Mastercard នឹងភ្ជាប់ថ្នាលប្រតិបត្តិការប្រាក់ឌីជីថលគ្រីបតូ ជាមួយនឹងបណ្ដាធនាគារ ដើម្បីធ្វើឱ្យប្រាក់ប្រភេទនេះឆាប់បានក្លាយជានិន្នាការថ្មីជាផ្លូវការ។
បណ្ដាញសម្របសម្រួលការទូទាត់ប្រាក់ (Payment Processing Networks) បែបអេឡិចត្រូនិច លំដាប់ពិភពលោក Mastercard មានផែនការជួយដល់ស្ថាប័នហិរញ្ញវត្ថុផ្ដល់សេវាកម្មប្រតិបត្តិការលើប្រាក់ឌីជីថល។ ស្ថាប័ននេះនឹងដំណើរការដូចទៅនឹង «ស្ពានតភ្ជាប់» រវាង Paxos (ថ្នាលប្រតិបត្តិការដែលត្រូវបាន PayPal ប្រើប្រាស់ដើម្បីផ្ដល់សេវាដូចគ្នានេះ) ជាមួយនឹងបណ្ដាធនាគារ។ Mastercard និង Paxos នឹងធ្វើការដោយការគោរពទៅតាមការកំណត់ និងការធានាសុវត្ថិភាពទិន្នន័យ ជាមូលហេតុសំខាន់ ២ ដែលបណ្ដាធនាគារលើកយកមកអះអាងដើម្បីចៀសវាងប្រភេទទ្រព្យថ្មីនេះ។
ប្រាក់ឌីជីថលដូចជា Bitcoin ជាដើម មានភាពល្បីល្បាញខ្លាំងទាក់ទិននឹងការប្រែប្រួលខ្ពស់ ហើយវាបានបាត់បង់តម្លៃជាងពាក់កណ្ដាលក្នុងឆ្នាំនេះ។ វិស័យឧស្សាហកម្មនេះត្រូវរងការវាយប្រហារតាមអ៊ីនធើណិតរាប់ពាន់លានករណីរាប់ចាប់ពីដើមឆ្នាំ អមជាមួយនឹងករណីក្ស័យធនល្បីល្បាញជាច្រើន។
ក៏ប៉ុន្តែ Jorn Lambert ប្រធានផ្នែកឌីជីថលរបស់ Mastercard ឱ្យដឹងថា ការស្ទង់មតិរបស់ក្រុមហ៊ុននៅតែបង្ហាញថា មានតម្រូវការច្រើនចំពោះទ្រព្យប្រភេទនេះ។ យ៉ាងនេះក្ដី មនុស្សប្រហែល ៦០% ក្នុងចំណោមអ្នកដែលត្រូវបានសួរ យល់ថា ចង់ស្វែងយល់ ឬសុំយោបល់មុនពេលប្រតិបត្តិការលើប្រាក់ឌីជីថលតាមរយៈបណ្ដាធនាគារដែលមាននាបច្ចុប្បន្នរបស់ពួកគេ។
Mastercard ឱ្យដឹងថា តួនាទីរបស់ក្រុមហ៊ុននេះគឺ ការរក្សាឱ្យបណ្ដាធនាគារធ្វើទៅតាមបទប្បញ្ញត្តិ ដោយការគោរពតាមគោលការណ៍ប្រាក់ឌីជីថល ការបញ្ជាក់អំពីការប្រតិបត្តិ ការផ្ដល់សេវាកម្មប្រឆាំងអំពើលាងលុយ និងគ្រប់គ្រងអត្តសញ្ញាណ។ សេវាកម្មនេះនឹងត្រូវបានដាក់ឱ្យប្រើប្រាស់សាកល្បងក្នុងត្រីមាសទី ១ ឆ្នាំ ២០២៣ ហើយក្រោយមកនឹងពង្រីកទៅកាន់តំបន់នានា។ Mastercard មិនទាន់បង្ហើបឱ្យដឹងថា មានធនាគារណាខ្លះដែលបានចុះឈ្មោះចូលរួមគម្រោងនេះនៅឡើយ។
Mastercard និង Visa សុទ្ធតែមានទំនាក់ទំនងជាដៃគូក្នុងវិស័យប្រាក់ឌីជីថលគ្រូបតូ។ Mastercard បានសហការជាមួយ Coinbase ក្នុងការជួញដូរ NFT និងថ្នាល Bakkt ដើម្បីអនុញ្ញាតឱ្យបណ្ដាធនាគារ និងអ្នកជំនួញក្នុងបណ្ដាញរបស់ពួកគេ ផ្ដល់សេវាកម្មទាក់ទងនឹងប្រាក់ឌីជីថល។ កាលពីសប្ដាហ៍កន្លង Visa បានសហការជាមួយ FTX ដើម្បីផ្ដល់ប័ណ្ណឥណទានប្រាក់ឌីជីថលនៅក្នុងប្រទេសចំនួន ៤០ និងមានទំនាក់ទំនងជាមួយនឹង ៧០ ដៃគូ។ American Express ក៏កំពុងចូលរួមវិស័យនេះ ដោយការអនុញ្ញាតឱ្យប្រើប្រាស់ប័ណ្ណឥណទានដើម្បីទិញ Stablecoin។
ពិតជាគួរឱ្យភ្ញាក់ផ្អើល! ប្រាក់ឌីជីថលគ្រីបតូ ដំបូងឡើយត្រូវបានបង្កើតឡើងដើម្បីបំបាត់រនាំងពីបណ្ដាធនាគារ និងស្ថាប័នអន្តរការី មានដូចជា Mastercard និង Visa ជាដើម។ បច្ចេកវិទ្យាស្នូលរបស់ប្រាក់ឌីជីថលគ្រីបតូ គឺ blockchain អនុញ្ញាតឱ្យប្រតិបត្តិការហិរញ្ញវត្ថុប្រព្រឹត្តទៅដោយមិនចាំបាច់មានស្ថាប័នអន្តរការី៕
