ក្រុមម្ចាស់ជើងឯកប្រចាំទ្វីបអឺរ៉ុប ព័រទុយហ្គាល់ បានឈ្នះកៅអីទៅកាន់ព្រឹត្តិការណ៍ World Cup នៅឆ្នាំក្រោយ តាមរយៈការកត់ត្រាជ័យជម្នះក្នុងលទ្ធផល 2-០ លើក្រុមបាល់ទាត់ជម្រើសជាតិស្វ៊ីស កាលពីថ្ងៃអង្គារ ក្រោយពីការធ្វើឲ្យបាល់ចូលទីខ្លួនឯងពីសំណាក់ខ្សែការពារ Johan Djourou បានជួយឲ្យពួកគេឈ្នះកៅអីដោយស្វ័យប្រវត្តិតែម្តង។
ខ្សែការពារអន្តរជាតិស្វ៊ីសរូបនេះ បានធ្វើឲ្យបាល់ចូលក្នុងសំណាញ់ទីខ្លួនឯងនៅរយៈពេល4នាទីចុងក្រោយនៃតង់ទី1 រួចហើយខ្សែបម្រើប្រយុទ្ធ Andre Silva បានបំពេញជ័យជម្នះឱ្យក្រុមរបស់ខ្លួននៅនាទីទី57តែម្តង ខណៈដែលក្រុមជម្រើសជាតិព័រទុយហ្គាល់ បានតាមស្មើ27ពិន្ទុជាមួយនឹងក្រុមជម្រើសជាតិស្វ៊ីស ដើម្បីបញ្ចប់ដោយការឈរលើលេខ1ក្នុងពូល D ដោយសារតែមានគ្រាប់បាល់ច្រើនជាង។ ក្រុមជម្រើសជាតិស្វ៊ីស បាននាំមុខនៅក្នុងពូលនេះ ចាប់តាំងពីបានផ្តួលក្រុមជម្រើសជាតិព័រទុយហ្គាល់ 2-0 ក្នុងទីក្រុង Basel ក្នុងការប្រកួតបើកឆាកក្នុងពូលរបស់ពួកគេ កាលពីខែកញ្ញា ឆ្នាំមុនមកម្ល៉េះ និងបានបន្តឈ្នះរាល់ការប្រកួតទាំង 9លើក នៅមុនពេលការប្រកួតក្នុងទីក្រុង Lisbon កាលពីថ្ងៃអង្គារ ស្របពេលដែលក្រុមជម្រើសជាតិព័រទុយហ្គាល់ បានបន្តឈ្នះ8លើកជាប់ៗគ្នា។ បច្ចុប្បន្នក្រុមបាល់ទាត់ជម្រើសជាតិស្វ៊ីស នឹងឈានទៅកាន់ការចាប់ឆ្នោតសម្រាប់វគ្គ Playoff នៅថ្ងៃទី17 ខែតុលា ខាងមុខនេះ។
ស្របពេលជាមួយគ្នានេះ ខ្សែប្រយុទ្ធ Antoine Griezmann បានរកគ្រាប់បាល់1គ្រាប់ និងបានជួយឲ្យ Olivier Giroud រកបាន1គ្រាប់ផ្សេងទៀត ខណៈដែលក្រុមជម្រើសជាតិបារាំង បានកក់កៅអីរបស់ពួកគេក្នុងយុទ្ធនាការ World Cup នៅឆ្នាំក្រោយ តាមរយៈការផ្តួលក្រុមជម្រើសជាតិបេឡារុស 2-1 នាកីឡដ្ឋាន Stade de France ក្នុងការប្រកួតជុំចុងក្រោយនៃពូល A របស់ពួកគេកាលពីថ្ងៃអង្គារ។
ដោយឡែក ក្រុមជម្រើសជាតិហូឡង់ បានធ្លាក់ចេញពីយុទ្ធនាការ បើទោះបីជាយកឈ្នះលើក្រុមជម្រើសជាតិស៊ុយអែត 2-០ ក្នុងពូល A ដូចគ្នានេះក៏ដោយ។ បារាំង និងព័រទុយហ្គាល់ នឹងត្រូវចូលរួមជាមួយនឹងក្រុមជម្រើសជាតិបែលហ្ស៊ិក អេស្ប៉ាញ អង់គ្លេស អ៊ីស្លង់ អាល្លឺម៉ង់ ប៉ូឡូញ ស៊ែប៊ី និងម្ចាស់ផ្ទះរុស្ស៊ី ក្នុងការឈ្នះកៅអី World Cup ពីវគ្គជម្រុះនៅតំបន់អឺរ៉ុប។ ក្រុមទាំង8ដែលត្រូវឈ្នះកៅអីទៅប្រកួតវគ្គ Playoff រួមមានក្រុមជម្រើសជាតិស្វ៊ីស អ៊ីតាលី ក្រូអាស៊ី ដាណឺម៉ាក អៀរឡង់ខាងជើង ស៊ុយអែត សាធារណរដ្ឋអៀរឡង់ និងក្រុមជម្រើសជាតិក្រិក៕
ប្រភពពី៖ The Guardian
