ដើម្បីធានាដល់សមត្ថភាពប្រកួតប្រជែងក្នុងវិស័យឧស្សាហកម្ម រដ្ឋាភិបាលអាម៉េរិក ថ្មីៗនេះបានបញ្ចេញសកម្មភាពគួរឱ្យចាប់អារម្មណ៍ នៅពេលប្រកាសកញ្ចប់ជំនួយតម្លៃរាប់ពាន់លានដុល្លារសម្រាប់បណ្ដាគម្រោងផលិតថ្មរថយន្តអគ្គិសនីក្នុងស្រុក។
ប្រធានាធិបតី ចូ បៃដិន កាលពីថ្ងៃទី ១៩ តុលា បានថ្លែងថា នឹងផ្ដល់កញ្ចប់ថវិកាជំនួយតម្លៃ ២.៨ ពាន់លានដុល្លារដើម្បីជំរុញសកម្មភាពផលិតថ្មផ្ទុកថាមពលសម្រាប់រថយន្តអគ្គិសនីនៅក្នុង ១២ រដ្ឋរបស់ប្រទេសនេះ។ ក្រុមហ៊ុនចំនួន ២០ ដែលត្រូវបានជ្រើសរើសនឹងទទួលបានជំនួយសម្រាប់បណ្ដាគម្រោងចម្រាញ់ កែច្នៃ lithium, graphite និងវត្ថុធាតុសំខាន់ៗសម្រាប់ការផលិតថ្មរថយន្តអគ្គិសនី។
បណ្ដាគម្រោងផលិតគ្រឿងបន្លាស់ និងបណ្ដាញផ្គត់ផ្គង់រ៉ែសំខាន់ៗសម្រាប់គម្រោងផលិតថ្មផ្ទុកអគ្គិសនី ក៏នឹងទទួលបានជំនួយខាងលើ។ យោងតាម ក្រសួងថាមពលអាម៉េរិក គម្រោងនានានឹងជួយផ្គត់ផ្គង់បរិមាណវត្ថុធាតុដើមនៅក្នុងការផលិតថ្មសម្រាប់រថយន្តអគ្គិសនីរាប់សែន រហូតដល់រាប់លានគ្រឿងជារៀងរាល់ឆ្នាំ។
ប្រធានាធិបតីអាម៉េរិក សង្កត់ធ្ងន់ថា «ប្រការនេះពិតជាសំខាន់ខ្លាំងណាស់ ព្រោះថា អនាគតរបស់វិស័យឧស្សាហកម្មរថយន្តគឺរថយន្តអគ្គិសនី និងថ្មផ្ទុកថាមពល ដែលជាផ្នែកដ៏សំខាន់នៅក្នុងរថយន្តអគ្គិសនីនោះ»។
លោក Ryan Melsert នាយកប្រតិបត្តិរបស់ក្រុមហ៊ុន American Battery Technology និយាយថា «សហរដ្ឋអាម៉េរិក ហាក់មិនមានវត្តមាននៅក្នុងការប្រកួតប្រជែងផ្នែក lithium ដោយសារតែមានចំណែកតែ ១% នៅក្នុងបរិមាណសរុបទូទាំងពិភពលោក។ ក្រុមអ្នកផលិតរថយន្តពិតជាត្រូវការចាំបាចនូវវត្ថុធាតុដើមនេះ»។
គេហទំព័រផ្នែករថយន្ត Autoblog បានផ្សាយថា ទីផ្សារថ្មរថយន្តអគ្គិសនីអាចមានទំហំ ៣៤០ ពាន់លានដុល្លារក្នុងឆ្នាំ ២០៣០។ បណ្ដាក្រុមហ៊ុនផលិតថ្មផ្ទុកអគ្គិសនីកំពុងតែប្រកួតប្រជែងផ្នែកបច្ចេកវិទ្យាដើម្បីផលិតប្រភេទថ្មអគ្គិសនីដែលមានកម្លាំងខ្លាំង តម្លៃសមស្រប និងអាចកែច្នៃឡើងវិញបានល្អ។
យោងតាម Reuters កាលពីខែឧសភា ២០២២ រដ្ឋាភិបាលរបស់លោក បៃដិន បានបែងចែកថវិកាជំនួយជាង ៣ ពាន់លានដុល្លារសម្រាប់ការផលិតថ្មរថយន្តអគ្គិសនី។ សហរដ្ឋអាម៉េរិក បានអនុម័តកញ្ចប់ថវិកាធំៗមួយចំនួនដូចជា ច្បាប់វិនិយោគលើហេដ្ឋារចនាសម្ព័ន្ធដែលមានតម្លៃខ្ទង់ទ្រីលានដុល្លារ ឬច្បាប់ស្ដីពីការកាត់បន្ថយអតិផរណាជាដើម។ គោលដៅនៃការចំណាយប្រាក់រាប់ពាន់លានដុល្លារទៅលើវិស័យផលិតថ្មរថយន្តអគ្គិសនីរបស់ សហរដ្ឋអាម៉េរិក នោះគឺ នៅឆ្នាំ ២០៣០ សហរដ្ឋអាម៉េរិក នឹងមានរថយន្តអគ្គិសនីចំនួនពាក់កណ្ដាលនៅក្នុងចំណោមរថយន្តសរុបនៅប្រទេសនេះ៕
