ក្រុមហ៊ុនផលិតថ្មផ្ទុកថាមពលអគ្គិសនីធំជាងគេបង្អស់ក្នុងពិភពលោក CATL បានចុះកិច្ចព្រមព្រៀងសហការរកស៊ីជាមួយក្រុមហ៊ុនផលិតរថយន្តអគ្គិសនី VinFast របស់ វៀតណាម។
កាលពីថ្ងៃទី 30 តុលា នៅ ប្រទេសជប៉ុន តំណាងក្រុមហ៊ុនផលិតថ្មផ្ទុកថាមពលអគ្គិសនី Contemporary Amperex Technology (CATL) របស់ ចិន បានចុះកិច្ចព្រមព្រៀងសហប្រតិបត្តិការយុទ្ធសាស្ត្រជាមួយនឹងក្រុមហ៊ុនផលិតរថយន្តអគ្គិសនី Vinfast របស់ វៀតណាម។ ពិធីចុះហត្ថលេខានេះមានវត្តមានរបស់លោក Robin Zeng ដែលជាប្រធានក្រុមហ៊ុន CATL និងលោក Pham Nhat Vuong ប្រធានក្រុមហ៊ុន Vingroup និងជាប្រធានក្រុមហ៊ុន VinFast។
បច្ចុប្បន្ន CATL គឺជាអ្នកផលិតថ្មផ្ទុកអគ្គិសនីធំជាងគេបង្អស់ក្នុងពិភពលោក។ យោងតាម Companiesmarketcap តម្លៃមូលធនទីផ្សាររបស់ CATL គឺ 124.63 ពាន់លានដុល្លារអាម៉េរិក។ ស្ថាបនិករបស់ CATL លោក Robin Zeng កាលពីឆ្នាំ 2021 មានទ្រព្យជាង 60 ពាន់លានដុល្លារអាម៉េរិក ហើយបើយោងតាម Forbes លោក Zeng គឺជាមហាសេដ្ឋីលំដាប់ទីបីនៅ ប្រទេសចិន។ លោកក៏ជាអ្នកមានជាងគេលំដាប់ទី 23 ក្នុងពិភពលោក នេះបើតាម Bloomberg។
លោក Zeng បង្កើតក្រុមហ៊ុនផលិតថ្មផ្ទុកអគ្គិសនី Amperex Technology Ltd (ATL) កាលពីឆ្នាំ 1999។ ក្រុមហ៊ុនផលិតគ្រឿងបន្លាស់អេឡិចត្រូនិច TDK របស់ ជប៉ុន បានទិញ ATL កាលពីឆ្នាំ 2005 ក្នុងតម្លៃ 100 លានដុល្លារអាម៉េរិក និងបន្តគ្រប់គ្រង ATL ដូចទៅនឹងក្រុមហ៊ុនបុត្រសម្ព័ន្ធ។
ឆ្នាំ 2011 ក្រុមអ្នកវិនិយោគចិន មួយក្រុម ដែលដឹកនាំដោយលោក Zeng បានទិញភាគហ៊ុន 85% ក្នុងផ្នែកផលិតថ្មផ្ទុកថាមពលសម្រាប់រថយន្តអគ្គិសនរបស់ក្រុមហ៊ុន TDK។ ចុងឆ្នាំ 2011 ពួកគេបានបង្កើតក្រុមហ៊ុនអភិវឌ្ឍថ្មសម្រាប់រថយន្តអគ្គិសនីជាផ្លូវការដែលមានឈ្មោះថា Contemporary Amperex Technology Co Ltd (CATL)។ អតិថិជនដំបូងរបស់ CATL គឺក្រុមហ៊ុនផលិតរថយន្ត BMW (អាល្លឺម៉ង់) ហើយបន្ទាប់មកគឺ GM, Volkswagen និង Tesla។
បច្ចុប្បន្នក្រុមហ៊ុន CATL ដែលមានទីស្នាក់ការកណ្ដាលនៅ ប្រទេសចិន មានភាគហ៊ុន ដៃគូសហការ និងក្រុមហ៊ុនបណ្ដាក់ទុនរួមរាប់រយនៅទូទាំងពិភពលោក និងកំពុងកាន់កាប់ចំណែកទីផ្សារថ្មអគ្គិសនីប្រមាណជាង 50% នៅ ប្រទេសចិន និងជាង 30% នៅក្នុងពិភភពលោក។
យោងតាមកិច្ចព្រមព្រៀងខាងលើ CATL និង VinFast គ្រោងនឹងសហការគ្នាដើម្បីអភិវឌ្ឍបច្ចេកវិទ្យាថ្មី ក្នុងនោះមានថ្មផ្ទុកថាមពល និងគ្រឿងបន្លាស់ជាច្រើនទៀតដែលប្រើប្រាស់សម្រាប់រថយន្តអគ្គិសនីរបស់ ក្រុមហ៊ុនវៀតណាម៕
