងភាពយន្តនៅរោងកុនក្នុងប្រទេសនេះ។
ក៏ប៉ុន្តែ ខ្សែភាពយន្តថ្មីរបស់ James Cameron ឈរលំដាប់កំពូលតារាងស្ដីពីភាពយន្តដែលរកបានប្រាក់ចំណូលខ្ពស់ជាងគេលើពិភពលោកក្នុងសប្ដាហ៍កន្លង។
ខ្សែភាពយន្ត «Avatar 2» ឬហៅថា «Avatar: The Way of Water» ដែលជាវគ្គបន្ទាប់របស់ «Avatar» ផលិតកាលពីឆ្នាំ 2009 និយាយអំពី Jake Sully (Sam Worthington) កសាងគ្រួសារថ្មីនៅ Pandora។ ពួកគេរស់ដោយសុភមង្គលជាមួយនឹងកូន 4 នាក់ ក្នុងនោះមាន Kiri (Sigourney Weaver) ដែលជាកូនស្រីរបស់សពបណ្ឌិត Grace Augustine។ ក៏ប៉ុន្តែ ជីវភាពសុខសាន្តរបស់ពួកគេមិនបានអូសបន្លាយពេលយូរឡើយ នៅពេលមនុស្សវិលត្រលប់ទៅសងសឹក៕
