តម្លៃប្រេងឆៅ WTI និង Brent នាព្រឹកនេះបានងើបឡើងវិញ 2.3% ដោយសារតែ OPEC+ រក្សាការផលិតដូចដើម ខណៈ សហភាពអឺរ៉ុប ហាមនាំចូលប្រេងរបស់ រុស្ស៊ី គ្រាដែល ចិន បន្ធូរបន្ថយវិធានការទប់ស្កាត់ជំងឺឆ្លង។
បច្ចុប្បន្ន ប្រេងឆៅ WTI មួយធុងមានតម្លៃ 81.3 ដុល្លារអាម៉េរិក។ កាលពីសប្ដាហ៍កន្លង ប្រេងឆៅនេះឡើងថ្លៃជិត 5% នៅពេល ទីក្រុងប៉េកាំង បន្ធូរបន្ថយគោលនយោបាយ Zero Covid ដែលនាំឱ្យមានការរំពឹងថា ប្រទេសនេះនឹងប្រើប្រាស់ប្រេងច្រើនជាងបច្ចុប្បន្ន។ ចំណែកប្រេង Brent ត្រូវបានជួញដូរក្នុងរង្វង់ 87 ដុល្លារអាម៉េរិក/ធុង។
កាលពីថ្ងៃទី 04 ធ្នូ អង្គការប្រទេសនាំចេញប្រេង និងដៃគូសហការ (OPEC+) បានសម្រេចចិត្តរក្សាការផលិតដូចសព្វថ្ងៃ ដើម្បីមានពេលសម្រាប់ការវាយតម្លៃទីផ្សារក្នុងកាលៈទេសៈដែលមានការប្រែប្រួលខ្លាំង។ ថ្ងៃនេះ បទបញ្ជាហាមនាំចូលប្រេងរបស់ រុស្ស៊ី តាមផ្លូវសមុទ្ររបស់ សហភាពអឺរ៉ុប ក៏ចាប់ផ្ដើមមានសុពលភាព។
មុននោះ សហភាពអឺរ៉ុប និងក្រុមប្រទេស G7 បានឯកភាពគ្នាកំណត់តម្លៃពិតាន 60 ដុល្លារអាម៉េរិក/ធុង ចំពោះប្រេងរបស់ រុស្ស៊ី ក្នុងបំណងដាក់ទណ្ឌផ្នែកកម្មហិរញ្ញវត្ថុលើ ទីក្រុងមូស្គូ ប៉ុន្តែ នៅតែរក្សាលំហូរប្រេងនៅលើពិភពលោក។
រុស្ស៊ី បានប្រកាសប្រឆាំងនឹងគោលនយោបាយខាងលើរបស់ សហភាពអឺរ៉ុប ហើយថានឹងកាត់បន្ថយការផលិតប្រេងបើសិនជាចាំបាច់៕