ភ្នំពេញ៖ ក្នុងគោលដៅទប់ស្កាត់ ក៏ដូចជាកាត់បន្ថយការធ្វើចំណាកស្រុកខុសច្បាប់ រដ្ឋាភិបាលកម្ពុជាគ្រោងនឹងបង្កើតទីតាំងធ្វើលិខិតឆ្លងដែន (Passport) ចំនួន 2កន្លែងថែមទៀតនៅក្នុងខេត្តជិតព្រំដែនដើម្បីឱ្យប្រជាពលរដ្ឋងាយស្រួលទទួលបានសេវានៅទីតាំងថ្មីនេះ។
សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃមានប្រសាសន៍ ក្នុងសិក្ខាសាលាពិគ្រោះយោបល់ថ្នាក់ជាតិ កតិកាសញ្ញាជាសកល ស្តីពីទេសន្តរប្រវេសន៍ ប្រកបដោយសុវត្ថិភាព នៅព្រឹកថ្ងៃទី10 តុលានេះថា ដើម្បីធ្វើការទប់ស្កាត់ការធ្វើចំណាកស្រុកខុសច្បាប់ ចៀសវាងកើតមានគ្រោះថ្នាក់ក្នុងពេលចេញទៅធ្វើការក្រៅប្រទេស រដ្ឋាភិបាលបានសម្រេចបង្កើតទីតាំងធ្វើលិខិតឆ្លងដែនពីរកន្លែងបន្ថែមទៀតគឺ នៅក្នុងខេត្តបាត់ដំបង និងក្នុងខេត្តបន្ទាយមានជ័យ ជាទីដែលពលករខ្មែរធ្វើចំណាកស្រុកទៅធ្វើការនៅប្រទេសថៃច្រើនជាងគេ និងបន្តទៅប្រទេសទី 3 ថែមទៀត។
ស្របពេលជាមួយគ្នានេះដែរ សម្តេចក៏បានប្រកាសឱ្យអាជ្ញាធរព្រំដែនបិទច្រករបៀងនានានៅតាមព្រំដែន ព្រោះថា ទីតាំងទាំងនោះហើយដែលពលករ អាចចេញទៅធ្វើការដោយខុសច្បាប់ និងបង្កឱ្យមានគ្រោះថ្នាក់កើតឡើងជារឿយៗនៅប្រទេសផ្សេង ជួនកាលត្រូវបានមេខ្យល់នាំយកទៅធ្វើការដោយមិនដឹងគោលដៅច្បាស់លាស់ ឬពេលខ្លះត្រូវសមត្ថកិច្ចគេចាប់ដាក់ពន្ធធនាគារ ឬចាប់បញ្ជូនមកស្រុកកំណើតវិញ មានចំនួនមិនតិចជាង100នាក់ទេក្នុងមួយថ្ងៃ។
សម្តេចក៏បានអំពាវនាវទៅដល់ប្រជាពលរដ្ឋគួរកុំធ្វើចំណាកស្រុកទាំងប្រថុយប្រថាន ព្រោះថាអាចនឹងមានគ្រោះថ្នាក់កើតឡើងដល់ខ្លួន ហើយករណីនេះ អាជ្ញាធរព្រំដែនត្រូវតែមានវិធានការរឹតបន្តឹង ចៀសវាងការធ្វើចំណាកស្រុកដោយគ្មានឯកសារច្បាស់លាស់៕
