កីឡាករខ្សែប្រយុទ្ធ Lionel Messi បានបំបែកកំណត់ត្រាជាច្រើន បន្ទាប់ពី អាហ្សង់ទីន បានផ្ដួល ក្រួអាត 3-0 នៅវគ្គពាក់កណ្ដាលផ្ដាច់ព្រ័ត្ររបស់ World Cup 2022។
នាទីទី 34 ដែលគ្រាប់បាល់នៅ 0-0 នៅឡើយ អាហ្សង់ទីន ក៏ទទួលបានគ្រាប់បាល់ពិន័យ ក្រោយពីអ្នកចាំទី Dominik Livakovic បង្កកំហុសលើ Julian Alvarez។ នៅក្នុងចម្ងាយ 11 ម៉ែត្រ Messi ក៏ស៊ុតផ្ដាច់សំដៅជ្រុងខាងស្ដាំ ផ្នែកខាងលើ ប៉ើងសំណាញ់របស់ ក្រូអាត។ គ្រាប់បាល់នេះបានជួយឱ្យ Messi ក្លាយជាកីឡាករដែលរកបានគ្រាប់បាល់ច្រើនជាងគេសម្រាប់ អាហ្សង់ទីន នៅ World Cup (ដោយរកបាន 11 គ្រាប់)។ អ្នកគ្រប់គ្រងកំណត់ត្រានេះមុននោះគឺ Batistuta ដោយរកបាន 10 គ្រាប់ ចំណែក Diego Maradona រកបាន 8 គ្រាប់។
ក្នុងចំណោម 11 គ្រាប់ដែល Messi បានរកបាននៅ World Cup មាន 5 គ្រាប់នៅ កាតា, 1 គ្រាប់នៅ អាល្លឺម៉ង់ ឆ្នាំ 2006, 4 គ្រាប់នៅ ប្រេស៊ីល ឆ្នាំ 2015 និង 1 គ្រាប់នៅ រុស្ស៊ី កាលពីឆ្នាំ 2018។
World Cup 2022 គឺជាឱកាសចុងក្រោយសម្រាប់ Messi ដើម្បីដណ្ដើមពាន់រង្វាន់ជើងឯកពិភពលោក នៅពេលឈានចូលដល់វ័យ 35 ឆ្នាំ។ ម្ចាស់ពានរង្វាន់បាល់មាសចំនួន 7 នេះ កំពុងឆ្លងកាត់រដូវកាល World Cup ជោគជ័យបំផុត ដោយរកបាន 5 គ្រាប់ និងបង្កឱកាសជោគជ័យបាន 3 គ្រាប់។
Messi ក៏ជាកីឡាករទី 5 ដែលរកបានគ្រាប់បាល់ក្នុង 3 ប្រកួតនៅវគ្គជម្រុះផ្ទាល់នៅ World Cup 2022 ពេល អាហ្សង់ទីន បានឈ្នះ អូស្ត្រាលី ក្នុងវគ្គ 1/8 (វគ្គ 8 គូ), ឈ្នះ ហូឡង់ នៅវគ្គ 1/4 (វគ្គ 4 គូ) និងឈ្នះ ក្រូអាត នៅវគ្គពាក់កណ្ដាលផ្ដាច់ព្រ័ត្រ (វគ្គ 2 គូ)។
ជ័យជម្នះលើ ក្រូអាត កាលពីយប់មិញ (13 ធ្នូ 2022) ក៏ជួយឱ្យ Messi ក្លាយជាកីឡាករដំបូងគេក្នុងប្រវត្តិសាស្ត្របាល់ទាត់ពិភពលោកដែលរកបានគ្រាប់បាល់ផង និងបង្កឱកាសបានជោគជ័យផងនៅក្នុង 4 ប្រកួតនៅ World Cup។ នៅមុន 3 ប្រកួតនៅ កាតា លើកនេះ Messi ជាលើកដំបូងបានរកបានគ្រាប់បាល់ផង និងបង្កឱកាសបានសម្រេចផងនៅក្នុងការប្រកួតរវាង អាហ្សង់ទីន និង ស៊ែប៊ី នៅ អាល្លឺម៉ង់ កាលពីឆ្នាំ 2006។
ដោយរកបាន 11 គ្រាប់ និងបង្កឱកាសបានជោគជ័យ 8 គ្រាប់ Messi បានចូលរួមក្នុងជ័យជម្នះ 19 គ្រាប់នៅ World Cup ដែលនេះបាននាំឱ្យគាត់ឡើងទៅចែករំលែកកំណត់ត្រាស្ដីពីកីឡាកររកបានគ្រាប់បាល់ និងបង្កឱកាសជោគជ័យបានច្រើនជាងគេនៅ World Cup ដែលមុននោះគឺជាកំណត់ត្រារបស់ Miroslav Klose, Ronaldo Nazario និង Gerd Muller។
វត្តមានក្នុងការប្រកួតជាមួយ ក្រូអាត កាលពីយប់ថ្ងៃទី 13 ធ្នូ 2022 ក៏ជួយឱ្យ Messi បង្កើតបានតុល្យភាពស្ដីពីកីឡាករទាត់ 25 ប្រកួតនៅ World Cup របស់អតីតខ្សែប្រយុទ្ធនៃក្រុមជម្រើសជាតិអាល្លឺម៉ង់ Lothar Matthaus ផងដែរ។ Messi នឹងបំបែកកំណត់ត្រានេះនៅពេលចូលរួមការប្រកួតរវាង អាហ្សង់ទីន និងក្រុមដែលបានឈ្នះក្នុងការប្រកួតរវាង បារាំង និង ម៉ារ៉ុក ក្នុងវគ្គផ្ដាច់ព្រ័ត្រនាពេលខាងមុខ៕
