ការអប់រំ ជាធាតុគន្លឹះយ៉ាងសំខាន់មួយក្នុងការអភិវឌ្ឍប្រទេស ព្រោះថា ការបណ្តុះបណ្តាលធនធានមនុស្ស ជាកត្តាជំរុញឱ្យកម្លាំងពលកម្មមានភាពសកម្មលើគ្រប់វិស័យក្នុងសង្គម ទាំងផលិតកម្ម សេវាកម្ម និងការគ្រប់គ្រងរដ្ឋបាលជាដើម។
ពាក់ព័ន្ធនឹងការអប់រំនេះ លោកបណ្ឌិត តាន់ មុនីវណ្ណ អគ្គនាយករងក្រុមហ៊ុន ម៉ុង ឬទ្ធីគ្រុប បានលើកឡើងនៅក្នុងទិវាភាពជាអ្នកដឹកនាំឆ្នាំ 2017 ថា ការបណ្តុះបណ្តាលនៅប្រទេសកំពុងអភិវឌ្ឍន៍មួយចំនួនបានចំណាយពេលវេលាច្រើនពេកលើការបណ្តុះបណ្តាលចំណេះដឹងទូទៅ តែមិនសូវផ្តោតសំខាន់ខ្លាំងលើការសិក្សាជំនាញ។ លោកបានបញ្ជាក់ថា វិធីសាស្ត្រនៃការបណ្តុះបណ្តាលនេះ គឺខុសពីប្រទេសអភិវឌ្ឍន៍ហើយ ព្រោះថា នៅប្រទេសអភិវឌ្ឍន៍ហើយធំៗមួយចំនួន គឺសិក្សាចំណេះដឹងទូទៅត្រឹមមធ្យមសិក្សាបឋមភូមិតែប៉ុណ្ណោះ បន្ទាប់មកគឺគេផ្តោតខ្លាំងលើការបណ្តុះបណ្តាលជំនាញ ឬតម្រង់ឆ្ពោះទៅរកជំនាញណាមួយតែម្តង។
លោកបណ្ឌិត តាន់ មុនីវណ្ណ បាននិយាយថា៖ «ប្រទេសកំពុងអភិវឌ្ឍន៍ជាច្រើនរៀនចំណេះដឹងទូទៅដល់ទៅ 12ឆ្នាំ ដែលពេលវេលាយូរនេះ អាចធ្វើឱ្យសិស្សមិនមានពេលច្រើនដើម្បីហ្វឹកហាត់ផ្នែកជំនាញ»។
សហគ្រិនខាងលើបានថ្លែងផងដែរថា ចំណុចសំខាន់មួយផ្សេងទៀតដែលប្រទេសកំពុងអភិវឌ្ឍន៍មួយចំនួនកំពុងជួបប្រទះគឺ ពួកគេខ្វះការស្រាវជ្រាវ ព្រោះថា នៅក្នុងប្រទេសនីមួយៗ អាចមានសាកលវិទ្យាល័យច្រើន តែមិនសូវមានសកម្មភាពខ្លាំងលើការស្រាវជ្រាវនោះទេ ដែលជាហេតុធ្វើឱ្យមានការពិបាកក្នុងការអភិវឌ្ឍ។ តែទោះជាយ៉ាងនេះក្តី ជាដំណោះស្រាយ លោកបណ្ឌិត បានស្នើសុំឱ្យមានការបណ្តុះបណ្តាលជំនាញឱ្យបានខ្លាំងដល់សិស្ស ហើយធ្វើយ៉ាងណារៀបចំថវិកាសម្រាប់ស្រាវជ្រាវឱ្យបានច្រើនដើម្បីបណ្តុះបណ្តាលធនធានមនុស្សឱ្យមានសក្តានុពលខ្លាំង៕
